អគ្គស្នងការនគរបាលជាតិ អំពាវនាវដល់អាណាព្យាបាល ត្រូវអប់រំណែនាំ កូន-ក្មួយ ចាកចេញឱ្យឆ្ងាយពីក្រុមជ្រុលនិយម

ភ្នំពេញ៖ ឯកឧត្តម នាយឧត្តមសេនីយ៍ ស ថេត អគ្គស្នងការ នៃអគ្គស្នងការដ្ឋាននគរបាលជាតិ បានអំពាវនាវដល់អាណាព្យាបាល ត្រូវធ្វើការអប់រំណែនាំ កូន-ក្មួយ របស់ខ្លួនចាកចេញឱ្យឆ្ងាយពីក្រុមជ្រុលនិយមជាបន្ទាន់។

នាយឧត្តមសេនីយ៍ ស ថេតបានអំពាវនាវបែបនេះក្នុងឱកាសអញ្ជើញធ្វើសន្និសីទសារព័ត៌មាន ស្តីពី ការងារគ្រប់គ្រងសន្តិសុខ សណ្តាប់ធ្នាប់សារធារណៈសង្គម នៅទីស្តីការក្រសួងមហាផ្ទៃ នារសៀលថ្ងៃទី១៣ ខែសីហា ឆ្នាំ២០២៤។

ឯកឧត្តម នាយឧត្តមសេនីយ៍ ស ថេត បានថ្លែងថា គោលបំណងល្បិចកលរបស់ក្រុមជ្រុលនិយមមួយក្ដាប់តូច ដើម្បីប្រមូលកម្លាំងធ្វើបាតុកម្មនោះ គឺជាអំពើខុសច្បាប់ យ៉ាងធ្ងន់ធ្ងរ ដែលកងកម្លាំងនគរបាលជាតិទាំងមូល គឺមិនអនុញ្ញាតជាដាច់ខាត។

ឯកឧត្តម នាយឧត្តមសេនីយ៍ ស ថេត បានគូសបញ្ជាក់ថា «យើងត្រូវច្បាស់ទាំងអស់គ្នា មិនមែនគំរាមទេ ក៏ប៉ុន្តែយើងត្រូវធ្វើការបញ្ជាក់ជូននូវអ្វីដែលបងប្អូនយើងមួយចំនួនធំ មិនទាន់ច្បាស់ ឬក៏មិនទាន់បានគិតគ្រប់ជ្រុងជ្រោយ សុំឱ្យមកចូលរួមជាមួយរាជរដ្ឋាភិបាលរបស់យើង ក្នុងការអភិវឌ្ឍប្រទេសរបស់យើងនាពេលបច្ចុប្បន្ន ឲ្យកាន់តែមានការរីកចម្រើន។ គោលបំណង ល្បិចកលរបស់ក្រុមជ្រុលនិយមមួយក្តាប់តូច ដើម្បីប្រមែប្រមូលកម្លាំងធ្វើកុបកម្មនោះ ជាអំពើខុសច្បាប់ធ្ងន់ធ្ងរ ដែលយើងជាកម្លាំងនគរបាលជាតិ មិនអនុញ្ញាតដាច់ខាត» ។

ឯកឧត្តម នាយឧត្តមសេនីយ៍បន្ដថា កងកម្លាំងប្រដាប់អាវុធ គឺជាឧបករណ៍របស់រដ្ឋ ដូច្នេះ ត្រូវការពាររដ្ឋ ជាដាច់ខាត មិនឲ្យអ្នកណាមកបំផ្លិចបំផ្លាញតាមបែបមិនប្រជាធិបតេយ្យឡើយ។

ទន្ទឹមនឹងនេះ ឯកឧត្តម នាយឧត្តមសេនីយ៍ ក៏បានអំពាវនាវដល់ដល់ ឪពុក-ម្តាយ អាណាព្យាបាល របស់ក្រុមក្មេងៗ ត្រូវធ្វើការអប់រំណែនាំដល់ កូន-ក្មួយ របស់ខ្លួនឱ្យចាកចេញ ឱ្យឆ្ងាយពីក្រុមជ្រុលនិយម ដើម្បីចូលរួមចំណែកជាមួយរាជរដ្ឋាភិបាល អភិវឌ្ឍន៍ប្រទេសជាតិ ឱ្យមានការរីកចម្រើនបន្ថែមទៀត។

ឯកឧត្តម នាយឧត្តមសេនីយ៍ ស ថេត មានប្រសាសន៍ថា «ខ្ញុំ អំពាវនាវហើយ អំពាវនាវទៀត ទៅដល់អាណាព្យាបាល អ្នកពាក់ព័ន្ធទាំងអស់ ណែនាំ កូន ក្មួយ សាច់ញាតិ មិត្តភ័ក្រ្ត ប្រសិនបើមានចូលទៅក្នុងក្រុមនេះ (ក្រុមជ្រុលនិយម) គឺសុំដកខ្លួនចេញ ថយជាបន្ទាន់ ព្រោះវាជាបញ្ហាគ្រោះថ្នាក់។ ប្រឹងរៀនសូត្រ ប្រឹងចូលរួមធ្វើការងារសង្គម ដើម្បីសង្គមជាតិយើងទាំងមូល កុំចេះតែជឿតាមការញុះញង់ បំបែក បំបាក់ តាមអ្នកវិភាគមួយក្ដាប់តូច ឬអ្នកនៅខាងក្រៅ អ្នកដែលជ្រុលនិយម ទាំងក្នុង និងនៅខាងក្រៅ នោះ គឺគ្មានបានស្អីនោះទេ»៕