លោកជំទាវ គឹម សេដ្ឋានី ប្រគល់វិញ្ញាបនបត្របញ្ជាក់ការសិក្សាថ្នាក់ទី៦ និងប្រគល់ពានរង្វាន់ បណ្ណសរសើរ លិខិតសរសើរ បញ្ចប់ឆ្នាំសិក្សា ២០២៣-២០២៤ នៃសាលាអាមេរិកាំងហ្គោលឌិនហ្គេត
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា នាថ្ងៃទី២០ ខែមិថុនា ឆ្នាំ ២០២៤ បានអញ្ជើញចូលរួមជាអធិបតីក្នុងពិធីប្រគល់វិញ្ញាបនបត្របញ្ជាក់ការសិក្សាថ្នាក់ទី៦ និងពិធីប្រគល់ពានរង្វាន់ បណ្ណសរសើរ លិខិតសរសើរ បញ្ចប់ឆ្នាំសិក្សា ២០២៣-២០២៤ នៃសាលាអាមេរិកាំងហ្គោលឌិនហ្គេត និងមានការចូលរួមពី គណៈគ្រប់គ្រង ឯកឧត្តម លោកជំទាវ នាយក នាយិកា លោកគ្រូ អ្នកគ្រូ មាតាបិតា អ្នកអាណាព្យាបាល លោក លោកស្រី និងសិស្សានុសិស្សសរុបប្រមាណ ៣៥០នាក់។
តាងនាមក្រសួងអប់រំ យុវជន និងកីឡា លោកជំទាវ រដ្ឋលេខាធិការប្រចាំការ សូមថ្លែងអំណរគុណចំពោះ ក្រុមប្រឹក្សាភិបាល គណៈគ្រប់គ្រង លោកគ្រូ អ្នកគ្រូ នៃសាលាអាមេរិកាំងហ្គោលឌិនហ្គេត ដែលបានខិតខំប្រឹងប្រែងក្នុងការចូលរួមសម្រេចនូវចក្ខុវិស័យ និងយុទ្ធសាស្ត្ររបស់រាជរដ្ឋាភិបាល ជាពិសេសចំពោះមាតាបិតា អ្នកអាណាព្យាបាលដែលបានខិតខំប្រឹងប្រែងក្នុងការវិនិយោគលើវិស័យអប់រំសម្រាប់បុត្រធីតាកន្លងមក ហើយក៏បានបញ្ជាក់ដែរថា គ្មានអ្វីដែលទទួលបានផលចំណេញជាងការវិនិយោគលើវិស័យអប់រំទេ ថ្វីដ្បិតតែការបណ្ដុះបណ្ដាលធនធានមនុស្សត្រូវប្រើរយៈពេលវែងឆ្ងាយ ហើយត្រូវប្រើនូវថវិកាច្រើន ប៉ុន្តែនេះគឺជាការវិនិយោគមួយដែលទទួលបានផលចំណេញច្រើនបំផុតលើសពីការវិនិយោគផ្សេងៗទៀត។
នៅក្នុងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកា
លទី៧ ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ការកសាងមូលធនមនុស្ស នៅតែជាអាទិភាពចម្បងបំផុត ក្នុងគោលបំណងសម្រេចបាននូវចក្ខុវិស័យក្នុងការប្រែក្លាយប្រទេសកម្ពុជាដែលបច្ចុប្បន្នជាប្រទេសដែលមានប្រាក់ចំណូលមធ្យមកម្រិតទាប ទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ក៏ដូចជាប្រទេសអភិវឌ្ឍឆ្នាំ២០៥០។
ឆ្លើយតបទៅនឹងយុទ្ធសាស្ត្របញ្ចកោណ និងចក្ខុវិស័យរបស់រាជរដ្ឋាភិបាល ក្នុងការអភិវឌ្ឍមូលធនមនុស្សនោះ ក្រសួងអប់រំ យុវជន និងកីឡា បានដាក់ចេញនូវគោលនយោបាយ ក៏ដូចជាទិសដៅកែទម្រង់អាទិភាពជាច្រើន ដើម្បីសម្រេចគោលដៅមួយចំនួនដូចខាងក្រោម៖
(១).បណ្តុះបណ្តាលឱ្យកុមារ យុវជនកម្ពុជាមានមនសិការស្នេហាជាតិ ទទួលខុសត្រូវខ្ពស់ ស្មោះត្រង់ និងមានមោទកភាពជាតិ ដើម្បីបង្កើតបាននូវសាមគ្គីភាព និងអត្តសញ្ញាណជាតិ។ នាពេលបច្ចុប្បន្ន អាទិភាពក្នុងកម្រិតនៃការអប់រំបឋមសិក្សាដែលជាការអប់រំដំបូង គឺក្រសួងមានគោលដៅពង្រឹងនូវការលើកកម្ពស់អំណានដំបូង ពោលគឺធ្វើយ៉ាងណាប្រើប្រាស់នូវវិធីសាស្ត្រដែលធ្វើឱ្យសិស្សចេះអាន ចេះសរសេរ និងចេះប្រើប្រាស់ភាសាខ្មែរច្បាស់ស្ទាត់ ពីព្រោះនៅក្នុងដំណាក់កាលដំបូងនៃការអប់រំនៅមត្តេយ្យ ឬបឋមសិក្សាពីថ្នាក់ទី១ ដល់ថ្នាក់ទី៦ នេះ គឺជាកត្តាកំណត់នៃការសិក្សារបស់សិស្សានុសិស្សគ្រប់រូប រហូតដល់បញ្ចប់ភូមិសិក្សានាពេលអនាគត។ ប្រសិនបើក្មួយៗអាចទទួលបាននូវការសិក្សាអំណានដំបូង និងគណិតដំបូង សិស្សានុសិស្សនឹងអាចចាប់យកជំនាញ STEM បច្ចេកវិទ្យា ការចេះភាសាច្បាស់ទាំងភាសាជាតិ និងភាសាអន្តរជាតិ ក៏ដូចជាមូលដ្ឋានគណិតវិទ្យា គឺមានសារៈសំខាន់ខ្លាំងក្នុងការសម្រេចនូវគោលដៅសម្រាប់សិស្សានុសិស្ស។
(២). ការអភិវឌ្ឍគ្រប់ជ្រុងជ្រោយដល់អ្នកសិក្សា ដើម្បីទទួលបានតុល្យភាពរវាងការអភិវឌ្ឍវិជ្ជាសម្បទា កាយសម្បទា ចរិយាសម្បទា និងបំណិនសម្បទាឆ្លុះបញ្ចាំងនូវភាពគ្រប់ជ្រុងជ្រោយនៃការអប់រំ។
(៣). ការផលិតនូវធនធានមនុស្សដែលមានចំណេះដឹង បំណិន និងសមត្ថភាពដែលស្របទៅតាមតម្រូវការ ការងារ អាចប្រកួតប្រជែងនៅថ្នាក់តំបន់ និងសកលោក កម្មវិធីសិក្សា (IB) ចាប់ពីកម្រិតមត្តេយ្យ រហូតដល់មធ្យមសិក្សាទុតិយភូមិដែលទទួលបានការអនុញ្ញាតផ្តល់នូវការសិក្សាកម្មវិធី (IB) នេះ ដែលជាកម្មវិធីមួយដែលទទួលស្គាល់ទូទាំងពិភពលោក ដែលបណ្ដុះនូវបំណិនទន់ ឬបំណិនសតវត្សរ៍ទី២១ ដែលធ្វើឱ្យសិស្សានុសិស្សមានសមត្ថភាពក្នុងការធ្វើការងារជាក្រុម ការទំនាក់ទំនង មានបំណិនសង្គម មានបំណិនផ្នែកបច្ចេកវិទ្យា មានការត្រិះរិះពិចារណា មានគំនិតផ្ដួចផ្ដើមថ្មី អាចចេះដោះស្រាយបញ្ហាផ្សេងៗដែលទាំងអស់នេះអាចប្រែក្លាយក្មួយៗទៅជាផ្នែកមួយនៃដំណោះស្រាយរបស់ប្រទេស របស់សង្គម និងរបស់ពិភពលោក។
សារជាថ្មីម្តងទៀត តាងនាមប្រសួងអប់រំ យុវជន និងកីឡា លោកជំទាវ រដ្ឋលេខាធិការប្រចាំការ ក៏បានថ្លែងអំណរគុណដល់ គណៈគ្រប់គ្រង ឯកឧត្តម លោកជំទាវ នាយក នាយិកា លោកគ្រូ អ្នកគ្រូ មាតាបិតា អ្នកអាណាព្យាបាល ទាំងអស់ដែលតែងតែចូលរួមចំណែកក្នុងការអនុវត្តផែនការយុទ្ធសាស្ត្រកំណែទម្រង់វិស័យអប់រំ កម្ពុជាឱ្យកាន់តែរីកចម្រើន៕
