សម្តេចធិបតី៖ ការគិតគូរពីជីវភាពគ្រូបង្រៀនមិនមែនគិតតែ ដំឡើងប្រាក់បៀវត្សរ៍ទេគឺត្រូវគិតគូរពីការសម្រាលបន្ទុកចំណាយរបស់គ្រូបង្រៀន
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ដើម្បីលើកកម្ពស់ជីវភាពរបស់នៅរបស់គ្រូបង្រៀន មិនមែនគិតតែដំឡើងប្រាក់បៀវត្សរ៍នោះទេ គឺត្រូវគិតគូរពីការសម្រាលបន្ទុកចំណាយតាមរយៈការផ្តល់នូវបេឡាសន្តិសុខសង្គម សម្រាប់ព្យាបាលជំងឺ និងពិនិត្យសុខភាព។
ក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់អគារ ស្នាក់នៅរបស់គ្រូ ព្រមទាំងប្រគល់សញ្ញបត្រជូនគរុសិស្ស-និស្សិត នៅវិទ្យាស្ថានគរុកោសល្យរាជធានីភ្នំពេញ នាថ្ងៃទី៤ ខែកក្កដា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបន្តថា ការគិតគូរបង្កើនគុណវុឌ្ឍិគ្រូ និងការបង្កើនវិជ្ជាជីវៈរបស់លោកគ្រូ អ្នកគ្រូ ដែលបានដាក់ចេញច្បាស់លាស់ ទើបរដ្ឋចាយថវិកាត្រូវគោលដៅអត់ខ្ជីខ្ជា សម្រាប់ពង្រីងវិស័យអប់រំនៅកម្ពុជា។ ហើយតម្រូវការគឺមិនអាចធ្វើគ្រប់នោះទេ មានន័យថាតម្រូវការពីមួយថ្ងៃទៅមួយថ្ងៃ មានការកើនឡើងតាមការវិវត្តន៍របស់សង្គមជាតិជាក់ស្តែង។
សម្តេចធិបតី ហ៊ុន ម៉ាណែត បញ្ជាក់ថា «ការគិតគូរពីជីវភាពរស់នៅរបស់គ្រូបង្រៀន ជាពិសេសបៀវត្សរ៍ ប៉ុន្តែ ដោះស្រាយបៀវត្សរ៍មិនមែន ជាគោលទេតែមួយប៉ុណ្ណោះ ការបន្ធូរចំណាយតាមរយៈការផ្តល់នូវបេឡាសន្តិសុខសង្គម សម្រាប់សុខភាព ការជួយលោកអ្នគ្រូមានផ្ទៃពោះ ក៏យើងគិតគូរទៅលើកិច្ចការងារនេះ»។
សម្តេចធិបតី បន្ថែមថា ការគិតគូរពីប្រាក់តំបន់ និងការគិតគូរផ្សេងៗទៀត បន្ថែមទៅលើប្រាក់បៀវត្សរ៍សម្រាប់លោកគ្រូ អ្នកគ្រូ គឺជារឿងសំខាន់។ សម្តេចបានចាត់ទុកអាជីពជាគ្រូពេទ្យ និងគ្រូបង្រៀន គឺជាការលះបង់ខ្ពស់ប្រកបដោយឆន្ទៈ មនសិការ ដើម្បីរួមចំណែកជួយដល់ជីវិតមនុស្ស និងការអភិវឌ្ឍធនធានមនុស្ស ហើយអ្នកចាប់យកអាជីពគ្រូបង្រៀន គឺមានការប្តេជ្ញាចិត្តខ្ពស់៕
