ក្មេងស្រី ១.៤លាននាក់នៅអាហ្វហ្គានីស្ថាន ត្រូវបានហាមប្រាមមិនឲ្យសាលារៀន ចាប់តាំងពីពួកតាលីបង់ត្រឡប់មកវិញ
ប៉ារីស៖ យ៉ាងហោចណាស់ក្មេងស្រី ១.៤លាននាក់ នៅក្នុងប្រទេសអាហ្វហ្គានីស្ថាន ត្រូវបានមិនឲ្យទទួលបានការអប់រំកម្រិតមធ្យមសិក្សា ចាប់តាំងពីក្រុមតាលីបង់បានវិលត្រឡប់មកកាន់អំណាចនៅឆ្នាំ២០២១ ជាមួយនឹងអនាគតនៃជំនាន់ទាំងមូលឥឡូវនេះស្ថិតក្នុងគ្រោះថ្នាក់ នេះបើយោងតាមទីភ្នាក់ងារវប្បធម៌របស់អង្គការសហប្រជាជាតិបានឲ្យដឹងកាលពីថ្ងៃព្រហស្បតិ៍។
អង្គការយូណេស្កូបានបញ្ជាក់នៅក្នុងសេចក្តីថ្លែងការណ៍មួយថា លទ្ធភាពទទួលបានការអប់រំកម្រិតបឋមសិក្សាក៏បានធ្លាក់ចុះយ៉ាងខ្លាំងផងដែរ ដោយមានក្មេងស្រី និងក្មេងប្រុសចំនួន ១.១លាននាក់បានចូលរៀន ខណៈដែលអាជ្ញាធរតាលីបង់បានប្រារព្ធខួបបីឆ្នាំចាប់តាំងពីការដណ្តើមយកអាហ្វហ្គានីស្ថានមកវិញនៅថ្ងៃទី១៥ ខែសីហា ឆ្នាំ២០២១។
ទីភ្នាក់ងារនេះបានបន្តថា យូណេស្កូមានការភ័យព្រួយចំពោះផលវិបាកដ៏គ្រោះថ្នាក់នៃអត្រាបោះបង់ការសិក្សាដ៏ច្រើននេះ ដែលអាចនាំឱ្យមានការកើនឡើងនៃពលកម្មកុមារ និងអាពាហ៍ពិពាហ៍មុនអាយុ។
ក្នុងរយៈពេលត្រឹមតែ ៣ឆ្នាំប៉ុណ្ណោះ អាជ្ញាធរតាមការពិតស្ទើរតែបានលុបចោលនូវវឌ្ឍនភាពជាលំដាប់សម្រាប់ការអប់រំនៅអាហ្វហ្គានីស្ថានអស់រយៈពេល ២ទសវត្សរ៍ ហើយអនាគតនៃជំនាន់ទាំងមូលឥឡូវនេះកំពុងស្ថិតក្នុងគ្រោះថ្នាក់។
ទីភ្នាក់ងារអង្គការសហប្រជាជាតិបានឲ្យដឹងថាឥឡូវនេះមានក្មេងស្រីជិត ២,៥លាននាក់ត្រូវបានដកហូតសិទ្ធិទទួលបានការអប់រំដែលតំណាងឱ្យ ៨០ភាគរយនៃក្មេងស្រីដែលមានអាយុចូលរៀននៅអាហ្វហ្គានីស្ថាន។
រដ្ឋបាលតាលីបង់ដែលមិនត្រូវបានគេទទួលស្គាល់ដោយប្រទេសណាមួយបានដាក់កំហិតលើស្ត្រីដែលអង្គការសហប្រជាជាតិបានពណ៌នាថាជាការរើសអើងយេនឌ័រ។
អាហ្វហ្គានីស្ថាន គឺជាប្រទេសតែមួយគត់ក្នុងពិភពលោក ដែលបញ្ឈប់ក្មេងស្រី និងស្ត្រីឱ្យចូលរៀននៅអនុវិទ្យាល័យ និងសាកលវិទ្យាល័យ។
អង្គការយូណេស្កូបានឲ្យដឹងថា ជាលទ្ធផលនៃបម្រាមដែលដាក់ដោយអាជ្ញាធរជាក់ស្តែង ក្មេងស្រីយ៉ាងហោចណាស់ ១.៤លាននាក់ត្រូវបានបដិសេធដោយចេតនាក្នុងការចូលរៀនថ្នាក់អនុវិទ្យាល័យចាប់តាំងពីឆ្នាំ២០២១។
អង្គការយូណេស្កូបានបញ្ជាក់ថា ជាលទ្ធផល ប្រទេសនេះនឹងប្រឈមមុខនឹងការខ្វះខាតយ៉ាងឆាប់រហ័សនៃនិស្សិតបញ្ចប់ការសិក្សាដែលបានទទួលការបណ្តុះបណ្តាលសម្រាប់ការងារដែលមានជំនាញខ្ពស់បំផុត ដែលវានឹងធ្វើឱ្យបញ្ហាអភិវឌ្ឍន៍កាន់តែធ្ងន់ធ្ងរឡើង។
