ឯកឧត្តម ឈាង វុន អញ្ជើញជាអធិបតីក្នុងកម្មវិធី ធ្វើបទបង្ហាញស្តីពីរចនាសម្ព័ន្ធ តួនាទី និងភារកិច្ចរបស់ PBO នៃអគ្គលេខាធិការដ្ឋានព្រឹទ្ធសភា ជូនគណៈកម្មការទី២ នៃរដ្ឋសភា និងមន្ត្រីពាក់ព័ន្ធនៃរដ្ឋសភា
ភ្នំពេញ៖ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នាថ្ងៃទី២១ ខែមិថុនា ឆ្នាំ២០២៤ បានអញ្ជើញជាអធិបតីក្នុងកម្មវិធីធ្វើបទបង្ហាញស្តីពីរចនាសម្ព័ន្ធ តួនាទី និងភារកិច្ចរបស់នាយកដ្ឋានស្រាវជ្រាវថវិកា(PBO)នៃអគ្គលេខាធិការដ្ឋានព្រឹទ្ធសភា។
បទបង្ហាញនេះ មានការអញ្ជើញចូលរួមពី ឯកឧត្តមអនុប្រធាន លោកជំទាវលេខាធិការ ឯកឧត្តម លោកជំទាវ សមាជិក សមាជិកាគណៈកម្មការ និងមន្ត្រីពាក់ព័ន្ធនៃរដ្ឋសភា។
លោកជំទាវ សួន ពុធថាវី អគ្គនាយកនៃអគ្គនាយកដ្ឋានស្រាវជ្រាវ និងមន្រ្តីជំនាញPBO នៃអគ្គលេខាធិការដ្ឋានព្រឹទ្ធសភា បានធ្វើបទបង្ហាញថា នាយកដ្ឋានស្រាវជ្រាវថវិកា(PBO) មិនមែនជាអ្នកអនុវត្តថវិកាទេ គឺមានតួនាទី និងភារកិច្ចជាអ្នកសិក្សា ស្រាវជ្រាវ វិភាគ និងផ្តល់យោបល់លើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង និងសេចក្តីព្រាងច្បាប់ស្តីពីការទូទាត់ថវិកាប្រចាំឆ្នាំ ជូនដល់គណៈកម្មការទី២ និងសមាជិក សមាជិកាព្រឹទ្ធសភា ក្នុងនោះរួមមាន៖
-សិក្សា ស្រាវជ្រាវ វិភាគ និងវាយតម្លៃលើដំណើរការអនុវត្តច្បាប់ប្រព័ន្ធហិរញ្ញវត្ថុសាធារណៈ។
-សិក្សា ស្រាវជ្រាវ និងវិភាគលើក្របខ័ណ្ឌម៉ាក្រូសេដ្ឋកិច្ច ដោយធ្វើការប៉ាន់ស្មាន ព្យាករណ៍សេដ្ឋកិច្ច។
-សិក្សា ស្រាវជ្រាវ និងវិភាគលើប្រតិបត្តិការចំណូលចំណាយថវិកាជាតិ និងថ្នាក់ក្រោមជាតិ។
-វិភាគ និងវាយតម្លៃលើការវិវត្ត និងការគ្រប់គ្រងហិរញ្ញវត្ថុសាធារណៈ។
-វិភាគលើគោលនយោបាយថវិកា គោលនយោបាយសារពើពន្ធ និងកិច្ចសហប្រតិបត្តិការវិស័យហិរញ្ញវត្ថុ ក្នុងក្របខ័ណ្ឌតំបន់ និងពិភពលោក។
ក្រោយពីបានស្តាប់បទបង្ហាញ និងផ្លាស់ប្តូរយោបល់យ៉ាងផុលផុសរួចមក ឯកឧត្តម ឈាង វុន បានថ្លែងអំណរគុណចំពោះក្រុមការងារPBOព្រឹទ្ធសភា ដែលបានផ្តល់បទពិសោធដល់គណៈកម្មការទី២ និងមន្ត្រីពាក់ព័ន្ធរបស់រដ្ឋសភា។ ឯកឧត្តមបន្តថា ការងារPBOនេះ ស្ថាប័ននីតិប្បញ្ញត្តិ(ព្រឹទ្ធសភា និងរដ្ឋសភា) នឹងអនុវត្តន៍ស្របគ្នា ដោយផ្អែកលើច្បាប់ស្តីពីការគ្រប់គ្រងហិរញ្ញវត្ថុសាធារណៈ ៕
