ឧត្តមសេនីយ៍ឯក បណ្ឌិត តុប នេត ដឹកនាំកិច្ចប្រជុំពិភាក្សាអំពីការត្រៀមរៀបចំសិក្ខាសាលា ស្ដីពីការអនុវត្តការងារអត្តសញ្ញាណកម្ម

ភ្នំពេញ៖ នៅព្រឹកថ្ងៃពុធ ៤រោច ខែអាសាឍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៤ ខែកក្កដា ឆ្នាំ២០២៤ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានអញ្ជើញកិច្ចប្រជុំពិភាក្សាអំពីការត្រៀមរៀបចំសិក្ខាសាលា ស្ដីពីការអនុវត្តការងារអត្តសញ្ញាណកម្ម ស្របតាមច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម និងគម្រោងរៀបចំផែនការយុទ្ធសាស្ត្រជាតិស្ដីពីអត្តសញ្ញាណកម្ម ដំណាក់កាលទី២។

ក្នុងកិច្ចប្រជុំនេះ ក៏មានការអញ្ជើញចូលរួមពី ឯកឧត្តម អគ្គនាយករង លោកប្រធាននាយកដ្ឋាន លោក លោកស្រីអនុប្រធាននាយកដ្ឋាន ព្រមទាំងលោក លោកស្រីនាយ/ប្រធានការិយាល័យ និងមន្រ្តីជំនាញដែលពាក់ព័ន្ធចំណុះអគ្គនាយកដ្ឋានអត្តសញ្ញាណកម្មផងដែរ។

ជាកិច្ចចាប់ផ្តើម ឯកឧត្តម បណ្ឌិត អគ្គនាយក មានមតិស្វាគមន៍ដល់ឯកឧត្តម អគ្គនាយករង លោក/លោកស្រីដែលជាតំណាងអង្គការដៃគូសហការណ៍ និងលោក/លោកស្រីទាំងអស់ដែលមានវត្តមាននៅទីនេះ កិច្ចប្រជុំថ្ងៃនេះគឺធ្វើឡើងក្នុងគោលបំណងធ្វើយ៉ាងណាឱ្យការរៀបចំសិក្ខាសាលា ស្ដីពីការអនុវត្តការងារអត្តសញ្ញាណកម្ម ស្របតាមច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម និងគម្រោងរៀបចំផែនការយុទ្ធសាស្ត្រជាតិស្ដីពីអត្តសញ្ញាណកម្ម ដំណាក់កាលទី២ ប្រព្រឹត្តទៅឱ្យបានសមស្របទៅតាមលក្ខខណ្ឌ ការងារពិធីការ ខ្លឹមសារ និងលំហូរនៃរបៀបវារៈនីមួយៗ ឱ្យបានជាក់លាក់ និងមានភាពល្អប្រសើរតាំងពីពេលចាប់ផ្តើមរហូតដល់ចប់កម្មវិធី។

បន្ទាប់មកដោយទទួលបានការអនុញ្ញាតពីឯកឧត្តម បណ្ឌិត អគ្គនាយក ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង និងជាអនុប្រធានប្រចាំការក្រុមការងាររៀបចំសិក្ខាសាលា បានធ្វើសេចក្តីរាយការណ៍ដោយសង្ខេបអំពីលទ្ធផលដែលបានប្រជុំរបស់ក្រុមលេខាធិការដ្ឋាន និងលើកសំណើរមួយចំនួនដែលពាក់ព័ន្ធដល់កិច្ចដំណើរការក្នុងការរៀបចំសិក្ខាសាលាជូនឯកឧត្តម បណ្ឌិត អគ្គនាកយក ពិនិត្យ និងសម្រេច ៕