តើស្រមោលព្រឹត្តិការណ៍ នៅលើផ្លូវវេងស្រេង ដែលកន្លងផុត១០ឆ្នាំមកនេះ គួរតែមកលងកម្ពុជា ជាថ្មីឬទេ?
ភ្នំពេញ៖ បើយើងរំលឹកអំពីព្រឹត្តិការណ៍ នៅផ្លូវវេងស្រេងកាលពីដើមឆ្នាំ២០១៤កន្លងទៅនេះ បានធ្វើអោយមានមនុស្ស៤នាក់ស្លាប់ និង៣៨នាក់ផ្សេងទៀតរងរបួស។
ការប៉ះទង្គិចគ្នារវាងប្រជាពលរដ្ឋជាមួយកម្លាំងសមត្ថកិច្ចនេះបានអូសបន្លាយអស់រយៈពេល២ថ្ងៃ គឺពីថ្ងៃទី២-៣ ខែមករា ឆ្នាំ២០១៤។
មន្ត្រីរដ្ឋាភិបាលបានអះអាងថា ប្រសិនបើជាបាតុកម្មអហិង្សានោះ កងកម្លាំងគ្មានឡើយ ការប្រើប្រាស់កម្លាំងបង្ក្រាបនោះហើយថា ដើម្បីរក្សាស្ថិរភាព និង បញ្ចៀសបាននូវ ការខូចខាត ទ្រព្យសម្បត្តិរដ្ឋ និង ឯកជន រដ្ឋាភិបាល ត្រូវតែ រក្សា កាតព្វកិច្ច ជា អ្នកអនុវត្តច្បាប់។នៅលើដងផ្លូវវេងស្រេង មានផ្សែងហ៊ុយ សំណល់ដបសាំង និងដំថ្ម នៅក្រាលពេញនៅលើថ្នល់។
ទ្រព្យសម្បត្តិរដ្ឋ ផ្ទះសំបែងឯកជន និងគ្លីនិក ត្រូវបានដុតបំផ្លាញដែលស្ថិតនៅតាមដងផ្លូវ ជាពិសេសនៅតំបន់សួនច្បារកាណាឌីយ៉ា ។
ជាផលវិបាកព្រឹត្តិការណ៍នៅផ្លូវវេងស្រេងនេះ បានបង្ហូរឈាមប្រជាពលរដ្ឋខ្មែរ ក្នុងនោះមានឈាមកម្លាំងសមត្ថកិច្ចផងដែរ ។ បង្កសម្លេងអសន្តិសុខ ប៉ះពាល់គម្រោងវិនិយោគរោងចក្រកាត់ដេរ និងប៉ះពាល់ផងដែរដល់កិត្តិយសកម្ពុជានៅលើឆាកអន្តរជាតិ ។
មូលហេតុដែលនាំអោយផ្ទុះកុបកម្មនេះ គឺដោយសារមានការញុះញង់អោយកម្មកររោងចក្រកាត់ដេរទាមទារតម្លើងប្រាក់ខែ។ បើយើងពិនិត្យមើលលើបរិយាកាសនៅពេលនោះ គឺកើតឡើងក្រោយការឈ្នះឆ្នោតរបស់គណបក្សប្រជាជននៅឆ្នាំ២០១៣ តែរយៈពេល៥ខែតែប៉ុណ្ណោះ។
តើនរណាជាអ្នកអូសទាញកម្មករ និងប្រជាពលរដ្ឋអោយចូលរួមធ្វើបាតុកម្ម ដែលផ្ទុះទៅជាកុបកម្មនេះឡើង?
មកដល់ពេលនេះ ព្រឹត្តិការណ៍នៅផ្លូវវេងស្រេងកន្លងផុត១០ឆ្នាំមកហើយ។ ស្រាប់តែពេលនេះ លេចមុខអ្នកអុចអាលអោយប្រជាពលរដ្ឋធ្វើបាតុកម្មរឿង CLV វិញម្តង។
តើស្រមោលព្រឹត្តិការណ៍នៅផ្លូវវេងស្រេងនេះគួរតែមកលងកម្ពុជា ជាថ្មីឬទេ?
សម្តេចធិបតី ហ៊ុន ម៉ាណែត កាលពីថ្ងៃទី៣០ ខែកក្កដាឆ្នាំ២០២៤ បានចុះទៅពិនិត្យបង្គោលសីម៉ា នៅខេត្តក្រចេះ និងស្ថិតក្នុងស្រុកកែវសីម៉ា ខេត្តមណ្ឌលគិរី ដើម្បីផ្ទៀងផ្ទាត់អោយប្រាកដថា ខ្មែរបានបាត់បង់ដី ៤ខេត្តអោយទៅវៀតណាម មែនឬអត់ ។
លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម កាលពីកន្លងទៅថ្មីៗនេះ បានបញ្ជាក់ថា កិច្ចព្រមព្រៀងតំបន់អភិវឌ្ឍន៍ត្រីកោណ ពីឆ្នាំ១៩៩៩ ដែលរយៈពេល ២៥ឆ្នាំកន្លងមកនេះបានធ្វើអោយផលិតផលសរុបនៅក្នុងស្រុកសម្រាប់មនុស្សម្នាក់ៗ នៃប្រជាពលរដ្ឋនៅក្នុងខេត្តទាំង៤ គឺខេត្តក្រចេះ ស្ទឹងត្រែង រតនគីរី និង មណ្ឌលគីរី នៅក្នុងឆ្នាំ២០២២ កន្លងនេះ មានចន្លោះ១៦៣០ដុល្លារក្នុងម្នាក់។ មានន័យថា ជាមធ្យមភាគមួយប្រហាក់ប្រហែលជាមួយបរិមាណផលិតផលសរុបក្នុងស្រុករបស់ប្រជាពលរដ្ឋនៅក្នុងតំបន់ផ្សេងៗទៀត នៅក្នុងប្រទេសកម្ពុជា។ ទន្ទឹមនេះទៀតតំបន់នោះ មានការអភិវឌ្ឍន៍ផ្លូវគមនាគមន៍តភ្ជាប់មកទីប្រជុំជននិងបន្តមកក្រុងភ្នំពេញ ។
ចំណែកឯឯកឧត្តម ជិន ម៉ាលីន រដ្ឋលេខាធិការប្រចាំការ និងជា អ្នកនាំពាក្យក្រសួងយុត្តិធម៌ កាលពីថ្ងៃទី១៥សីហា បានលើកឡើងថា ផែនការអូសទាញប្រមូលប្រជាជនក្នុងស្រុក ដើម្បីធ្វើបាតុកម្ម ប្រឆាំងនឹងគម្រោងកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV-DTA) ពុំមែនធ្វើឡើងដើម្បីជាការសម្តែងមតិតាមច្បាប់នោះទេ ។ ផ្ទុយទៅវិញ នេះគឺជាផែនការប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរាជរដ្ឋាភិបាល តាមរយៈការប្រើប្រាស់នូវវិធីញុះញង់អុជអាល បំផុសបំផុល និងការប្រើឧបាយកលនយោបាយ បោកបញ្ឆោតអូសទាញប្រមូលកម្លាំងប្រជាជនស្លូតត្រង់ ឱ្យធ្វើបាតុកម្មបះបោរ ផ្តួលរំលំរាជរដ្ឋាភិបាលស្របច្បាប់ ។ សកម្មភាពជុំវិញផែនការនេះ គឺជាអំពើវិទ្ធង្សនា ដែលជាឧក្រិដ្ឋកម្មធ្ងន់ធ្ងរបំផុតប៉ះពាល់ដល់សន្តិសុខជាតិ ។
ឯកឧត្តមបញ្ជាក់បន្ថែមថា ផែនការប៉ុនប៉ងផ្តួលរំលំរាជរដ្ឋាភិបាល ដើម្បីដណ្តើមអំណាច តាមមធ្យោបាយក្រៅពីការបោះឆ្នោត តាមគោលការណ៍នៃលទ្ធិប្រជាធិបតេយ្យសេរីពហុបក្ស ដែលមានចែងក្នុងរដ្ឋធម្មនុញ្ញ គឺជាបទឧក្រិដ្ឋកម្មធ្ងន់ធ្ងរ ដែលត្រូវផ្តន្ទាទោសក្រោម “បទល្មើសឧបឃាត” ដែលអ្នកប្រព្រឹត្តិត្រូវដាក់ពន្ធនាគារពី ១៥ឆ្នាំ ទៅ៣០ឆ្នាំ ហើយប្រសិនបើជនល្មើសជា អ្នករាជការសាធារណៈ ទោសសម្រាប់ “បទល្មើសឧបឃាត” នេះ ត្រូវដាក់ពន្ធនាគារអស់មួយជីវិត ៕
