រដ្ឋាភិបាល និងUSAIDមរតកបៃតង ប្ដេជ្ញាការពារជម្រកសត្វដំរីអាស៊ីកុំឱ្យបាត់បង់ ខណៈសត្វដំរីជិតផុតពូជមួយប្រភេទកំពុងរងការគំរាមកំហែងពីការបាត់បងជម្រក

ភ្នំពេញ៖ យោងតាមគណនីហ្វេសប៊ុករបស់ USAID មរតកបៃតង បានឱ្យដឹងថា ក្នុងទិវាសត្វដំរីពិភពលោក រដ្ឋាភិបាល និងUSAID មរតកបៃតងថានឹងធ្វើការរួមគ្នាដើម្បីការពារជម្រកសត្វដំរីអាស៊ី និងសត្វព្រៃផ្សេងទៀតពីការបាត់បង់ និងរេចរឹល ខណៈសត្វដំរីជិតផុតពូជមួយប្រភេទកំពុងរងការគំរាមកំហែងពីការបាត់បងជម្រក។

យោងតាមក្រសួងបរិស្ថានកម្ពុជាមានដំរី អាស៊ី ចំនួន ប្រមាណ ពី ៤០០ ទៅ ៦០០ ក្បាល ដែល ភាគ ច្រើនរស់ នៅក្នុង តំបន់ ជួរភ្នំក្រវាញ តំបន់ខ្ពង់រាបខាងជើងទន្លេសាប និងតំបន់ ខ្ពង់ រាប ភាគ ខាង កើតដែលជាតំបន់មានជីវៈចម្រុះសម្បូរបែប និងមានទីជម្រកអំណោយផលដល់ការរស់នៅរបស់សត្វដំរី និងសត្វព្រៃផ្សេងៗទៀត។ ក្នុងនោះក៏មានដំរីមួយប្រភេទដែលមានឈ្មោះថា «ដំរីអាស៊ី» ជាប្រភេទសត្វជិតផុតពូជក្នុងបញ្ជីក្រហមអង្គការសហភាពអន្តរជាតិដើម្បីការអភិរក្សធម្មជាតិ កំពុងរងការគំរាមកំហែងពីការបាត់បង់ទីជម្រកទូទាំងពិភពលោក។

ជាមួយគ្នានោះ នៅតំបន់ជួរភ្នំក្រវាញកណ្តាល USAID មរតកបៃតង ដែលបានសហការជាមួយអង្គការអភិរក្សអន្តរជាតិកម្ពុជា Legacy Landscapes Fund និង P&G នឹងធ្វើការរួមគ្នាជាមួយរាជរដ្ឋាភិបាលកម្ពុជា សហគមន៍មូលដ្ឋាន ដៃគូអភិវឌ្ឍន៍ដើម្បីការពារសត្វព្រៃរួមទាំងដំរីអាស៊ី និងជម្រករបស់សត្វដំរីទាំងអស់តាមរយៈគម្រោងរេដបូក។

ដំរីគឺជាថនិកសត្វរស់នៅជាហ្វូង មានភាពវៃឆ្លាតហើយមានមាឌធំជាងគេក្នុងចំណោមសត្វលើគោកដទៃ។ នៅក្នុងធម្មជាតិ សត្វដំរីដើរតួនាទីដូចជាវិស្វករនៃប្រព័ន្ធអេកូឡូស៊ី ដោយមានមាឌធំសម្បើម ពេលធ្វើដំណើរសត្វដំរីត្រួសត្រាយផ្លូវក្នុងព្រៃសម្រាប់សត្វតូចៗដទៃទៀត។ ដំរីដើរតួនាទីយ៉ាងសំខាន់ក្នុងការបែកខ្ញែកគ្រាប់ពូជនៅក្នុងព្រៃ និងត្រូវការជម្រកធម្មជាតិដែលមានទំហំធំសមរម្យដើម្បីចល័ត ស្វែងរកចំណី និងរស់រានមានជីវិត។ នេះបើតាម USAID មរតកបៃតង។ យ៉ាងណា កាលពីខែមេសា ឆ្នាំ២០២៣ ឯកឧត្តម នេត្រ ភក្ត្រា បានថ្លែងក្នុងយុទ្ធនាការអន្ទាក់សូន្យដំណាក់កាលទី២ នៅទីរួមខេត្តពោធិ៍សាត់ថា បទល្មើសនៃការបរបាញ់សត្វដំរីនៅក្នុងតំបន់ជួរភ្នំក្រវាញត្រូវបានថមថយ ប៉ុន្តែអន្ទាក់នៅតែជាបញ្ហាប្រឈមចំពោះសត្វដំរីព្រៃ៕