ឧត្តមសេនីយ៍ឯក លៀង ភារម្យ ដឹកនាំកម្លាំងជួយសង្គ្រោះពលរដ្ឋដោយសារទឹកជំនន់ និងសួរសុខទុក្ខកម្លាំងនគរបាលការពារព្រំដែននៅតំបន់ត្រពើក ស្រុកជាំក្សាន្ដ ជាប់ព្រំដែនឡាវ
ភ្នំពេញ៖ លោកឧត្តមសេនីយ៍ឯក លៀង ភារម្យ ប្រធាននាយកដ្ឋានកណ្ដាលនគរបាលព្រំដែន តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ និងនាយឧត្តមសេនីយ៍ ខេង សុមេធ អគ្គស្នងការរងទទួលដឹកនាំនាយកដ្ឋានកណ្ដាលនគរបាលព្រំដែន និងជាមេបញ្ជាការ នៃគណៈបញ្ជាការនគរបាលជាតិប្រចាំទិសភូមិភាគទី៣, ទី៤ និងទី៥ បានដឹកនាំកម្លាំងនគរបាលចុះជួយសង្គ្រោះប្រជាពលរដ្ឋដោយសារទឹកជំនន់។
ក្នុងបេសកកម្មជួយសង្គ្រោះប្រជាពលរដ្ឋនៅថ្ងៃទី១១ ខែសីហា ឆ្នាំ២០២៤ លោកឧត្តមសេនីយ៍ឯក លៀង ភារម្យ ក៏បានសួរសុខទុក្ខកម្លាំងនគរបាលការពារព្រំដែន ដែលកំពុងឈរជើងនៅតំបន់ត្រពាំងពើក ស្ថិតក្នុងស្រុកជាំក្សាន្ដ ខេត្តព្រះវិហារ ដែលមានព្រំដែនជាប់ជាមួយប្រទេសឡាវផងដែរ។
ក្នុងឱកាសនោះ លោកឧត្តមសេនីយ៍ឯក ប្រធាននាយកដ្ឋានកណ្ដាលនគរបាលព្រំដែន ក៏បាននាំនូវការផ្ដាំផ្ញើសាកសួរសុខទុក្ខពីសំណាក់ នាយឧត្តមសេនីយ៍ ស ថេត និងនាយឧត្តមសេនីយ៍ ខេង សុមេធ ជូនដល់កងកម្លាំងនគរបាលការពារព្រំដែនទាំងអស់ ដោយក្ដីនឹករលឹក និងស្ញប់ស្ញែងចំពោះវីរៈភាពនៃការបំពេញការងារប្រកបដោយការទទួលខុសត្រូវខ្ពស់ ដើម្បីការពារបូរណភាពទឹកដីរបស់កម្ពុជា។
បន្ថែមពីនេះ លោកក៏បានពិនិត្យស្ថានភាពតាមបន្ទាត់ព្រំដែន និងការរស់នៅប្រចាំថ្ងៃរបស់កងកម្លាំងផងដែរ។ លោកបានក្រើនរំលឹកដល់កងកម្លាំងទាំងអស់ ត្រូវបង្កើននូវស្មារតីប្រុងប្រយ័ត្ន ដោយសារតែរដូវវស្សាមានទឹកជន់ ហើយត្រូវត្រៀមលក្ខណៈបន្ដទៀតដើម្បីជួយសង្គ្រោះប្រជាពលរដ្ឋ ដែលរងគ្រោះដោយសារគ្រោះធម្មជាតិ៕
