សម្តេចធិបតី ណែនាំឲ្យក្រសួងវប្បធម៌ កែសម្រួលម៉ោងបើក និងបិទទស្សនាប្រាសាទនានា ដើម្បីបង្កលក្ខណៈងាយស្រួលដល់ភ្ញៀវទេសចរណ៍មានឱកាសទស្សនាកាន់តែសម្បូរបែប

ភ្នំពេញ៖ ក្នុងឱកាសដែលសម្តេចបានធ្វើសេចក្តីថ្លែងការណ៍ពិសេសមួយ ស្តីពីសមិទ្ធផល១ឆ្នាំ របស់រាជរដ្ឋាភិបាលនីតិកាលទី៧ នៃរដ្ឋសភា ២២ សីហា ឆ្នាំ២០២៣ – ២២សីហា ឆ្នាំ២០២៤ នៅយប់ថ្ងៃទី២២ ខែសីហា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា សម្តេចបានណែនាំឲ្យក្រសួងវប្បធម៌ និងវិចិត្រសិល្បៈ ពិនិត្យលទ្ធភាពបន្ថែមម៉ោងទស្សនានៅប្រាសាទមួយចំនួន ដើម្បីឲ្យភ្ញៀវទេសចរអាចមើលថ្ងៃលិច ថ្ងៃរះ និងស្ដាប់សត្វយំ នៅពេលព្រឹកព្រលឹម ដូចជាប្រាសាទអង្គរវត្តជាដើម។

សម្តេចធិបតី ហ៊ុន ម៉ាណែត បានបន្តថា ម៉ោងចាស់ប្រាសាទអង្គរវត្តបានបើកពីម៉ោងប្រាំព្រឹក និងបិទម៉ោងប្រាំកន្លះល្ងាច ដែលប្រាសាទបិទម៉ោងប្រាំកន្លះល្ងាចគ្រាន់តែបញ្ចប់ចូលថ្មីរបស់ភ្ញៀវតែប៉ុណ្ណោះ ប៉ុន្តែភ្ញៀវដែលមានស្រាប់អាចនៅ និងចេញជាបណ្ដើរបណ្ដើររហូតដល់ប្រាំមួយល្ងាច។ សម្តេចថា ប្រាសាទប្រែរូប ភ្នំបាខែង និងប្រាសាទភ្នំក្រោមដែលទេសចរនិយមទស្សនាថ្ងៃលិចបានបើកនៅម៉ោងប្រាំពីរព្រឹកដល់ម៉ោងប្រាំពីរយប់។

សម្តេចធិបតី បានបញ្ជាក់ថា ក្រោយពីការពិភាក្សាគ្នា យើងធ្វើការកែសម្រួលសម្រាប់ប្រាសាទអង្គរវត្ត គឺកែសម្រួលម៉ោងបើកម៉ោងប្រាំព្រឹក និងបិទម៉ោងប្រាំកន្លះល្ងាច។ប្រាសាទប្រែរូប ប្រាសាទភ្នំបាខែង និងប្រាសាទភ្នំក្រោមកែសម្រួលម៉ោងបើកពីម៉ោងប្រាំពីរព្រឹកដល់ម៉ោងប្រាំពីរយប់ដែលជាម៉ោងចាស់ យើងសម្រេចបន្ថែមម៉ោងបើកមួយម៉ោង គឺបើកម៉ោងប្រាំមួយព្រឹក ហើយបើកបិទនៅម៉ោងប្រាំពីរយប់ដដែល។

ដើម្បីកាន់តែសម្រួលដល់ទេសចរណ៍ សម្តេចធិបតី បានបញ្ជាក់ថា យើងត្រូវបន្ធូរលក្ខខណ្ឌថតរូបតាមរមណីយដ្ឋានអង្គរ ដើម្បីជួយបង្កលក្ខណៈឲ្យប្រជាពលរដ្ឋ និងភ្ញៀវទេសចរជាតិ អន្តរជាតិក្នុងគោលបំណងលើកតម្កើង និងលើកកម្ពស់ការផ្សព្វផ្សាយសម្បត្តិបេតិកភណ្ឌជាតិ និងជំរុញវិស័យទេសចរណ៍ប្រទេសយើង។

សម្តេចធិបតី ក៏បានណែនាំឲ្យសម្របសម្រួលនិតិវិធីទិញសំបុត្រចូលទស្សនារបស់ភ្ញៀវអន្តរជាតិឲ្យកាន់តែងាយស្រួល កាត់បន្ថយការចំណាយពេលយូរជាដើម ៕