លោកជំទាវ គឹម សេដ្ឋានី អញ្ជើញសម្ពោធដាក់ឱ្យប្រើប្រាស់ជាផ្លូវការ បង្គន់អនាម័យនិងបរិក្ខាលាងសម្អាតដៃ សាលាបឋមសិក្សា ឃ្លាំង ទ្រា នាគរង្សី និងវិទ្យាល័យបាភ្នំ ស្រុកបាភ្នំ
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ នៃក្រសួងអប់រំ យុវជន និងកីឡា នាថ្ងៃ២៥ ខែកក្កដា ឆ្នាំ២០២៤ បានចូលរួមពិធីសម្ពោធដាក់ឱ្យប្រើប្រាស់ជាផ្លូវការ បង្គន់អនាម័យនិងបរិក្ខាលាងសម្អាតដៃ សាលាបឋមសិក្សា ឃ្លាំង ទ្រា នាគរង្សី និងវិទ្យាល័យបាភ្នំ ស្រុកបាភ្នំ ខេត្តព្រៃវែង និងមានការចូលរួមពី លោកជំទាវ វេជ្ជបណ្ឌិត Devyani Khobragade ឯកអគ្គរដ្ឋទូតឥណ្ឌាប្រចាំប្រទេសកម្ពុជា ប្រធានមន្ទីរអប់រំ យុវជន និងកីឡាខេត្តព្រៃវែង ឯកឧត្តម លោកជំទាវថ្នាក់ដឹកនាំក្រោមឱវាទ នាយក នាយិកា លោកគ្រូ អ្នកគ្រូ សិស្សានុសិស្ស និងមន្ត្រីពាក់ព័ន្ធក្រោមឱវាទក្រសួង។
មានប្រសាសន៍ក្នុងឱកាសនេះ លោកជំទាវ រដ្ឋលេខាធិការប្រចាំការ បានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលនៃសាធារណរដ្ឋឥណ្ឌា ដែលបានជួយឧបត្ថម្ភគាំទ្រលើវិស័យអប់រំនៅកម្ពុជាកន្លងមក ជាពិសេសការផ្តល់ជំនួយដល់ខេត្តព្រៃវែងដែលរួមមានសាលាបឋមសិក្សាឃ្លាំង ទ្រា នាគរង្សី និងវិទ្យាល័យបាភ្នំនេះ និងបានកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំ និងមន្ត្រីនាយកដ្ឋានសុខភាពសិក្សា ដែលបានយកទុកដាក់អស់ពីកម្លាំងកាយចិត្ត ក្នុងការសហការសម្របសម្រួលជាមួយមន្ទីរអប់រំ យុវជន និងកីឡាខេត្តព្រៃវែងក្នុងការដំណើរការកម្មវិធីនិងរៀបចំពិធីសម្ភោធនេះឡើង ប្រកបដោយភាពជោគជ័យ។
ក្នុងឱកាសនេះ លោកជំទាវ រដ្ឋលេខាធិការប្រចាំការ បានលើកឡើងថា ការអនុវត្ត“គម្រោងអនាម័យនៅតាមសាលារៀន” គឺជាការចូលរួមក្នុងការកាត់បន្ថយអត្រាឆ្លងជំងឺផ្សេងៗ ជាពិសេសកាត់បន្ថយអត្រាការបោះបង់ការសិក្សា។ ការអប់រំពីអនាម័យជាប្រចាំនៅតាមសាលារៀន នឹងធ្វើឱ្យកុមារមានការផ្លាស់ប្តូរទៅរករបៀបរស់នៅដែលមានអនាម័យល្អប្រសើរនៅតាមគ្រួសារ ជៀសវាងជំងឺប្រឈមផ្សេងៗ។
បន្ថែមពីនេះ លោកជំទាវ រដ្ឋលេខាធិការប្រចាំការ បានលើកទឹកចិត្តឱ្យក្រុមការងារ និងអ្នកពាក់ព័ន្ធទាំងអស់ បន្តជំរុញការបំពាក់សម្ភារៈ រូបវ័ន្តផ្នែកអនាម័យដូចជាបង្គន់ បន្ទប់ទឹក កន្លែងលាងសម្អាតដៃ និងប្រព័ន្ធទឹកស្អាត ឱ្យបានគ្រប់សាលារៀនក្រោមឱវាទរបស់ខ្លួន និងចាត់តាំងឱ្យសិស្សអនុវត្តការលាងសម្អាតដៃនិងដុសធ្មេញនៅគ្រប់វេនសិក្សា។ ទន្ទឹមនឹងនេះផងដែរ អាណាព្យាបាល ឬមាតាបិតាសិស្សក៏ត្រូវចូលរួមជំរុញកូនចៅរបស់ខ្លួនឱ្យ អនុវត្តការលាងសម្អាតដៃនិងដុសធ្មេញនេះឱ្យបានគ្រប់ៗគ្នានៅតាមគ្រួសាររៀងៗខ្លួន។
សារជាថ្មីម្តងទៀត លោកជំទាវ រដ្ឋលេខាធិការប្រចាំការ បានថ្លែងអំណរគុណចំពោះអង្គភាពពាក់ព័ន្ធទាំងអស់ ដែលបានខិតខំប្រឹងប្រែងអភិវឌ្ឍវិស័យអប់រំ ជាពិសេសផ្នែកសុខភាពសិក្សារបស់សិស្ស និងរដ្ឋាភិបាលឥណ្ឌា ដែលតែងតែយកចិត្តទុកដាក់ ជួយគាំទ្រដល់ក្រសួងអប់រំ
យុវជន និងកីឡាកន្លងមក ក៏ដូចជាផ្តល់ការគាំទ្រដល់គម្រោងថ្មីពីរបន្ថែមទៀតទាក់ទងនឹងផ្នែកទឹកស្អាតនិងអនាម័យ ដើម្បីឆ្លើយតបទៅនិងបម្រែបម្រួលអាកាសធាតុ ពិសេសភាពធននៃការប្រើប្រាស់បរិក្ខាអនាម័យនៅតាមសាលារៀន៕
