ឯកឧត្តមសាស្ត្រាចារ្យ ឈាង រ៉ា ចាត់តំណាងសម្របសម្រួលដឹកនាំវគ្គបណ្តុះបណ្តាលស្តីពី “ភាពជាអ្នកដឹកនាំ និងនវានុវត្តន៍” ជូនដល់មន្រ្តីក្រោមឱវាទក្រសួងសុខាភិបាល

ភ្នំពេញ៖ កាលពីថ្ងៃទី៤ ខែមិថុនា ឆ្នាំ២០២៤ ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល និងជាតំណាងឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានបន្តសម្របសម្រួលដឹកនាំវគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍» សម្រាប់មន្រ្តីរាជការក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ ដែលមានសមាសភាពចូលរួមសរុបចំនួន ២៤១៣នាក់ ដើម្បីបន្តពង្រឹងស្ថាប័នសុខាភិបាល ដែលជាយុទ្ធសាស្រ្តអាទិភាពមួយ ក្នុងចំណោមអាទិភាព ៣ បានដាក់ចេញដោយក្រសួងសុខាភិបាល ក្នុងការគាំទ្រកំណែទម្រង់ អនុវត្តយុទ្ធសាស្រ្តបញ្ចកោណ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា។

ក្នុងសប្តាហ៍នេះ ការជួបជុំផ្តោតលើការយល់ដឹងភាពជាអ្នកដឹកនាំ និងការលើកទឹកចិត្តដល់គ្រប់មន្ត្រីសុខាភិបាល គ្រប់កម្រឹតដឹកនាំ រួមទាំងមន្ត្រីក្រោមឱវាទ អោយបន្តខិតខំថែរក្សាខ្លួន ថែសុខភាពគ្រប់ទិដ្ឋភាពទាំងអស់ តាមរយៈការវាស់ស្ទង់លើសំណួរចម្លើយ ការយល់ដឹងនៃមេរៀន ដែលបានលើកមកជជែកពិភាក្សាកាលពីសប្តាហ៍មុន និងបទពិសោធន៍ផ្ទាល់ខ្លួន។

បន្ថែមពីនេះ ក៏មានការចូលរួមធ្វើបទបង្ហាញរបស់មន្ទីរពេទ្យបង្អែកខេត្តព្រះវិហារ ដើម្បីចែករំលែកបទពិសោធន៍លើដំណោះស្រាយបញ្ហា នៃការអនុវត្តតាមគោលការណ៍ដំណើរការ PDIA ផ្ទាល់ខ្លួនរបស់អង្គភាពជំនាញ ដើម្បីកែលម្អកង្វះខាតដែលនៅសេសសល់ និងរកដំណោះស្រាយដោយសម្របសម្រួលទៅនឹងស្ថានភាពជាក់ស្តែង និងកត្តាប្រឈមចំពោះមុខ ដែលការខិតខំវិភាគនេះ ជាជំនួយស្មារតីបង្កើនសមត្ថភាពដោះស្រាយ ជួយដល់ការបម្រើសេវាសាធារណៈជូនប្រជាពលរដ្ឋ៕