សម្តេចធិបតី៖ ការដំឡើងប្រាក់សោធន ដល់អតីតយុទ្ធជនម្នាក់ ៥ម៉ឺនរៀល រដ្ឋាភិបាលត្រូវចំណាយក្នុង១ខែ ១លានដុល្លារ ឬក្នុង១ឆ្នាំជាង ១០លានដុល្លារ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាអនុប្រធានទី១ នៃសមាគមអតីតយុទ្ធជនកម្ពុជា បានថ្លែងបញ្ជាក់ថា ការដំឡើងប្រាក់សោធនដល់អតីតយុទ្ធជនម្នាក់ ៥ម៉ឺនរៀល រាជរដ្ឋាភិបាលចំណាយ ១លានដុល្លារក្នុង ១ខែ ស្មើនឹងមួយឆ្នាំ១០លានដុល្លារ។

ក្នុងឱកាសអញ្ជើញជាអធិបតីភាពអបអរសាទរខួបលើកទី ១៧ ទិវាអតីតយុទ្ធជនកម្ពុជា ២១មិថុនា នាថ្ងៃទី២៦ ខែមិថុនា ឆ្នាំ២០២៤ សម្ដេចធិបតី ហ៊ុន ម៉ាណែត បានបញ្ជាក់ថា «ពិតណាស់ គិតថាឡើង ៥ម៉ឺនរៀលមិនច្រើនសម្រាប់ម្នាក់ ប៉ុន្តែសម្រាប់ថវិកាជាតិរបស់យើងក្នុង ១០ម៉ឺននាក់ជាង អីចឹងបានន័យថា ក្នុង១ខែយើងចំណាយជាង ១លានដុល្លារ ឬ១ឆ្នាំជាង ១០លានដុល្លារ។ សួរថានេះ យើងមិនគិតគូរជីវភាពរបស់អតីតយុទ្ធជនទេ? គឺយើងរៀបចំគិតគូរជាប្រចាំជូន ដើម្បីធ្វើយ៉ាងណាជីវភាពរស់នៅរបស់ពួកគាត់ មិនត្រឹមតែគិតគូរ ពីប្រាក់របបសោធននោះទេ យើងគិតគូរទាំងរបបសម្រាប់គ្រួសារអតីតយុទ្ធជន ក្រៅពីនោះយើងបានធ្វើផ្ទះជូនថែមទៀត»។

សម្តេចធិបតីមានប្រសាសន៍ថា បច្ចុប្បន្នអតីតយុទ្ធសរុបចំនួន ១០ម៉ឺន៩ពាន់នាក់ ព្រមទាំងអ្នកនៅក្នុងបន្ទុក ១៤ម៉ឺន៩ពាន់នាក់ កំពុងទទួលប្រាក់របបគោលនយោបាយពីរដ្ឋ ដែលប្រាក់របបនេះ ត្រូវបានកែសម្រួលជាបន្តបន្ទាប់ តាមកំណើនសេដ្ឋកិច្ច និងដំឡើងប្រាក់បៀវត្សមូលដ្ឋានរបស់មន្ត្រីរាជការ កងកម្លាំងប្រដាប់អាវុធ។

សម្តេចថ្លែងថា ការកំណត់យកថ្ងៃ ២១ មិថុនាជារៀងរាល់ឆ្នាំ ប្រារព្ធពិធីអបអរសាទរ ទិវាអតីតយុទ្ធជនកម្ពុជា គឺដើម្បីជាការដឹងគុណូបការៈ ដ៏ឧត្តុងឧត្តមរបស់អតីតយុទ្ធជន បង្ហាញយុវជនជំនាន់ក្រោយ មិនថាប៉ុន្មានឆ្នាំទៅមុខទៀតត្រូវតែបន្តចងចាំ ៕