ឯកឧត្ដម ស្វាយ សំអ៊ាង៖ ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ ជាព្រឹត្តិការណ៍ដ៏មានសារៈសំខាន់ ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដែលកម្ពុជាបានអនុវត្តតាំងពីឆ្នាំ១៩៩៣

ភ្នំពេញ៖ ឯកឧត្ដម ស្វាយ សំអ៊ាង សមាជិកគណៈកម្មាធិការកណ្តាល និងប្រធានគណៈកម្មាធិការគណបក្សខេត្តស្ទឹងត្រែង បានអញ្ជើញដឹកនាំបន្តយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ខណ្ឌ អាណត្តិទី៤ ក្នុងស្រុកបុរីអូរស្វាយសែនជ័យ។ ដោយមានការចូលរួមពីសំណាក់លោក លោកស្រី ជាសមាជិក សមាជិកា គណបក្សខេត្ត សមាជិក សមាជិកាក្រុមប្រឹក្សាខេត្ត១៧រូប, ក្រុមប្រឹក្សាស្រុក១១រូប និងអង្គបោះឆ្នោតទាំង១៣រូប សរុបមានអ្នកចូលរួមទាំងអស់៨០នាក់។

អង្គពិធីនេះបានប្រព្រឹត្តទៅ នៅព្រឹកថ្ងៃទី១៩ ខែឧសភា ឆ្នាំ២០២៤ នៅស្នាក់ការគណបក្សប្រជាជនកម្ពុជាស្រុកបុរីអូរស្វាយសែនជ័យ។

បន្ទាប់ពី លោក លី មីណា អាននូវសារលិខិតរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា, លោកស្រី បួរ ខាំតង ប្រធានក្រុមប្រឹក្សាស្រុកបុរីអូរស្វាយសែនជ័យ បានមានមតិចំណាប់អារម្មណ៍របស់តំណាងបេក្ខជនឈរឈ្មោះបោះឆ្នោតក្រុមប្រឹក្សាស្រុក និងឯកឧត្តម ឈាង ឡាក់ សមាជិកគណៈកម្មាធិការកណ្តាល និងជាប្រធានគណៈប្រចាំការ នៃគណៈអចិន្ត្រៃយ៍គណៈកម្មាធិការគណបក្សខេត្ត បានមានមតិចំណាប់អារម្មណ៍របស់បេក្ខជនឈរឈ្មោះបោះឆ្នោតក្រុមប្រឹក្សាខេត្ត រួចមក ក្នុងឱកាសបន្តយុទ្ធនាការនេះ ឯកឧត្ដម ស្វាយ សំអ៊ាង សមាជិកគណៈកម្មាធិការកណ្តាល និងប្រធានគណៈកម្មាធិការគណបក្សខេត្តស្ទឹងត្រែង បានថ្លែងអំណរគុណយ៉ាងជ្រាលជ្រៅចំពោះអង្គបោះឆ្នោតទាំងអស់ដែលបានបោះឆ្នោតជូនគណបក្សប្រជាជនកម្ពុជាឱ្យទទួលបានជ័យជំនះយ៉ាងត្រចះត្រចង់ នៅក្នុងការបោះឆ្នោតជ្រើសរើសសមាជិកព្រឹទ្ធសភាជាតិកាលពីចុងខែកុម្ភៈកន្លងទៅ ដែលគាំទ្រសម្តេចតេជោ ហ៊ុន សែន ប្រធានគណបក្ស បានជាប្រធានព្រឹទ្ធសភាដ៏ឧត្តង្គឧត្តម។

ឯកឧត្ដមប្រធានគណៈកម្មាធិការគណបក្សខេត្ត បានថ្លែងបញ្ជាក់ថា ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុង ស្រុក ខណ្ឌ អាណត្តិទី៤ នៅថ្ងៃអាទិត្យទី២៦នេះ ជាព្រឹត្តិការណ៍នយោបាយដ៏មានសារៈសំខាន់ សម្រាប់បុព្វហេតុសុខសន្តិភាព ស្ថេរភាព និងអភិវឌ្ឍសង្គមជាតិយើងបន្តទៀត ពិសេសការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដែលកម្ពុជាបានអនុវត្តតាំងពីឆ្នាំ១៩៩៣។

ការបោះឆ្នោតនៅថ្នាក់ក្រោមជាតិនេះ គឺជាការកែទម្រង់រដ្ឋបាលសាធារណៈសំដៅលើកកំពស់អភិបាលកិច្ចនៅថ្នាក់មូលដ្ឋាន ដើម្បីបំរើសេវាសាធារណៈជូនប្រជាជនឱ្យកាន់តែបានល្អប្រសើរ។ ទោះបីជាការបោះឆ្នោតអសកល ប៉ុន្តែនេះជាការបោះឆ្នោតតាមលក្ខណៈប្រជាធិបតេយ្យ ដោយអង្គបោះឆ្នោតគឺជាសមាជិក សមាជិកា ក្រុមប្រឹក្សាឃុំ សង្កាត់ទាំងអស់ ដែលត្រូវបានបោះឆ្នោតជ្រើសតាំងស្របច្បាប់ ដោយផ្ទាល់ពីប្រជាពលរដ្ឋនៅទូទាំងប្រទេសតាមអាណត្តិនីមួយៗ។

ឯកឧត្ដមប្រធានគណៈកម្មាធិការគណបក្សខេត្ត បានធ្វើការអំពាវនាវដល់មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋទាំងអស់ក្នុងស្រុកបុរីអូរស្វាយសែនជ័យ ឱ្យបន្តរួមសាមគ្គីគ្នា រឹងមាំជុំវិញស្នូលនៃការដឹកនាំរបស់គណបក្សប្រជាជនកម្ពុជាដែលមានសម្តេចតេជោ ហ៊ុន សែន ជាប្រមុខនិងគាំទ្រយ៉ាងក្លៀវក្លាយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ដើម្បីបុព្វហេតុសុខសន្តិភាពស្ថេរភាព អភិវឌ្ឍនភាព វិបុលភាព និងអនាគតដ៏រុងរឿងរបស់កម្ពុជាជាដរាបតរៀងទៅ។

ឆ្លៀតក្នុងឱកាសនោះដែរ ឯកឧត្ដមប្រធានគណៈកម្មាធិការគណបក្សខេត្ត បានប្រកាសក្នុងនាមសមាជិកមន្រ្តីគណបក្ស និងប្រជាពលរដ្ឋស្រុកបុរីអូរស្វាយសែនជ័យ ទាំងមូល គាំទ្រយ៉ាងរឹងមាំនិងពេញទំហឹងនូវគម្រោងព្រែកជីកហ្វូណនតេជោ ដែលជាគំនិតផ្តួចផ្តើមដ៏អស្ចារ្យសម្រាប់អនាគតថ្លៃថ្លារបស់កម្ពុជា ៕