ឧត្តមសេនីយ៍ឯក ងួន ស្រេង អញ្ជើញបើកសវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ នៅរដ្ឋបាលរាជធានីភ្នំពេញ ផ្នែករដ្ឋបាលស៊ីវិល ផ្នែកសន្តិសុខសាធារណៈ និងផ្នែកពន្ធនាគារ

ភ្នំពេញ៖ នារសៀលថ្ងៃសុក្រ ទី១៧ ខែឧសភា ឆ្នាំ២០២៤ រដ្ឋបាលរាជធានីភ្នំពេញ បានរៀបចំពិធីបើកសវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ នៅរដ្ឋបាលរាជធានីភ្នំពេញ ផ្នែករដ្ឋបាលស៊ីវិល ផ្នែកសន្តិសុខសាធារណៈ និងផ្នែកពន្ធនាគារ ក្រោមអធិបតីភាពដ៏ខ្ពង់ខ្ពស់ ឯកឧត្ដម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង និងឯកឧត្តម កើត ឆែ អភិបាលរង នៃគណ:អភិបាលរាជធានីភ្នំពេញ។

កិច្ចប្រជុំនេះដែរ ក៏មានការអញ្ជើញចូលរួមពី ឯកឧត្ដម អគ្គនាយករង នៃអគ្គនាយកដ្ឋានសវនកម្មផ្ទៃក្នុង ឯកឧត្តម លោកជំទាវ អភិបាលរងរាជធានីភ្នំពេញ ស្នងការរង ប្រធានពន្ធនាគារ ប្រធានមណ្ឌលអប់រំកែប្រែទី១ ទី២ និងទី៤ លោក លោកស្រី នាយក/នាយករងរដ្ឋបាលរាជធានីភ្នំពេញ នាយកទីចាត់ការ/ប្រធានអង្គភាព អភិបាលខណ្ឌចំណុះរាជធានីភ្នំពេញ នាយករដ្ឋបាលខណ្ឌ លោកនាយប៉ុស្តិ៍នគរបាលច្រកទ្វារអន្តរជាតិ កំពង់ផែអន្តរជាតិ លោក អធិការ នៃអធិការដ្ឋាននគរបាលខណ្ឌទាំង១៤ លោក លោកស្រី ចៅសង្កាត់ ស្មៀនសង្កាត់ និងនាយប៉ុស្ដិ៍នគរបាលរដ្ឋបាលសង្កាត់ក្រោមចំណុះ ព្រមទាំងមន្ត្រីពាក់ព័ន្ធជាច្រើនរូបទៀត។

ជាកិច្ចចាប់ផ្តើម ឯកឧត្តម កើត ឆែ អភិបាលរង នៃគណៈអភិបាលរាជធានីភ្នំពេញ បានមានមតិស្វាគមន៍ ជូនដល់ឯកឧត្តម គណៈអធិបតី និងអង្គពិធីទាំងមូល ព្រមទាំងបានថ្លែងអំណរអគុណ ដល់គណៈប្រតិភូសវនកម្មផ្ទៃក្នុង ដែលចុះធ្វើសវនកម្មនៅរដ្ឋបាលរាជធានីភ្នំពេញ ដែលជាការជំរុញ កែលម្អ មករដ្ឋបាលថ្នាក់ក្រោមជាតិ។

ឯកឧត្តម ក៏បានបញ្ជាក់ថាការចុះធ្វើសវនកម្ម ដូចបានការពារ ២ចំណុចសំខាន់មកគ្រប់ស្ថាប័នដូចជា៖ ទី១.ការពារ អាយុជីវិតបានយូរអង្វេង និងទី២.ការពារពី ការខុសឆ្គងពីផ្លូវច្បាប់។

ឯកឧត្តមអភិបាលរងរាជធានីភ្នំពេញ បានណែនាំដល់មន្រ្តីជំនាញ គ្រប់លំដាប់ថ្នាក់ ត្រូវផ្តល់កិច្ចសហការជាមួយគណៈប្រតិភូសវនកម្ម ដើម្បីឱ្យដំណើរការសវនកម្ម មានភាពរលូន ប្រកបដោយប្រសិទ្ធភាពខ្ពស់។

ជាកិច្ចបន្ត ឯកឧត្តម ឧត្តមសេនីយ៍ឯក អគ្គនាយក នៃអគ្គនាយកដ្ឋានសវនកម្មផ្ទៃក្នុង បានថ្លែងអំណរអរគុណ និងមានសេចក្តីសោមនស្សរីករាយ ចំពោះគណអធិបតី និងអង្គពិធីទាំងអស់ ដែលបានចំណាយពេលវេលាដ៏មានតម្លៃ ចូលរួមក្នុងពិធីប្រជុំបើកកិច្ចសវនកម្មផ្ទៃក្នុង សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធនាពេលរសៀលនេះ។ ដោយមានការយកចិត្តទុកដាក់ខ្ពស់បំផុតរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ ក្នុងការជំរុញ និងបង្កើនល្បឿនកំណែទម្រង់អភិបាលកិច្ចតាមរយៈការកែទម្រង់ស៊ីជម្រៅលើផ្នែករដ្ឋបាលសាធារណៈ ការកែទម្រង់កងកម្លាំងនគរបាលជាតិ ការកែទម្រង់ហិរញ្ញវត្ថុសាធារណៈ និងការកែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ជាតិ និងថ្នាក់ក្រោមជាតិ បានចេញលិខិតបង្គាប់ការ បានចាត់តាំងក្រុមគណៈប្រតិភូសវនកម្មផ្ទៃក្នុង ផ្នែករដ្ឋបាលស៊ីវិល ផ្នែកសន្តិសុខសាធារណៈ និងផ្នែកពន្ធនាគារ ចុះបំពេញបេសកកម្មធ្វើការងារសវនកម្មនៅតាមបណ្តារាជធានី ខេត្ត សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ ដោយផ្តោតការត្រួតពិនិត្យលើការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ ការគ្រប់គ្រងបុគ្គលិក និងការគ្រប់គ្រងជនជាប់ឃុំ។

ឆ្លៀតក្នុងឱកាសនោះ ឯកឧត្តម អគ្គនាយក បានលើកឡើងអំពីតួនាទីភារកិច្ចរបស់សវនកម្មផ្ទៃក្នុង មានគោលបំណងក្នុងការត្រួតពិនិត្យលើប្រតិបតិ្តការប្រព័ន្ធគ្រប់គ្រងផ្ទៃក្នុងរបស់អង្គភាពនីមួយៗ ដើម្បីធានាឱ្យបាននូវប្រសិទ្ធភាព គណនេយ្យភាព និងភាពសន្សំសំចៃ ព្រមទាំងការចូលរួមទប់ស្កាត់ការខ្ជះខ្ជាយក្នុងការប្រើប្រាស់ធនធានរបស់រដ្ឋ។

បន្ថែមពីនេះទៀត ឯកឧត្តម បានបញ្ជាក់បន្ថែមថា ការចុះធ្វើសវនកម្មផ្ទៃក្នុង គឺដើម្បីជួយជំរុញ លើការបំពេញការងារប្រកបដោយប្រសិទ្ធភាព និងភាពទទួលខុសត្រូវខ្ពស់ ជាពិសេស អនុសាសន៍កែលម្អទាំងអស់ដែលផ្តល់ដោយសវនករ បានក្លាយជាមូលដ្ឋានក្នុងការវិភាគ វាយតម្លៃហានិភ័យ និងកែលម្អចំណុះខ្វះខាតនានារបស់សវនដ្ឋានឱ្យស្របតាមបទដ្ឋានគតិយុត្តជាធរមាន។

ជាមួយគ្នានេះផងដែរ ឯកឧត្តម ឧត្តមសេនីយ៍ឯក អគ្គនាយក បានលើកឡើង នូវអនុសាសន៍ដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ផ្តល់អនុសាសន៍សំខាន់ចំនួន៣ ត្រូវយកចិត្តទុកដាក់បំផុត គឺ៖

១. ត្រូវបន្តពង្រឹងលើកកម្ពស់ផ្តល់សេវារបស់នគរបាលឱ្យកាន់តែមានភាពសាមញ្ញ លឿន ឆាប់រហ័ស តម្លាភាព និងគណនេយ្យភាព សំដៅឆ្លើយតបឱ្យមានប្រសិទ្ធភាព និងសំណូមពរបញ្ហាប្រឈមរបស់ប្រជាពលរដ្ឋទាន់ពេលវេលា។

២. ត្រូវបន្តយកចិត្តទុកគោលនយោបាយ ភូមិ ឃុំ មានសុវត្តិភាព បន្តទៀត ប្រកបដោយនិរន្តភាព និងប្រសិទ្ធភាពខ្ពស់។
៣. បញ្ហាសន្តិសុខ គឺជាកត្តាដែលតម្រូវចាំបាច់ ស្នើដល់គណៈបញ្ជាការឯកភាព រដ្ឋបាលរាជធានីខេត្ត ក្រសួងស្ថាប័ន និងអាជ្ញាធរពាក់ព័ន្ធទាំងអស់ សូមមេត្តាលើកកម្ពស់ស្មារតី និងសហការ គាំទ្រ ដល់សកម្មភាពរបស់កងកម្លាំងនគរបាលជាតិ ដើម្បីរួមគ្នារក្សាឱ្យបានសន្តិសុខ សុវត្តិភាព ស្ថិរភាព សន្តិសុខសណ្តាប់ធ្នាប់សាធារណៈ និងសុវត្តិភាពសង្គម ៕