អាជ្ញាធរខេត្តតាកែវ ជំរុញក្រុមការងារចុះបញ្ជីដីធ្លី ពន្លឿនការចុះបញ្ជី និងផ្ដល់ប័ណ្ណកម្មសិទ្ធិជូនពលរដ្ឋឱ្យបានឆាប់ ដើម្បីងាយស្រួលប្រជាពលរដ្ឋយកទៅប្រើប្រាស់

ភ្នំពេញ៖ លោក លី សាវ៉េត អភិបាលរងខេត្តតាកែវ បានធ្វើការជំរុញ និងរំលឹកទៅដល់ក្រុមការងារបច្ចេកទេសចុះបញ្ជីដីធ្លី ត្រូវសហការជាមួយអាជ្ញាធរមូលដ្ឋានស្រុក-ឃុំ ពិសេសមន្ទីរពាក់ព័ន្ធ ដើម្បីសម្របសម្រួលធ្វើយ៉ាងណាពន្លឿនការងារចុះបញ្ជីដីធ្លីមានលក្ខណៈជាប្រព័ន្ធ និងផ្ដល់ប័ណ្ណកម្មសិទ្ធិប្រើប្រាស់ដីធ្លី ជូនប្រជាពលរដ្ឋឱ្យបានលឿនឆាប់រហ័ស ងាយស្រួលប្រជាពលរដ្ឋយកទៅប្រើប្រាស់តាមតម្រូវការចាំបាច់ផ្សេងៗ។

ក្នុងឱកាសចែកវិញ្ញាបនបត្រសម្គាល់ម្ចាស់អចលនវត្ថុ ប័ណ្ណកម្មសិទ្ធិ ជូនប្រជាពលរដ្ឋ ចំនួន ៥៤៥ ប័ណ្ណ រស់នៅភូមិកំពង់អំពិល ស្រុកបូរីជលសារ ខេត្តតាកែ នៅថ្ងៃព្រហស្បតិ៍ ទី២២ ខែសីហា ឆ្នាំ២០២៤ លោកអភិបាលរងខេត្ត បានមានប្រសាសន៍បន្តថា ដើម្បីស្របតាមផែនការរបស់ រាជរដ្ឋាភិបាលក៏ដូចជា ក្រសួងរៀបចំដែនដី នគរូបនីយកម្ម សំណង់ និងសូរិយោដី បានគ្រោងទុក ក្រុមការងារបច្ចេកទេស រួមនឹងមន្រ្តីជំនាញ ដែលទទួលបន្ទុកលើការងារចុះបញ្ជីដីធ្លីនេះ ត្រូវបន្តយកចិត្តទុកដាក់ពង្រឹង និងពន្លឿនការចុះបញ្ជីដីធ្លីជូនប្រជាពលរដ្ឋ ដែលនៅសេសសល់ឱ្យបានលឿនឆាប់រហ័ស ក្នុងនោះ អាជ្ញាធរមូលដ្ឋានក៏ត្រូវជួយសម្របសម្រួល ដោះស្រាយរាល់បញ្ហាវិវាទដីធ្លីផ្សេងៗរបស់ប្រជាពលរដ្ឋ ដែលរាំងស្ទះដល់ដំណើរការចុះបញ្ជីដីធ្លីមានលក្ខណៈជាប្រព័ន្ធ នៅក្នុងភូមិសាស្រ្តខេត្តតាកែវពោលធ្វើយ៉ាងណាឱ្យការចុះបញ្ជីដីធ្លីប្រព្រឹត្តទៅដោយរលូននិងជោគជ័យស្របតាមផែនការគ្រោងទុក។

លោកបានគូរបញ្ជាក់ថា រាជរដ្ឋាភិបាលកម្ពុជា អាណត្តិទី៧ នៃរដ្ឋសភានេះ បានដាក់ចេញនូវយុទ្ធសាស្រ្តបញ្ជកោណ ដំណាក់កាលទី១ ក្នុងនោះ បានធ្វើកំណែទម្រង់ដីធ្លី និងនគរូបនីយកម្ម ឱ្យកាន់តែស៊ីជម្រៅជាមួយ និងការបង្កើតឱ្យមាននូវគោលនយោបាយដីធ្លីទាំង ៣ចំណុច ការចុះបញ្ជីដីធ្លីមានលក្ខណៈជាប្រព័ន្ធ ការដោះស្រាយវិវាទដីធ្លីក្រៅប្រព័ន្ធតុលាការ និងការផ្ដល់សេវារដ្ឋបាលដីធ្លីជូនប្រជាពលរដ្ឋ ប្រកបដោយតម្លាភាព និងប្រសិទ្ធភាពខ្ពស់ សំដៅលើកកម្ពស់កម្រិតជីវភាពរស់នៅរបស់ប្រជាពលរដ្ឋក្នុងមូលដ្ឋាន។

បើតាមរបាយការណ៍ លោក នួន សុធា ប្រធានមន្ទីររៀបចំដែនដី នគររូបនីយកម្ម សំណង់និងសូរិយោដីខេត្តតាកែវ បានអោយដឹងថាគិតមកដល់ពេលនេះការចុះបញ្ជីដីធ្លីមានលក្ខណៈជាប្រព័ន្ធក្នុងខេត្តតាកែវបច្ចុប្បន្នសម្រេចបានចំនួន ជាង៨៧ម៉ឺនក្បាលដី និងចែកប័ណ្ណកម្មសិទ្ធបានចំនួនជាង៧១ម៉ឺនប័ណ្ណ ហើយបច្ចុប្បន្ននេះនៅសល់ជាង១៦ម៉ឺនក្បាលដីទៀតដែលមិនទាន់បានវាស់វែង និងចុះបញ្ជី៕