រដ្ឋបាលខេត្តកំពង់ធំ ចេញសេចក្តីណែនាំ ស្តីពី វិធានការទប់ស្កាត់ បង្ក្រាបក្រុមក្មេងទំនើង ក្នុងភូមិសាស្ត្រខេត្ត
ភ្នំពេញ៖ ដើម្បីបង្ការភាពអនាធិបតេយ្យ និងការបង្កភាពអុកឡុករបស់ក្មេងទំនើង នៅតាមទីសាធារណៈ ក្នុងខេត្តកំពង់ធំ ដែលនាំឲ្យជះឥទ្ធិពលជាអវិជ្ជមាន បង្កជាភាពអសន្តិសុខសណ្តាប់ធ្នាប់សាធារណៈ ដែលអាចកើតមានជាអំពើហិង្សាកាប់ចាក់រវាងគូជម្លោះ រហូតឈានដល់ការប្រព្រឹត្តអំពើចោរកម្មថែមទៀត និងដោយអនុវត្តតាមបទបញ្ជាដ៏ម៉ឺងម៉ាត់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ត្រូវអនុវត្តវិធានការចំពោះក្រុមក្មេងទំនើង ក្នុងគោលបំណងឈរលើគោល ដៅសំខាន់ ០៤ចំណុចគឺៈ ជួយតម្រង់ទិស, ការពារអាយុជីវិត និងទ្រព្យសម្បត្តិទាំងអ្នកបង្ក និងអ្នករងគ្រោះ, ការពារឪពុកម្តាយ និងក្រុមគ្រួសារកុំឱ្យខ្លោចចិត្ត, ជួយសង្គម និងប្រជាជនឱ្យរស់នៅកុំឱ្យមានភាពភ័យខ្លាច រដ្ឋបាលខេត្តកំពង់ធំ សូមធ្វើការណែនាំ ដល់កងកម្លាំងស្នងការដ្ឋាននគរបាលខេត្ត, កម្លាំងបញ្ជាការដ្ឋាន កងរាជអាវុធហត្ថខេត្ត និងគណៈបញ្ជាការឯកភាពរដ្ឋបាល ក្រុង ស្រុក ដូចខាងក្រោម៖
១.ត្រូវរៀបចំផែនការជាក់លាក់ ដើម្បីលុបបំបាត់សកម្មភាពក្មេងទំនើងនៅក្នុងមូលដ្ឋាន។ ចំពោះ មុខនេះត្រូវតម្លើងបញ្ជីមុខសញ្ញាក្មេងទំនើងនៅតាមមូលដ្ឋាននីមួយៗ និងត្រូវបែងចែកប្រភេទក្មេងទំនើង អ្នកដែលមានអាណាព្យាបាលគ្រប់គ្រង អ្នកដែលត្រូវសាច់ញាតិបោះបង់ចោល អ្នកដែលងាយរងគ្រោះ ដើម្បីមានវិធានការអប់រំ និងគ្រប់គ្រងឱ្យបានច្បាស់លាស់។
២.សហការជាមួយអ្នកពាក់ព័ន្ធ ជាពិសេសគណៈគ្រប់គ្រងគ្រឹះស្ថានសិក្សាទាំងរដ្ឋ និងឯកជន ដើម្បីលើកកម្ពស់ការចូលរួម ទាំងអស់គ្នាក្នុងការអប់រំក្មេងទំនើង ខិតខំសិក្សាក្នុងការបង្កើតព្រឹត្តិការណ៍ ផ្សេងៗ ដូចជា សិល្បៈ កីឡា ឬការងារជាក់លាក់ ក្នុងគោលដៅធ្វើសមាហរណកម្មក្មេងទំនើងទាំងនោះ ទៅតាមចំណង់ចំណូលចិត្តរបស់ពួកគេ ទៅក្នុងព្រឹត្តិការ ឬការដ្ឋានការងារទាំងនោះ។
៣.ទន្ទឹមនឹងការអនុវត្តវិធានការអប់រំ និងវិធានការរដ្ឋបាល ត្រូវយកចិត្តទុកដាក់ក្នុងការបង្ការ ទប់ស្កាត់ និងចាត់វិធានការច្បាប់ ដោយគ្មានការបន្ធូរបន្ថយ និងដោយគ្មានការលើកលែង ឱ្យបានម៉ឺងម៉ាត់ ចំពោះក្រុមក្មេងទំនើង។
ទទួលបានសេចក្តីណែនាំនេះ កងកម្លាំងជំនាញមានសមត្ថកិច្ច គណៈបញ្ជាការឯកភាពរដ្ឋបាល ក្រុង ស្រុក ត្រូវអនុវត្តប្រកបដោយស្មារតីទទួលខុសត្រូវខ្ពស់ ៕
