ឯកឧត្តម រាជ រ៉ា ដឹកនាំកិច្ចប្រជុំផ្សព្វផ្សាយតួនាទី និងភារកិច្ចក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ និងប្រព័ន្ធទទួលទូរស័ព្ទសាធារណៈ១២៦៦ របស់ក្រសួងពាណិជ្ជកម្ម

ភ្នំពេញ៖ ឯកឧត្តម រាជ រ៉ា រដ្ឋលេខាធិការ និងជាអនុប្រធាន អចិន្ត្រៃយ៍នៃក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ នៃក្រសួងពាណិជ្ជកម្ម នាថ្ងៃទី១២ ខែកក្កដា ឆ្នាំ២០២៤ បានអញ្ជើញដឹកនាំកិច្ចប្រជុំផ្សព្វផ្សាយអំពីតួនាទី និងភារកិច្ចក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ និង ប្រព័ន្ធទទួលទូរស័ព្ទសាធារណៈ ១២៦៦ របស់ក្រសួងពាណិជ្ជកម្ម ដើម្បីផ្សព្វផ្សាយអំពីតួនាទី និងភារកិច្ចក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ និង ប្រព័ន្ធទទួលទូរស័ព្ទសាធារណៈ ១២៦៦ ជូនស្ថាប័ន្ធពាក់ព័ន្ធក្រោមឱវាទក្រសួងពាណិជ្ជកម្ម សំដៅពង្រឹកការផ្សព្វផ្សាយព័ត៌មានលើប្រពន្ធផ្សព្វផ្សាយរបស់ក្រសួងពាណិជ្ជកម្មឱ្យកាន់តែមានប្រសិទ្ធភាពខ្ពស់។

កិច្ចប្រជុំនេះ រៀបចំឡើងដោយផ្ទាល់ និងតាមប្រព័ន្ធអនឡាញ ដែលមានការអញ្ជើញចូលរួមពី ឯកឧត្តម លោក លោកស្រី ជាអនុប្រធាន និងសមាជិកសមាជិកានៃក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ ព្រមទាំងតំណាងស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជាប្រចាំប្រទេសស្វ៊ីស អនុព័ន្ធពាណិជ្ជកម្មអមស្ថានទូតនានា អគ្គនាយកដ្ឋាន មន្ទីររាជធានីខេត្ត និងសាខាការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) និងតំណាងក្រសួងពាណិជ្ជកម្មប្រចាំនៅរដ្ឋបាលតំបន់សេដ្ឋកិច្ចពិសេសជាច្រើនរូប។

ក្នុងឱកាសនោះ ក៏មានការធ្វើបទបង្ហាញអំពីតួនាទី និងភារកិច្ចរបស់ក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈដោយ ឯកឧត្តម សំ សិទ្ធិស័ក្តិ អនុរដ្ឋលេខាធិការនិងជាអនុប្រធានក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ និងបទបង្ហាញអំពីប្រព័ន្ធទទួលទូរស័ព្ទសាធារណៈលេខ១២៦៦ ដោយ លោកសី ផល យីតា អនុប្រធានវិទ្យាស្ថាន និងជាសមាជិកានៃក្រុមការងារព័ត៌មាន ផ្សព្វផ្សាយ និងទំនាក់ទំនងសាធារណៈ ព្រមទាំងការពិភាក្សា និងផ្លាស់ប្ដូរមតិយោបល់របស់សមាជិកសមាជិកានៃអង្គប្រជុំ ផងដែរ។

មានមតិបូករុបបិទកិច្ចប្រជុំ ឯកឧត្តម រាជ រ៉ា បានផ្តល់អនុសាសន៍ផ្តាំផ្ញើដល់អង្គប្រជុំចំនួន៣ចំណុច៖១.)សូមផ្តល់រូបភាព និងខ្លឹមសារមកកាន់ក្រុមការងារព័ត៌មាន និងផ្សព្វផ្សាយ និងទំនាក់ទំនងសាធារណៈឱ្យបានទាន់ពេលវេលា ដើម្បីក្រុមការងារធ្វើការផ្សព្វតាមបណ្តាញព័ត៌មានរបស់ក្រសួងពាណិជ្ជកម្ម ២.)សូមសហការក្នុងការផលិតមាតិកាព័ត៌មាន និងវីដេអូខ្លីៗដើម្បីផ្សព្វផ្សាយ ៣.)សូមចូលរួមផ្សព្វផ្សាយឱ្យបានកាន់តែទូលំទូលាយអំពីប្រព័ន្ធទូរស័ព្ទសារធាណៈលេខ ១២៦៦ ឱ្យបានកាន់តែទូលំទូលាយដល់សាធារណជន និងអ្នកធុរកិច្ច ៕