សម្តេចរដ្ឋសភាធិបតី ឃួន សុដារី ចាត់តំណាងនាំយកទៀនវស្សា និងទេយ្យទាន ព្រមទាំងបច្ច័យមួយចំនួន ប្រគេនព្រះសង្ឃគង់ចាំព្រះវស្សានៅវត្តវិមានតេជៈ (វត្តស្រះចក)
ភ្នំពេញ៖ លោកជំទាវ ឃួន វីឡាវណ្ណ ទីប្រឹក្សាសម្តេចប្រធានរដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និងក្រុមគ្រួសារ ព្រមទាំងសហការី នាព្រឹកថ្ងៃទី២១ ខែកក្កដា ឆ្នាំ២០២៤ បានអញ្ជើញនាំយកទៀនវស្សា និងទេយ្យទាន ព្រមទាំងបរិក្ខារ និងបច្ច័យមួយចំនួន ប្រគេនព្រះសង្ឃដែលគង់ចាំព្រះវស្សា នៅវត្តវិមានតេជៈ (វត្តស្រះចក) រាជធានីភ្នំពេញ។
ក្នុងវេលាដ៏សែនរីករាយ និងប្រកបដោយសទ្ធាជ្រះថ្លានាព្រឹកនោះ លោកជំទាវ ទីប្រឹក្សា និងក្រុមគ្រួសារ បានអញ្ជើញថ្វាយនូវគ្រឿងសក្ការៈបូជា ទៀន ធូប ផ្កាភ្ញី ចំពោះព្រះរតនត្រ័យ និងបានសមាទានសីល ស្តាប់ព្រះសង្ឃសម្ដែងព្រះធម៌ទេសនា និងចម្រើនព្រះបរិត្ត។
នៅក្នុងឱកាសនោះ លោកជំទាវ ឃួន វីឡាវណ្ណ បាននាំនូវទេយ្យទាន និងបច្ច័យរបស់សម្តេចរដ្ឋសភាធិបតី ប្រគេនព្រះសង្ឃ រួមមាន ទៀនព្រះវស្សា និងទេយ្យទានជាច្រើនមុខ សរុបជាទឹកប្រាក់ ១៩ លាន និង ៦០ម៉ឺនរៀល។
ជារៀងរាល់ឆ្នាំ សម្តេចរដ្ឋសភាធិបតី ជាពុទ្ធសាសនូបត្ថម្ភក៍ និងជាអ្នកទ្រទ្រង់សាសនាប្រកបទឹកចិត្តជ្រះថ្លាជាទីបំផុត តែងតែរៀបចំទៀនព្រះវស្សា និងទេយ្យទានប្រគេនព្រះសង្ឃគង់តាមទីអារាមនានានៅពេលបុណ្យចូលកាន់ព្រះវស្សាមកដល់។ នេះបង្ហាញពីការយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋ ពីសុខុមាលភាពរបស់ព្រះសង្ឃ និងអ្នកដែលស្នាក់អាស្រ័យនៅក្នុងវត្ត តាមរយៈការចូលរួមចំណែកលើកស្ទួយវិស័យព្រះពុទ្ធសាសនាឱ្យមានការរីកចម្រើន៕
