លោកជំទាវរដ្ឋលេខាធិការក្រសួងសុខាភិបាល អញ្ជើញចុះពិនិត្យមើលការផ្តល់សេវាសុខាភិបាល នៅតាមមណ្ឌលសុខភាព ក្នុងខេត្តព្រះសីហនុ

ភ្នំពេញ៖ នាថ្ងៃទី១២ ខែមិថុនា ឆ្នាំ២០២៤ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការ និងជាប្រធានក្រុមការងារដឹកនាំ ជំរុញ និងពង្រឹងគុណភាពសេវាមណ្ឌលសុខភាពចំនួន ១២ រាជធានី ខេត្ត រួមដំណើរដោយ ឯកឧត្តមសាស្ត្រាចារ្យ ប៉ិច សុធី រដ្ឋលេខាធិការទទួលបន្ទុកផ្ទាល់ខេត្តព្រះសីហនុ ឯកឧត្តមវេជ្ជបណ្ឌិត យូ ពិសី អនុរដ្ឋលេខាធិការ និង ឯកឧត្តម លោកជំទាវ លោក លោកស្រី ជាក្រុមការងារពាក់ព័ន្ធ បានអញ្ជើញចុះពិនិត្យមើលការផ្តល់សេវាសុខាភិបាលនៅតាមមណ្ឌលសុខភាពក្នុងខេត្តព្រះសីហនុ រួមមាន៖ មណ្ឌលសុខភាពក្រុងព្រះសីហនុ មណ្ឌលសុខភាពរាម មណ្ឌលសុខភាពអូរឧកញ៉ាហេង និងមណ្ឌលសុខភាពអណ្តូងថ្ម។

ជាកិច្ចចាប់ផ្តើម លោកជំទាវរដ្ឋលេខាធិការ បានពាំនាំនូវការផ្តាំផ្ញើសួរសុខទុក្ខ និងសេចក្តីនឹករំលឹកពីសំណាក់ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល ជូនថ្នាក់ដឹកនាំ មន្ត្រីរាជការទូទាំងខេត្តព្រះសីហនុ និងបានជួបពិភាក្សា ព្រមទាំងផ្តល់អនុសាសន៍ណែនាំសំខាន់ៗ ជូនមន្ត្រីសុខាភិបាល នៃមន្ទីរសុខាភិបាលខេត្តព្រះសីហនុ អំពីបច្ចុប្បន្នភាពការងារ បញ្ហាប្រឈមនានា និងសំណូមពរដែលមាននៅតាមមណ្ឌលសុខភាព ដែលស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្នុងនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

បន្ទាប់មក លោកជំទាវរដ្ឋលេខាធិការ និងជាប្រធានប្រតិភូ បានអញ្ជើញចុះពិនិត្យមើលនៅតាមមណ្ឌលសុខភាពចំនួន០៤ (មណ្ឌលសុខភាពក្រុងព្រះសីហនុ មណ្ឌលសុខភាពរាម មណ្ឌលសុខភាពអូរឧកញ៉ាហេង និងមណ្ឌលសុខភាពអណ្តូងថ្ម) ក្នុងគោលបំណងសំខាន់ៗ ដូចជា៖
– ពិនិត្យ និងផ្តល់យោបល់ក្នុងការពង្រឹងសមត្ថភាពផ្តល់សេវាសុខភាពនៅតាមមណ្ឌលសុខភាព
– ការលើកកម្ពស់ប្រតិបត្តិក្រមសីលធម៌វិជ្ជាជីវៈសុខាភិបាល
– ការបណ្តុះបណ្តាលដល់មន្ត្រីនៅមូលដ្ឋាន
– ការគ្រប់គ្រង និងផ្តត់ផ្គង់ឱសថ សម្ភារ បរិក្ខារ
– ការកែលម្អហេដ្ឋារចនាសម្ព័ន្ធ
– ការប្រើប្រាស់ប្រព័ន្ធបច្ចេកវិទ្យា សម្រាប់គ្រប់គ្រងទិន្នន័យ។

ជាចុងក្រោយ លោកជំទាវរដ្ឋលេខាធិការ និងជាប្រធានប្រតិភូ បានទទួលនូវសំណូមពរដែលបានលើកឡើងដោយមន្ត្រីនៅតាមមណ្ឌលសុខភាព ក៏ដូចជាបញ្ហាប្រឈមនានា ដែលអាចដោះស្រាយបានមួយចំនួន និងមួយចំនួនទៀត ត្រូវបន្តដោះស្រាយតទៅមុខ ព្រមទាំងពង្រឹងមណ្ឌលសុខភាពត្រូវបើកដំណើរការផ្តល់សេវា ២៤ម៉ោងលើ២៤ម៉ោង។