ឆ្នាំ២០២៤នេះ កសិករថ្មីចំនួន២៥គ្រួសារទៀតបានស្ម័គ្រចិត្តចូលរួមធ្វើស្រូវមិត្តក្រៀលដែលធ្វើឱ្យសមាជិករបស់សហគមន៍ស្រូវមិត្ដក្រៀលកើនឡើង១២០គ្រួសារ
ភ្នំពេញ៖ តាមរយៈបណ្ដាញសង្គមហ្វេសប៊ុក ក្រសួងបរិស្ថានបានបញ្ជាក់ថា ក្នុងឆ្នាំ២០២៤នេះកសិករថ្មីចំនួន២៥គ្រួសារផ្សេងទៀតបានស្ម័គ្រចិត្តចូលរួមធ្វើស្រូវមិត្តក្រៀលដែលធ្វើឱ្យសមាជិករបស់សហគមន៍ស្រូវមិត្ដក្រៀលកើនឡើង១២០គ្រួសារ និងមានផ្ទៃដីដាំដុះសរុប១៤៨ហិចតា។
អ្នកស្រី ឆេង សុវណ្ណា ដែលជាប្រធានក្រុមនៃសហគមន៍ស្រូវមិត្ដក្រៀលភូមិអន្លង់ព្រីង ក្នុងស្រុកកំពង់ត្រាច ខេត្តកំពត បានលើកឡើងថា កសិករភាគច្រើនដែលរស់នៅជុំវិញ តំបន់ការពារទេសភាពអន្លង់ព្រីង បានចាប់អារម្មណ៍និងចូលរួមជាមួយសមាជិក សហគមន៍ ស្រូវមិត្ដក្រៀល ដោយយល់ច្បាស់អំពីអត្ថប្រយោជន៍ ដែលពួកគាត់ទទួលបាន ពីគម្រោង និងសារៈសំខាន់នៃការចូលរួមអភិរក្សសត្វក្រៀល សម្រាប់សហគមន៍របស់ពួកគាត់ ទាំងមូល។
គួរបញ្ជាក់ផងដែរថាកសិករជាសមាជិក របស់សហគមន៍ស្រូវមិត្ដក្រៀល ត្រូវស្ម័គ្រចិត្តអនុវត្ត លក្ខខ័ណ្ឌទាំង១២ នៃគោលការណ៍ស្រូវមិត្កក្រៀលដែល មានចែងក្នុងកិច្ចសន្យា ដែលបានទទួលស្គាល់ ដោយអាជ្ញាធរមូលដ្ឋាន។
សូមបញ្ជាក់ថា កសិករដែលអនុវត្តតាមគោលការណ៍ បានត្រឹមត្រូវ និងទទួលបានការគាំទ្របច្ចេកទេស ដាំដុះ ជីសរីរាង្គ ពូជស្រូវនិងគម្រោងទទួលទិញស្រូវក្នុងតម្លៃខ្ពស់ជាងទីផ្សារ៕
