ឯកឧត្តមបណ្ឌិត កុលផេង វឌ្ឍនា អញ្ជេីញបេីកសិក្ខាសាលា ស្ដីពីវឌ្ឍនភាព ឧត្តមានុវត្តកម្មវិធីមគ្គុទ្ទេសក៍អាជីពនិងការផ្តល់ប្រឹក្សាកម្រិតមធ្យមសិក្សា

ភ្នំពេញ៖ ចាប់ពីថ្ងៃទី២៤ ដល់ថ្ងៃទី២៦ ខែមិថុនា ឆ្នាំ២០២៤ នាយកដ្ឋានតម្រង់ទិសវិជ្ជាជីវៈ សហការជាមួយអង្គការភ្លែនអន្តរជាតិកម្ពុជា បានរៀបចំសិក្ខាសាលាស្ដីពី “វឌ្ឍនភាព ឧត្តមានុវត្តកម្មវិធីមគ្គុទ្ទេសក៍អាជីពនិងការផ្តល់ប្រឹក្សាកម្រិតមធ្យមសិក្សា” នៅវិទ្យាល័យអង្គរ ខេត្តសៀមរាប។

សិក្ខាសាលានេះ ត្រូវបានប្រារព្ធកម្មវិធីបើកក្រោមអធិបតីភាព ឯកឧត្តមបណ្ឌិត កុលផេង វឌ្ឍនា អនុរដ្ឋលេខាធិការនៃក្រសួងអប់រំ យុវជន និងកីឡា ដោយមានការចូលរួមពីសំណាក់ថ្នាក់ដឹកនាំនាយកដ្ឋានជំនាញ តំណាងមន្ទីរអប់រំ យុវជន និងកីឡាខេត្ត តំណាងអង្គការភ្លែនអន្ដរជាតិកម្ពុជា គណៈគ្រប់គ្រង និងគ្រូប្រឹក្សាតាមសាលារៀននៃវិទ្យាល័យគោលដៅទាំង១៤ សរុប ៥០នាក់ ស្រី ១៨នាក់។

គោលបំណងនៃការរៀបចំសិក្ខាសាលានេះឡើង គឺដើម្បីចែករំលែកចំណេះដឹង បទពិសោធ វឌ្ឍនភាព ឧត្តមានុវត្តក្នុងការអនុវត្តកម្មវិធីមគ្គុទ្ទេសក៍អាជីព និងការផ្តល់ប្រឹក្សា រវាងសាលារៀន និងសាលារៀន និងជាផ្នែកមួយនៃការជួយលើកកម្ពស់សមត្ថភាពវិជ្ជាជីវៈជាបន្ត ជូនលោកគ្រូ អ្នកគ្រូប្រឹក្សាតាមសាលារៀន និងគណៈគ្រប់គ្រងវិទ្យាល័យគោលដៅទាំង១៤។

គួររំលឹកផងដែរថា នាយកដ្ឋានតម្រង់ទិសវិជ្ជាជីវៈ ក្រោមការគាំទ្រពីអង្គការភ្លែនអន្ដរជាតិកម្ពុជា បានអនុវត្តគម្រោង “ការលើកកម្ពស់ការអប់រំពេញមួយជីវិត តាមរយៈមគ្គុទ្ទេសក៍អាជីពនិងការផ្ដល់ប្រឹក្សា កម្រិតមធ្យមសិក្សា” ដែលត្រូវអនុវត្តចាប់ពីថ្ងៃទី០១ ខែកក្កដា ឆ្នាំ២០២៣ រហូតដល់ថ្ងៃទី៣០ ខែមិថុនា ឆ្នាំ២០២៤ ផ្ដោតលើគ្រឹះស្ថានមធ្យមសិក្សាគោលដៅចំនួន១៤ ស្ថិតក្នុងខេត្តសៀមរាប ខេត្តស្ទឹងត្រែង និងខេត្តរតនគិរី។ គម្រោងនេះ ផ្ដោតលើការពង្រីកការអនុវត្តកម្មវិធីមគ្គុទ្ទេសក៍អាជីព និងការផ្ដល់ប្រឹក្សា នៅកម្រិតមធ្យមសិក្សា និងការរៀបចំព្រឹត្តិការណ៍ពិព័រណ៍ការងារ និងការសិក្សា នៅតាមគ្រឹះស្ថានមធ្យមសិក្សាគោលដៅទាំង១៤ ដើម្បីផ្ដល់មូលដ្ឋានចំណេះដឹង និងការគាំទ្រដល់កុមារ និងក្មេងស្រីក្នុងខេត្តសៀមរាប ខេត្តស្ទឹងត្រែង និងខេត្តរតនគិរី ឱ្យទទួលបានសេវាអប់រំប្រកបដោយសមធម៌ ព្រមទាំងមានលទ្ធភាពកាន់តែប្រសើរក្នុងការរៀបចំផែនការសិក្សា និងកំណត់គោលដៅអាជីពរបស់ខ្លួនទៅថ្ងៃអនាគតបានសមរម្យ៕