ភ្នំពេញ៖ ឆ្លៀតក្នុងឱកាសចូលរួមវេទិកាទឹកពិភពលោកលើកទី១០ នៅកោះបាលី ប្រទេសឥណ្ឌូនេស៊ី នាថ្ងៃអង្គារ ១៤កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២១ ខែឧសភា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានជួបពិភាក្សាទ្វេភាគីជាមួយតំណាងធនាគារពិភពលោក លោកស្រី Manuela V. Ferro អនុប្រធានធនាគារពិភពលោកប្រចាំតំបន់អាស៊ីខាងកើតនិងប៉ាស៊ីហ្វិក និងលោក Saroj Kumar Jha នាយកផ្នែកទឹកសាកលនៃធនាគារពិភពលោក។
ក្នុងកិច្ចជំនួប ឯកឧត្តមរដ្ឋមន្រ្តីបានបញ្ជាក់ជូនតំណាងធនាគារពិភពលោក (WB) ថា ក្រសួងធនធានទឹក និងឧតុនិយម បានរៀបចំផែនការអភិវឌ្ឍន៍ហេដ្ឋារចនាសម្ព័ន្ធទឹករយៈពេលវែង ដើម្បីឆ្លើយតបទៅនឹងការប្រែប្រួលអាកាសធាតុ ហើយផែនការទាំងនេះគឺជាគំនិតផ្តួចផ្តើមប្រកបដោយយុទ្ធសាស្រ្ត និងមានផែនការជាក់លាក់ ក្រោមមាគ៌ាដឹកនាំប្រកបដោយភាពមោះមុត និងបញ្ញាញាណរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។
ឯកឧត្តមរដ្ឋមន្ត្រីបានបញ្ជាក់បន្ថែមថា ផែនការយុទ្ធសាស្រ្តរយៈពេលវែងទាំងនេះទាមទារនូវការវិនិយោគពីគ្រប់ដៃគូអភិវឌ្ឍន៍ ជាពិសេស ធនាគារពិភពលោក (WB) ដើម្បីឱ្យរាជរដ្ឋាភិបាលកម្ពុជាអាចសម្រេចបានគោលដៅយុទ្ធសាស្រ្តកាត់បន្ថយភាពក្រីក្រ ប្រជាជនមានជីវភាពកាន់តែប្រសើរ ព្រមទាំងឈានឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ ក្លាយជាប្រទេសមានចំណូលមធ្យមកម្រិតខ្ពស់ និងសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់ ជាអារ្យប្រទេសជឿនលឿនមួយក្នុងតំបន់ ស្របតាមយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលនីតិកាលទី៧ នៃរដ្ឋសភា។
ក្នុងជំនួបនេះ លោកស្រីអនុប្រធានធានាគារពិភពលោកបានបញ្ជាក់ពីជំហរនឹងបន្តពង្រឹងកិច្ចសហប្រតិបត្តិការជាមួយក្រសួងធនធានទឹក និងឧតុនិយម ដើម្បីចូលចំណែកក្នុងការអនុវត្តយុទ្ធសាស្រ្តបញ្ចកោណរបស់រាជរដ្ឋាភិបាល តាមរយៈការអនុវត្តគម្រោងសន្តិសុខទឹកដែលមានរយៈពេល ៦ឆ្នាំ (២០២៤-២០៣០)។
ជាលទ្ធផលនៃកិច្ចជំនួបជាមួយតំណាងធនាគារពិភពលោក (WB) គម្រោងសន្តិសុខទឹក នឹងត្រូវចាប់អនុវត្តឆាប់ៗចាប់ពីចុងឆ្នាំ២០២៤ រហូតដល់ ឆ្នាំ២០៣០ សម្រាប់ខេត្តមួយចំនួនរួមមាន៖ ខេត្តក្រចេះ ខេត្តមណ្ឌលគិរី ខេត្តកំពង់ធំ ជាដើម ដោយផ្តោតលើការធ្វើទំនើបកម្មប្រព័ន្ធធារាសាស្រ្ត និងអាងទឹកមួយចំនួន ដើម្បីធានាសន្តិសុខទឹក និងនិរន្តរភាពនៃការប្រើប្រាស់ប្រព័ន្ធធារាសាស្រ្ត។ គម្រោងសន្តិសុខទឹកនេះក៏នឹងជួយរាជរដ្ឋាភិបាលកម្ពុជាក្នុងការឆ្លើយតបទៅនឹងការប្រែប្រួលអាកាសធាតុ ដោយកាត់បន្ថយគ្រោះមហន្តរាយទឹកជំនន់ និងគ្រោះរាំងស្ងួតផងដែរ ៕
