គ្រឿងញៀនជិត៤០គីឡូ ដែលដឹកឆ្លងដែនខុសច្បាប់ ត្រូវបានកម្លាំងអធិការដ្ឋានស្រុកបុរីអូស្វាយសែនជ័យ បង្ក្រាបបាន
ភ្នំពេញ៖ ដោយមានការចង្អុលបង្ហាញពីឯកឧត្តម ស្វាយ សំអ៊ាង អភិបាលខេត្តស្ទឹងត្រែង និងមានការសម្របសម្រួលពីលោក ស៊ិន សុហឹង ព្រះរាជអាជ្ញារងអមសាលាដំបូងខេត្ត នៅវេលាម៉ោង១៤:៣០នាទីថ្ងៃទី០៦ ខែមិថុនា ឆ្នាំ២០២៤ លោកវរសេនីយ៍ឯក ហៀក សុខសេរី អធិការ នៃអធិការដ្ឋាននគរបាលស្រុកបុរីអូរស្វាយសែនជ័យ បានដឹកនាំកម្លាំង នៃអធិការដ្ឋាន និងប៉ុស្តិ៍រដ្ឋបាលឃុំកោះស្នែង សហការជាមួយកម្លាំងជំនាញបរិស្ថាន ចុះបង្ក្រាបករណីដឹកជញ្ជូនឆ្លងដែនដោយខុសច្បាប់នូវសារធាតុញៀន ត្រង់ចំណុចក្បាលកោះតាហឿង កន្ទុយកោះហឹប ស្ថិតនៅក្នុងភូមិកោះហិប ឃុំអូរស្វាយ ស្រុកបុរីអូស្វាយសែនជ័យ ខេត្តស្ទឹងត្រែង។
វត្ថុតាងដែលរឹបអូសបានរួមមាន៖
១.គ្រឿងញៀនប្រភេទបេតំហ្វេតាមីន (ICE) ចំនួន ៣៩ដុំ ស្មើរនឹង ៣៨,៩៩៧.៦៦ក្រាម
២.ទូកស្មាច់ពណ៌ទឹកប៊ិច ចំនួន ០១គ្រឿង
៣.ម៉ាស៊ីនចំនួន០១ ម៉ាក់ TBC កម្លាំង១៨សេះ លេខតួម៉ាស៊ីន A2211044092។
បច្ចុប្បន្នជនសង្ស័យបានរត់គេចខ្លួន ចំណែកឯវត្ថុតាងខាងលើ បានបញ្ជូនទៅការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្ត ដើម្បីបន្តតាមនីតិវិធីច្បាប់ ៕
