ឯកឧត្តម ស្វាយ សំអ៊ាង ក្រើនរំលឹកឲ្យអភិបាលរង និងមន្រ្តីរដ្ឋបាលខេត្តស្ទឹងត្រែង បន្តយកចិត្តទុកដាក់បន្ថែមទៀត ដើម្បីបំពេញចំណុចខ្វះខាតឲ្យកាន់តែប្រសើរឡើង

ស្ទឹងត្រែង៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង បានក្រើនរំលឹកជំរុញដល់អភិបាលរងខេត្ត និងមន្រ្តីជំនាញនៃរដ្ឋបាលខេត្តស្ទឹងត្រែទាំងអស់ ឲ្យបន្តយកចិត្តទុកដាក់បន្ថែមទៀត ឲ្យបានផុសផុលតាមដែនសមត្ថកិច្ចជំនាញរៀងៗខ្លួន ដើម្បីបំពេញនៅចំនុចខ្វះខាតឲ្យបានកាន់តែប្រសើរឡើង ។

ការក្រើនរំលឹករបស់ឯកឧត្ដម ស្វាយ សំអ៊ាង បែបនេះធ្វើឡើងនាថ្ងៃទី៦ ខែមិថុនា ឆ្នាំ២០២៤ ក្នុងឱកាសអញ្ជើញដឹកនាំកិច្ចប្រជុំគណៈអភិបាលខេត្ត ដើម្បីក្ដាប់របាយការណ៍សកម្មភាពការងាររបស់គណៈអភិបាល ការអនុវត្តតួនាទី ភារកិច្ចជំនាញ អង្គភាពចំណុះរដ្ឋបាលខេត្ត ពិនិត្យ ដោះស្រាយបញ្ហានានាជុំវិញការអនុវត្តការងាររដ្ឋបាល ការងារជំនាញក្នុងគោលដៅធានាពង្រឹងប្រសិទ្ធភាព ប្រសិទ្ធផលការងាររដ្ឋបាលខេត្ត។

ក្នុងកិច្ចប្រជុំនេះក៏មានការអញ្ជើញចូលរួមពីលោក លោកស្រីអភិបាលរងខេត្ត នាយក នាយករងរដ្ឋបាល នាយកទីចាត់ការ ប្រធានអង្គភាពនៃរដ្ឋបាលខេត្ត និងមន្ត្រីពាក់ព័ន្ធជាច្រើនរូប។

ឯកឧត្តម ស្វាយ សំអ៊ាង បានថ្លែងកោតសរសើរនឹងវាយតំលៃខ្ពស់ចំពោះលទ្ធផលការងារ ដែលលោក លោកស្រីអភិបាលរងនៃគណៈអភិបាលខេត្ត នាយក នាយករងរដ្ឋបាល នាយកទីចាត់ការ ប្រធានអង្គភាពនៃរដ្ឋបាលខេត្ត និងមន្ត្រីពាក់ព័ន្ធទាំងអស់ បានយកចិត្តទុកដាក់អនុវត្តការងា ក្នុងដែនសមត្ថកិច្ចជំនាញរបស់ខ្លួនទទួលបានលទ្ធផលល្អប្រសើរនារយៈពេលកន្លងមក។

ក្នុងឱកាសនោះដែរឯកឧត្តម ស្វាយ សំអ៊ាង ក៏បានបញ្ជាក់ថា កិច្ចប្រជុំគណៈអភិបាលខេត្តប្រចាំខែនីមួយៗ គឺពិតជាមានសារៈសំខាន់ដើម្បីជាការចូលរួមមតិយោបល់ពី សមាជិកអង្គរប្រជុំ ពិនិត្យនូវវឌ្ឍនភាពលទ្ធផលការងារប្រចាំខែ និងដាក់ទិសដៅអនុវត្តបន្តរដើម្បីជំរុញការអភិវឌ្ឍន៍ និងការដោះស្រាយឆ្លើយតបបញ្ហាកង្វល់ បញ្ហាប្រឈម បញ្ហាខ្វះខាតនានាដែរនៅសេសសល់ នឹងត្រូវបំពេញបន្ថែម រួមមានការងារសន្តិសុខសណ្តាប់ធ្នាប់សាធារណៈសង្គម ការងារអភិវឌ្ឍន៍មូលដ្ឋានសំណូមពរតម្រូវការរបស់ប្រជាពលរដ្ឋនៅក្នុងមូលដ្ឋានឲ្យបានកាន់តែរីកចម្រើន និងឆាប់រហ័ស ប្រកបដោយគុណភាពប្រសិទ្ធភាព ស្របទៅនឹងគោលនយោបាយរាជរដ្ឋាភិបាល ដែលមានសម្ដេចមហាបវធិបតី ហ៊ុន ម៉ាណែត ជាប្រមុខដឹកនាំ។

នៅក្នុងកិច្ចប្រជុំនាឱកាសនោះផងដែរក៏មានការចូលរួមជាមតិយោបល់ ពិភាក្សានិងសំណូមពរមួយចំនួនដោយសមាជិកអង្គប្រជុំ ដែលធ្វើឲ្យអង្គប្រជុំនាឱកាសនោះមានភាពសកម្មនិងបានផ្លាស់ប្ដូរមតិយោបល់ទៅវិញទៅមក ដែលទទួលបាននៅដំណោះស្រាយថ្មីៗប្រកបដោយភាពរលូន នឹងទទួលបាន លទ្ធផលល្អប្រសើរ។

ជាចុងក្រោយឯកឧត្តមអភិបាលខេត្ត ក៏បានជូនពរដល់សមាជិកអង្គប្រជុំដែលបានមកចូលរួមទាំងអស់ ជួបប្រទះតែសេចក្តីសុខសុវត្ថិភាព និងសុភមង្គលប្រកបទៅដោយពុទ្ធពរទាំង ៤ប្រការផងដែរ ៕