អាជ្ញាធរខេត្តដឹកនាំយុវជន និងសិស្សានុសិស្សដាំកូនក្ងោកប្រមាណ ២០០ដើម តាមដងផ្លូវ៣៨ខ្សែ ក្នុងក្រុងសៀមរាប ជំរុញភាពបៃតងតាមដងផ្លូវ
ភ្នំពេញ៖ នៅថ្ងៃទី៩ ខែសីហា ឆ្នាំ២០២៤នេះ លោក យុន លីនណេ អភិបាលរងខេត្ដសៀមរាប បានបន្តដឹកនាំយុវជន និងសិស្សានុសិស្ស ដោយមានការចូលរួមពីវិស័យឯកជនជាច្រើននាក់ រួមគ្នាដាំកូនឈើប្រភេទដើមក្ងោកប្រមាណ ២០០ដើម នៅតាមដងផ្លូវ ៣៨ខ្សែក្នុងក្រុងសៀមរាប ដើម្បីជាការជំរុញ និងលើកសោភ័ណ្ឌភាពតំបន់ទេសចរណ៍ និងបង្កើតភាពបៃតងនៅតាមដងផ្លូវក្នុងក្រុងទាំងមូល។
លោក យុន លីនណេ បានបញ្ជាក់ថា ដើមឈើមានតួនាទីសំខាន់ណាស់ ក្នុងការជួយលើកកម្ពស់ភាពបៃតងក្នុងមូលដ្ឋាន ក៏ដូចជាបង្កើនភាពទាក់ទាញដល់ភ្ញៀវទេសចរថែមទៀតផង។ ជាមួយគ្នានេះ ព្រៃឈើក៏បានផ្ដល់នូវសេវាកម្ម និងជួយគាំពារផ្នែកបរិស្ថានជាច្រើនទៀត ដូចជាការការពារទីជម្រាល ទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី កាត់បន្ថយបម្រែបម្រួលអាកាសធាតុ។ ចំពោះការដាំកូនឈើតាមដងផ្លូវក្នុងក្រុងសៀមរាប មានចំនួន៤១ខ្សែ នៅចិញ្ចើមផ្លូវមានក្រាលការ៉ូឡា និងផ្លូវមិនមានក្រាលការ៉ូឡា ដែលអាជ្ញាធរខេត្តគ្រោងនឹងដាំកូនឈើចម្រុះឱ្យបាន ២៤.០០០ដើម ក្នុថរយៈពេល២ឆ្នាំ ដែលមកដល់ពេលនេះការដាំដើមឈើក្នុងក្រុងបានជាង ១០.០០០ដើមរួចហើយ ដោយក្នុងនោះមានដើមឈើធំៗជិត៦.០០០ដើម និងដើមឈើតូចៗបានជិត ១០.០០០ដើម។
លោក យុន លីនណេ បញ្ជាក់ទៀតថា ការដាំដើមឈើទាំងអស់មិនត្រឹមតែមានដើមឈើប្រណិតទេ ថែមទាំងមានប្រភេទដើមដែលមានផ្កា ដូចជា ដើមរំដួល ដើមត្របែកព្រៃ ឬដើមក្ងោកជាដើម ដែលអាចលូតលាស់ និងមានផ្កាទៅតាមរដូវកាល ដែលធ្វើឱ្យទីក្រុងមានភាពរស់រវើកគ្រប់រដូវកាល។ ជាមួយគ្នានេះ ក៏សូមឱ្យបងប្អូនប្រជាពលរដ្ឋ និងបណ្តាក្រុមហ៊ុនទាំងអស់ ដែលនៅអមសងខាងផ្លូវសូមចូលរួមថែទាំ ស្រោចទឹក ដាក់ជីចំពោះដើមឈើដែលមាននៅមុខគេហដ្ឋាន ឬក្រុមហ៊ុនរបស់ខ្លួន ដើម្បីឱ្យដើមឈើទាំងនោះលូតលាស់បានល្អ ជួយលើកកម្ពស់សោភ័ណភាពក្រុងសៀមរាប ឱ្យកាន់តែស្រស់ស្អាតបន្ថែមទៀត។ ជាពិសេស ក៏សូមអំពាវនាវដល់អាជ្ញាធរមូលដ្ឋាន យុវជន ប្រជាពលរដ្ឋ វិស័យឯកជន ក្រុមហ៊ុន អង្គការក្រៅរដ្ឋាភិបាល ចូលដាំកូនឈើឱ្យបានច្រើនស្របតាមគោលការណ៍របស់រាជរដ្ឋាភិបាល។
លោកអភិបាលរងខេត្ត ក៏បានបញ្ជាក់បន្ថែមថា អាជ្ញាធរខេត្តសៀមរាប ដោយមានការសហការជាមួយអ្នកពាក់ព័ន្ធ និងវិស័យឯកជន បានធ្វើយុទ្ធនាការដាំកូនឈើ១៧ប្រភេទ បានជាង៤០.០០០ដើមហើយ ដោយមិនគិតដើមឈើហូបផ្លែដែលបានចែកជូនប្រជាពលរដ្ឋនៅក្នុងខេត្ដសៀមរាប។ ហើយដើមឈើដែលផ្ដល់សម្រស់ដូចដើមឈើផ្កា ត្រូវបានដាំតាមដងផ្លូវសំខាន់ៗនៅក្នុងក្រុងសៀមរាប ហើយនឹងបន្ដសហការជាមួយអ្នកពាក់ព័ន្ធ វិស័យឯកជន បណ្ដាក្រុមហ៊ុន នឹងបន្ដដាំកូនឈើឱ្យបានតាមតម្រូវការរបស់រដ្ឋបាលខេត្ដសៀមរាប៕
