ក្រុងគែរ៖ គណៈប្រតិភូសន្តិសុខអ៊ីស្រាអែល បានមកដល់ទីក្រុងគែរកាលពីថ្ងៃសៅរ៍ដើម្បីបន្តកិច្ចចរចាបទឈប់បាញ់នៅតំបន់ហ្គាហ្សា នេះបើយោងតាមប្រភពពីប្រទេសអេហ្ស៊ីបដែលមានព័ត៌មានបានប្រាប់ស៊ីនហួ។
ប្រភពបានឲ្យដឹងថា គណៈប្រតិភូអ៊ីស្រាអែល ដែលរួមមានប្រធានទីភ្នាក់ងារសន្តិសុខអ៊ីស្រាអែល (ISA) និងសេវាស៊ើបការណ៍សម្ងាត់អ៊ីស្រាអែល Mossad បានមកដល់ទីក្រុងគែររួចហើយ ហើយបានចាប់ផ្តើមកិច្ចពិភាក្សាជាមួយភាគីអេហ្ស៊ីប។
យោងតាមប្រភព កិច្ចពិភាក្សាផ្តោតលើបទឈប់បាញ់នៅតំបន់ហ្គាហ្សា ស្ថានភាពនៅច្រករបៀង Philadelphia រវាងប្រទេសអេហ្ស៊ីប និងហ្គាហ្សា និងការបិទច្រកព្រំដែន Rafah។
នេះជាគណៈប្រតិភូអ៊ីស្រាអែលដំបូងគេដែលទៅបំពេញទស្សនកិច្ចនៅអេហ្ស៊ីប ចាប់តាំងពីមានការធ្វើឃាតលោក Ismail Haniyeh ប្រធានការិយាល័យនយោបាយរបស់ក្រុម Hamas កាលពីថ្ងៃពុធ នៅក្នុងរដ្ឋធានី Tehran ប្រទេសអ៊ីរ៉ង់។ ក្រុមហាម៉ាស់បានចោទប្រកាន់អ៊ីស្រាអែលថាបានអនុវត្តការធ្វើឃាតនេះ។
ចាប់តាំងពីជម្លោះហ្គាហ្សាបានផ្ទុះឡើងក្នុងខែតុលា ឆ្នាំ២០២៣ អេហ្ស៊ីប រួមជាមួយនឹងអ្នកសម្រុះសម្រួលពីសហរដ្ឋអាមេរិក និងកាតា បាននិងកំពុងធ្វើការដើម្បីសម្របសម្រួលកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាស់ ដែលជាស្ថាប័នគ្រប់គ្រងនៅតំបន់ហ្គាហ្សា។
ជុំចុងក្រោយនៃការចរចាបទឈប់បាញ់ក្នុងចំណោមមន្ត្រីជាន់ខ្ពស់មកពីអ៊ីស្រាអែល កាតា អេហ្ស៊ីប និងសហរដ្ឋអាមេរិកបានពន្យារពេលកាលពីចុងសប្តាហ៍មុន ប៉ុន្មានម៉ោងបន្ទាប់ពីវាបានចាប់ផ្តើមនៅទីក្រុងរ៉ូម ដោយមិនមានការរីកចំរើនជាក់ស្តែង។
អ៊ីស្រាអែលបានបើកការវាយលុកទ្រង់ទ្រាយធំប្រឆាំងនឹងក្រុមហាម៉ាសនៅតំបន់ហ្គាហ្សាស្ទ្រីប ដើម្បីសងសឹកនឹងការវាយលុករបស់ក្រុមហាម៉ាស់ឆ្លងកាត់ព្រំដែនភាគខាងត្បូងអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១,២០០នាក់ត្រូវបានសម្លាប់ និងជាង ២៥០នាក់ត្រូវបានចាប់ធ្វើជាចំណាប់ខ្មាំង។
ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនជាង ៣៩.០០០នាក់ និងរបួសជាង ៩០.០០០នាក់ផ្សេងទៀត។
អ៊ីស្រាអែលប៉ាន់ប្រមាណថាមានអ្នកជាប់ឃុំជនជាតិអ៊ីស្រាអែលប្រហែល ១៣៤នាក់នៅក្នុងតំបន់ហ្គាហ្សា ខណៈដែលក្រុមហាម៉ាស់បានប្រកាសថា ៧០នាក់ក្នុងចំណោមពួកគេត្រូវបានសម្លាប់នៅក្នុងការវាយឆ្មក់របស់អ៊ីស្រាអែលដោយចៃដន្យ។
