ឧត្តមសេនីយ៍ឯក ឯក សំអូន បើកវគ្គហ្វឹកហ្វឺនបណ្តុះបណ្តាល និងបំប៉ននាយទាហានរង ថ្នាក់ពួក ក្រុមថ្មើរជើង បំប៉នជំនាញរថពាសដែក BMP-1 ដល់យោធិនចំណុះយោធភូមិភាគទី៥
ភ្នំពេញ៖ ឯកឧត្តមឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការ យោធភូមិភាគទី៥ នាថ្ងៃទី១២ ខែមិថុនា ឆ្នាំ២០២៤ បានអញ្ជើញបើកវគ្គហ្វឹកហ្វឺនបណ្តុះបណ្តាល និងបំប៉ន នាយទាហានរង ថ្នាក់ពួក ក្រុមថ្មើរជើង បំប៉នជំនាញរថពាសដែក BMP-1 ដល់យោធិន ចំណុះ យោធភូមិភាគទី៥ ឆ្នាំ២០២៤ នៅសាលាពលទាហានទី៥។
តាមរបាយការណ៍បើកវគ្គហ្វឹកហ្វឺន :
-វគ្គហ្វឹកហ្វឺនបណ្តុះបណ្តាលនាយទាហានរង សិក្ខាកាម ចំនួន ១១២នាក់ សិក្សារយៈពេល ១៨២ថ្ងៃ។
-វគ្គហ្វឹកហ្វឺនបំប៉ននាយទាហានរង សិក្ខាកាម ចំនួន ៩៨នាក់ សិក្សារយៈពេល ៩២ថ្ងៃ។
-វគ្គហ្វឹកហ្វឺនបំប៉នជំនាញរថពាសដែក BMP-1 សិក្ខាកាម ចំនួន ៥០នាក់ សិក្សារយៈពេល ៩៣ថ្ងៃ។
ក្នុងឱកាសនោះដែរ ឯកឧត្តម ឧត្តមសេនីយ៍ឯក ឯក សំអូន បានផ្តល់នូវគន្លឹះ និងការណែនាំសំខាន់ៗមួយចំនួនរួមមាន៖ ត្រូវយកចិត្តទុកដាក់គោរពវិន័យ បទបញ្ជាផ្ទៃក្នុងឱ្យបានល្អប្រសើរ ត្រូវមានសាមគ្គីភាពល្អជាមួយមិត្តក្នុងវគ្គ ដោយចេះជួយគ្នាទៅវិញទៅមក ត្រូវចូលរួមចំណែកក្នុងការជួយដល់ប្រជាពលរដ្ឋដែលរងគ្រោះដោយគ្រោះមហន្តរាយធម្មជាតិផ្សេងៗឱ្យបានទាន់ពេលវេលា និងថែរក្សាការពារនូវសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គម ដែលកំពុងមានសព្វថ្ងៃឱ្យបានដាច់ខាតទោះក្នុងតម្លៃណាក៏ដោយ។
ជាមួយគ្នានោះដែរ ឯកឧត្តម ឧត្តមសេនីយ៍ឯក បានបន្តថា ការងារហ្វឹកហ្វឺនត្រូវធ្វើជាប្រចាំ មិនមានពេលបញ្ចប់ទេ ជាពិសេសសម្រាប់ នាយទាហាន ពលទាហានវ័យក្មេង ការឈប់ហ្វឹកហ្វឺន ឈប់រៀនសូត្រ គឺនៅពេលដែលយើងចូលនិវត្តន៍ បើសិនជាយើងបន្តស្លៀកពាក់ឯកសណ្ឋាននេះ បន្តអាជីពនេះ ការងារហ្វឹកហ្វឺនត្រូវធ្វើជាប្រចាំដោយហេតុថា យើងជាកងកម្លាំង មានកាតព្វកិច្ចចម្បងគឺ ការពារជាតិមាតុភូមិ និងប្រជាជន និងបានណែនាំដល់យោធិន និងសិក្ខាកាមទាំងអស់ត្រូវរក្សាអនាម័យឲ្យបានល្អ ហូបស្អាតរស់នៅស្អាត ចៀសឲ្យឆ្ងាយពីគ្រឿងញៀន។
ជាទីបញ្ចប់ ឯកឧត្តម ឧត្តមសេនីយ៍ឯក ឯក សំអូន ក៏បានប្រគល់ថវិការជូនដល់វគ្គហ្វឹកហ្វឺន ចំនួន ៣.០០០.០០០រៀល និងប្រកាសបើកវគ្កហ្វឹកហ្វឺនចាប់ពីពេលនេះតទៅ៕
