មន្ត្រីកាកបាទក្រហមកម្ពុជា ចុះសួរសុខទុក្ខ លោក លឹម ទូច មន្ត្រីនៃអង្គភាពស៊ីម៉ាក់រងគ្រោះដាក់ដៃទាំងពីរ ដោយសារផ្ទុះសម្បកគ្រាប់មិនទាន់ផ្ទុះ

ភ្នំពេញ៖ នៅថ្ងៃទី៣ ខែកក្កដា ឆ្នាំ២០២៤ ឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមន្តរាយកាកបាទក្រហមកម្ពុជា តំណាងដ៏ខ្ពង់ខ្បស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញចុះសួរសុខទុក្ខ លោក លឹម ទូច មន្ត្រីនៃអង្គភាពស៊ីម៉ាក់រងគ្រោះដាក់ដៃទាំងពីរ ដោយសារផ្ទុះសម្បកគ្រាប់មិនទាន់ផ្ទុះនៃគ្រាប់កាំភ្លើងធំ៧៦មម ដែលកំពុងសម្រាកព្យាបាលនៅក្នុងមន្ទីរបង្អែកខេត្តកំពង់ចាម ហើយហេតុការនេះកើតឡើងនៅថ្ងៃទី២៩ ខែមិថុនា ឆ្នាំ២០២៤ នៅក្នុងឃ្លាំងសុត្ថិភាពនៃបញ្ជាការដ្ឋានអង្គភាពស៊ីម៉ាក់ស្ថិតនៅក្នុងខេត្តត្បូងឃ្មុំ។

ជាមួយគ្នានេះដែរ ឯកឧត្តមវេជ្ជ. អ៊ុយ សំអាត បានជួបពិគ្រោះជាមួយលោកគ្រូ អ្នកគ្រូពេទ្យអំពីរបួសលោក លឹម ទូច និងសូមឱ្យលោកគ្រូអ្នកគ្រូពេទ្យបន្តការយកចិត្តទុកដាក់ព្យាបាល ព្រមទាំងលើកទឹកចិត្ត ខិតខំថែរក្សាសុខភាពឱ្យឆាប់ជាសះស្បើយ។

កិច្ចឆ្លើយតប លោក ពុត សម្បត្តិ ជាមន្ត្រីនៃអង្គភាពស៊ីម៉ាក់ តំណាងជនរងគ្រោះ បានថ្លែងអំណរគុណយ៉ាងជ្រាលជ្រៅបំផុតចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខរបស់ប្រជាពលរដ្ឋជួបការលំបាក ឬទទួលរងគ្រោះថ្នាក់ផ្សេងៗ ជាក់ស្តែងថ្ងៃនេះ សម្តេច បានចាត់ឱ្យសហការីចុះសួរសុខទុក្ខ និងនាំយកអំណោយជួយសម្រាលការលំបាកដល់ក្រុមគ្រួសាររងគ្រោះ និងសូមបួងសួងដល់វត្ថុស័ក្តិសិទ្ធិក្នុងលោក សូមតាមបីបាច់ថែរក្សា សម្តេច និងក្រុមគ្រួសារ សូមទទួលបាននូវព្រះពុទ្ធពរទាំងបួនប្រការ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕