ឧត្តមសេនីយ៍ឯក ថោង សុគន្ធា៖ ការបំប៉នជំនាញប្រឆាំងបទល្មើសគ្រឿងញៀនដល់មន្រ្តីនគរបាលជាការងារសំខាន់ចាំបាច់
ភ្នំពេញ៖ ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរងអាជ្ញាធរជាតិប្រយុទ្ធប្រឆាំងគ្រឿងញៀនថ្លែងបែបនេះ ពេលធ្វើបាឋកថា ចែករំលែក ចំណេះដឹង និងបទពិសោធ ដល់សិក្ខាកាមវគ្គបំប៉នជំនាញប្រឆាំងបទល្មើសគ្រឿងញៀនលើ ប្រធានបទ ស្តីពី «គោលនយោបាយក្នុងការប្រយុទ្ធប្រឆាំងបទល្មើសគ្រឿងញៀន» នៅសាលាបណ្ឌិត្យសភាកម្ពុជា នាថ្ងៃទី២៧ ខែឧសភា ឆ្នាំ២០២៤។
ឯកឧត្តម ឧត្តមសេនីយ៍ឯក ភុន សុផល នាយកសាលាមធ្យមវិជ្ជាជីវៈនគរបាល បានស្វាគមន៍និងរាយការណ៍ថា យោងប្រកាសលេខ១៧៦៥ប្រក ចុះថ្ងៃទី១២ ខែមេសា ឆ្នាំ២០២៤ ស្តីពីវគ្គបំប៉នជំនាញប្រឆាំង បទល្មើសគ្រឿងញៀន រយៈពេល ២ខែ ដល់មន្ត្រីនគរបាលជាតិចំនួន ៥៥រូប នៅបណ្ឌិត្យសភានគរបាលកម្ពុជា របស់ក្រសួងមហាផ្ទៃ ដើម្បីទទួលបាននូវចំណេះដឹងថ្មីៗនិងបទពិសោធល្អៗលើលើការងារប្រយុទ្ធប្រឆាំងគ្រឿងញៀន។
ក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ក្នុងឱកាសនោះ ឯកឧត្តម ខត្តមសេនីយ៍ឯក ថោង សុគន្ធា អគ្គលេខាធិការរង បានថ្លែងអំណរគុណដល់ថ្នាក់ដឹកនាំក្រសួងមហាផ្ទៃនិងបណ្ឌិត្យសភានគរបាលកម្ពុជា ដែលបានបើកវគ្គបំប៉នជំនាញប្រឆាំងបទល្មើសគ្រឿងញៀន ដល់មន្រ្តីនគរបាលយើងដែលជាវគ្គមួយសំខាន់ចាំបាច់និងស្របពេលដែលរាជរដ្ឋាភិបាលនីតិកាលទី៧ ដឹកនាំសម្តេចមហាបវរធិបតី ហ៊ុន ម៉ាណែត បានដាក់ការងារប្រយុទ្ធប្រឆាំងគ្រឿងញៀនជាការងារអាទិភាពដើម្បីឆ្លើយតបនឹងកង្វល់ប្រជាពលរដ្ឋ។
ជាមួយគ្នានេះ ឯកឧត្តម ឧត្តមសេនីយ៍ឯក ថោង សុគន្ធា បានថ្លែងបន្តថា ដើម្បីឆ្លើយតបទៅនឹងឆន្ទះដ៏មុតស្រួចរបស់រាជរដ្ឋាភិបាល ឯកឧត្តមសន្តិបណ្ឌិត នេត សាវឿន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានដាក់ចេញនូវលិខិតបទដ្ឋានជាបន្តបន្ទាប់លើសំដៅប្រសិទ្ធភាពការការងារទាំង៥ ដែលក្នុងនោះការងារផ្សព្វផ្សាយអប់រំ ជាការងារអាទិភាព ធ្វើយ៉ាងណាឱ្យ “ទំនើប ទាន់សម័យ មានប្រសិទ្ធភាព” ដោយបានបង្កើតនិងដាក់ចេញសេចក្តីអំពាវនាវឱ្យគ្រប់សមាសភាពទាំងអស់ទាញយកកម្មវិធីទូរស័ព្ទដៃ NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀនមកប្រើប្រាស់ដើម្បីទទួលបាននូវ ចំណេះដឹងកំសាន្ត អប់រំ ព័ត៌មាន និងសេវាព្យាបាល ៕
