ឯកឧត្តម ហ្សង់ ហ្វ្រង់ស្វ័រ តាន់៖ កម្ពុជា គ្រាន់តែសិក្សាពីគំរូខ្លាំងរបស់សិង្ហបុរី ប៉ុន្តែមិនយកតម្រាប់តាម១០០ភាគរយនោះទេ
ភ្នំពេញ៖ ឯកឧត្តម ហ្សង់ ហ្វ្រង់ស្វ័រ តាន់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានលើកឡើងថា ប្រទេសកម្ពុជា គ្រាន់តែសិក្សាអំពីគំរូខ្លាំងរបស់ប្រទេសសិង្ហបុរី ប៉ុន្តែកម្ពុជានឹងមិនយកតម្រាប់តាម១០០ភាគរយនោះទេ។ មូលហេតុដែលឯកឧត្តម ហ្សង់ ហ្វ្រង់ស្វ័រ តាន់ បានអះអាងយ៉ាងដូច្នេះ ដោយសារតែឯកឧត្តមយល់ឃើញថា សិង្ហបុរីជាសិង្ហបុរី ឯកម្ពុជាជាកម្ពុជា ដែលមានវប្បធម៌ អរិយធម៌ ប្រវត្តិសាស្ត្រ និងផ្នត់គំនិតប្រជាជនមិនដូចគ្នានោះទេ។ ការលើកឡើងរបស់ឯកឧត្តម ហ្សង់ ហ្វ្រង់ស្វ័រ តាន់ ធ្វើឡើងនៅក្នុងសន្និសីទសារព័ត៌មាន ស្តីពីលទ្ធផល នៃដំណើរបំពេញទស្សនកិច្ចផ្លូវការ នៅប្រទេសសិង្ហបុរី រយៈពេល២ថ្ងៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នៅព្រលានយន្តហោះអន្តរជាតិភ្នំពេញ នាល្ងាចថ្ងៃទី១៩ ខែមិថុនា ឆ្នាំ២០២៤នេះ។ ឯកឧត្តម ហ្សង់ ហ្វ្រង់ស្វ័រ តាន់ បានបញ្ជាក់ថា កម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត ច្បាស់ជាចាប់អារម្មណ៍ នេះជាការពិត ហើយច្បាស់ជាចង់រៀនសូត្រ ជុំវិញគំរូអភិវឌ្ឍនៃសាំងហ្គាព័រ ប៉ុន្តែកម្ពុជាគ្មានបំណងចង់ធ្វើតាមសាំងហ្គាព័រ១០០ភាគរយ គ្មានបំណងធ្វើតម្រាបតាមសាំងហ្គាព័រនោះទេ ពីព្រោះកម្ពុជាជាកម្ពុជា សិង្ហបុរីជាសិង្ហបុរី ប្រជាជនកម្ពុជាជាប្រជាជនកម្ពុជា ប្រជាជនសិង្ហបុរីជាប្រជាជនសិង្ហបុរី។ ឯកឧត្តមរដ្ឋមន្ត្រីប្រតិភូ បានបន្តថា វប្បធម៌ ប្រវត្តិសាស្ត្រ ផ្នត់គំនិតនៃប្រជាជនសិង្ហបុរី មិនដូចគ្នាទាល់តែសោះ នឹងវប្បធម៌ អរិយធម៌ និងប្រវត្តិសាស្ត្រកម្ពុជា ម្ល៉ោះហើយយើងអាចយកចំណុចខ្លាំងមកអនុវត្ត ប៉ុន្តែត្រូវចៀសវាង ហើយនេះជាការណ៍មួយ សម្តេចធិបតីធ្លាប់លើកឡើងថា យ៉ាងច្បាស់ យើងគួរចៀសវាងយកគំរូប្រទេសណាមួយ ១០០ភាគរយ ឬ២០០ភាគរយ យកចំណុចខ្លាំងមកសិក្សា ហើយអនុវត្តតាម។ ឯកឧត្តមរដ្ឋមន្ត្រីប្រតិភូ ក៏បានប្រៀបធៀបថា ប្រទេសសិង្ហបុរីតាំងពីបង្កើតរដ្ឋនៅឆ្នាំ១៩៦៥មក មិនដែលធ្លាប់ជួបនូវសង្គ្រាមនោះទេ សូម្បីតែអស្ថិរភាពនយោបាយក៏សិង្ហបុរី មិនដែលស្គាល់នោះដែរ។ បើប្រទេសនេះលង់ខ្លួនដូចកម្ពុជា ក្នុងសង្គ្រាមឥណ្ឌូចិនទី២ រួចហើយឆ្លងកាត់សង្គ្រាមឥណ្ឌូចិនទី៣ ហើយឆ្លងកាត់របបប្រល័យពូជសាសន៍ ម្ល៉េះនឹងខ្ទេចដូចកម្ពុជាអតីតកាលដែរ ៕
