អភិបាលរងខេត្តក្រចេះ ដឹកនាំក្រុមការងារខេត្ត ចុះទប់ស្កាត់ និងបង្រ្កាបប្រតិបត្តិការអាជីវកម្មរ៉ែមាសអាណាធិបតេយ្យ នៅចំណុចថ្មពួយភ្នំជី តំបន់ព្រៃឡង់ ក្នុងស្រុកសំបូរ

ភ្នំពេញ៖ នៅរសៀលថ្ងៃចន្ទ ៥កើត ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៧ ខែឧសភា ឆ្នាំ២០២៤ លោក គង់ គឹមនី អភិបាលរងខេត្តក្រចេះ និងជាអនុប្រធានអចិន្ត្រៃយ៍ នៃគណៈកម្មការបង្រ្កាបបទល្មើសធនធានធម្មជាតិខេត្ត, លោក អ៊ួង ប៊ុនហុង អគ្គនាយករងនៃអគ្គនាយកដ្ឋានធនធានរ៉ែ និងដោយមានការសម្របសម្រួល និងលោក រ៉ា បូរ៉ាន់ឌី ព្រះរាជអាជ្ញារង អមសាលាដំបូងខេត្ត បានអញ្ជើញដឹកនាំក្រុមការងារខេត្ត ចុះទប់ស្កាត់ និងបង្រ្កាបប្រតិបត្តិការអាជីវកម្មរ៉ែមាសអាណាធិបតេយ្យ នៅចំណុចថ្មពួយភ្នំជី តំបន់ព្រៃឡង់ ស្ថិតក្នុងភូមិយាវ ឃុំកំពង់ចាម ស្រុកសំបូរ ខេត្តក្រចេះ។

ក្រុមការងារចម្រុះ ចុះដល់ទីតាំងពិនិត្យឃើញថានៅក្នុងភូមិសាស្ត្រព្រៃឡង់/តំបន់ដែនជម្រកសត្វព្រៃ ព្រៃឡង់ មានប្រតិបត្តិការអាជីវកម្មរ៉ែមាសអាណាធិតេយ្យ(មិនមានធ្វើសកម្មភាព) មានអណ្ដូងយករ៉ែចំនួន៣អណ្តូង ប្រើគីបបំផ្ទុះបំបែកថ្ម និងសម្ភារៈប្រើប្រាស់មួយចំនួនទៀត។ ចំណែករណ្តៅនិងរោង ត្រូវបានក្រុមការងាររុះរើរោង និងលុបរណ្តៅទាំង៣ វត្ថុតាងផ្សេងទៀតរក្សាទុកបណ្តោះអាសន្ន ព្រមទាំងកំណត់មុខសញ្ញា កសាងសំណុំរឿងអនុវត្តតាមនីតិវិធីច្បាប់។

ដោយមានការចូលរួមពី តំណាងក្រុមការងារអគ្គនាយកដ្ឋានធនធានរ៉ែ ប្រធានមន្ទីររ៉ែ និងថាមពល អភិបាលរងស្រុកសំបូរ កម្លាំងនគរបាលខេត្ត កម្លាំងកងរាជអាវុធហត្ថ និងមន្ត្រីពាក់ព័ន្ធ។

សូមបញ្ជាក់ដែរថាទីតាំងដីដែលប្រជាពលរដ្ឋចូលប្រតិបត្តិការអាជីវកម្មរ៉ែមាសអាណាធិតេយ្យ ស្ថិតក្នុងដែនអាជ្ញាបណ្ណក្រុមហ៊ុន Late Cheng Mining Development Co., Ltd សិក្សាស្រាវជ្រាវរ៉ែលោហៈ PL ៕