ស្នងការនគរបាលខេត្តកំពង់ធំ ក្រើនរំលឹក និងដាស់តឿនដល់កងកម្លាំង ត្រូវគោរពអនុវត្តវិន័យ របស់កងកម្លាំងនគរបាលជាតិ

ភ្នំពេញ៖ នារសៀលថ្ងៃទី២៣ ខែឧសភា ឆ្នាំ២០២៤ លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ បានដឹកនាំកិច្ចប្រជុំ ពង្រឹងការងារ រក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នៅសាលប្រជុំស្នងការដ្ឋាននគរបាលខេត្ត។

ជាកិច្ចចាប់ផ្ដើម លោកឧត្តមសេនីយ៍ទោ ម៉ែន លី ស្នងការនគរបាលខេត្ត បានមានប្រសាសន៍ សំណេះសំណាល ដោយថ្លែងថា កិច្ចប្រជុំ គឺដើម្បីត្រួតពិនិត្យ លើការអនុវត្ត តួនាទី ភារកិច្ច របស់បងប្អូនកងកម្លាំង នារយៈពេលកន្លង ដកបទពិសោធន៍ លើកទិសដៅសម្រាប់អនុវត្តបន្ត សម្រេចបានជោគជ័យ តាមការរំពឹងទុក។

កិច្ចប្រជុំនេះដែរ លោកឧត្តមសេនីយ៍ទោ ស្នងការ បានថ្លែងសង្កត់ធ្ងន់ លើផែនការងារព្រហ្មទណ្ឌ ជាពិសេសការងារគ្រប់គ្រងមុខសញ្ញាក្មេងទំនើង ជាកន្សោមអាទិភាពមួយ ក្នុងចំណោមការងារមួយចំនួនទៀត ដើម្បីបង្ការទប់ស្កាត់ រាល់អំពើល្មើស ដែលបង្ករឡើងដោយក្មេងទំនើង រួមមាន : លួច ឆក់ ប្លន់ បំផ្លិចបំផ្លាញទ្រព្យសម្បត្តិប្រជាពលរដ្ឋ និងទ្រព្យសម្បត្តិសាធារណៈ ប្រើប្រាស់វិធានការជំនាញ បង្ការទប់ស្កាត់ ធានាសេចក្តី សុខក្សេមក្សាន្ត ជូនប្រជាពលរដ្ឋ និងសង្គមជាតិស្របតាមគោលនយោបាយភូមិ ឃុំ-សង្កាត់មានសុវត្ថិភាព។

ឆ្លៀតក្នុងឱកាសនោះដែរ លោកស្នងការ ក្រើនរំលឹក ដាស់តឿន ដល់កងកម្លាំង ត្រូវប្រកាន់ខ្ជាប់៖

១.គោរពអនុវត្តវិន័យ របស់កងកម្លាំងនគរបាលជាតិ, ការគ្រងឯកសណ្ឋាន ឲ្យបានសមរម្យ សាកសមជាមន្ត្រីនគរបាលជាតិ គ្រប់ពេលវេលាបំពេញភារកិច្ច, សាមគ្គីភាព ឯកភាពផ្ទៃក្នុង ប្រកបដោយក្រមសីលធម៌ សម្រាប់កិច្ច សហការល្អ រវាងកងកម្លាំង និងមហាជនគ្រប់ស្រទាប់វណ្ណៈ។

២.ពង្រឹងប្រព័ន្ធគ្រប់គ្រង ដឹកនាំ ការអនុវត្ត តួនាទី ភារកិច្ច សមត្ថភាពជំនាញ វិធានជំនាញតាមរយៈការចូលរួមវគ្គបណ្តុះបណ្តាលរយៈពេលខ្លី សិក្សារៀនសូត្រ ស្រាវជ្រាវស្វែងយល់កំណត់ត្រាចំណេះដឹងថ្មីៗ បន្ថែមទៀត ស្របតាមសម័យកាល ទំនើបកម្ម ឌីជីថល, ការងារប្រចាំបញ្ជា ការល្បាតចំហ ពួនស្ទាក់ បញ្ចុះកម្លាំងតាមបណ្តាគោលដៅងាយរងគ្រោះ បំពាក់សម្ភារៈ មធ្យោបាយ បម្រើឲ្យកិច្ចប្រតិបត្តិការ រក្សាសន្តិសុខ សណ្តាប់ធ្នាប់ សុវត្ថិភាពសង្គម កិច្ចអន្តរាគមន៍ សង្គ្រោះ ដល់ប្រជាពលរដ្ឋ នាគ្រាលំបាក ដែលអាចកើតឡើងជាចៃដន្យ។

៣.ជំរុញប្រព័ន្ធលើកទឹកចិត្តចំពោះមន្ត្រី រូបណាដែលមានស្មាដៃ ក្នុងការគោរពអនុវត្ត តួនាទី ភារកិច្ច បទបញ្ជា របស់ថ្នាក់ដឹកនាំ ត្រូវបានធ្វើការលើកទឹកចិត្ត តាមលក្ខន្តិកៈ របស់កងកម្លាំងនគរបាលជាតិ ៕