ស្រុកសៀមបូក ជាស្រុកទី១ របស់ខេត្តស្ទឹងត្រែង ត្រូវបានប្រកាសទទួលស្គាល់ជាផ្លូវការជាស្រុក បញ្ចប់ការបន្ទោបង់ពាសវាលពាសកាល

ភ្នំពេញ៖ ឯកឧត្តម កែវ សិគុណ អនុរដ្ឋលេខាធិការ ក្រសួងអភិវឌ្ឍន៍ជនបទ តំណាងឯកឧត្តម ឆាយ រិទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នាព្រឹកថ្ងៃទី ១០ ខែ ឧសភា ឆ្នាំ២០២៤នេះ បានអញ្ជើញប្រកាសទទួលស្គាល់ជាផ្លូវការស្រុកសៀមបូក ជាស្រុកទី១ របស់ខេត្តស្ទឹងត្រែង ដែលបានបញ្ចប់ការបន្ទោបង់ពាសវាលពាសកាល ( ODF )។

ពិធីប្រកាសនេះដែរ មានការចូលរួមពីលោក ធូ ចាន់ពៅ អភិបាលរងនៃគណៈអភិបាលខេត្ត តំណាងឱ្យឯកឧត្តមអភិបាលខេត្ត និង លោក សួង ហ៊ី អភិបាលស្រុកសៀមបូក ព្រមទាំង លោក លោកស្រី តំណាងអង្គការដៃគូសហការ មន្ត្រីរាជការ សិស្សានុសិស្ស លោកគ្រូអ្នកគ្រូ និងអាជ្ញាធរពាក់ព័ន្ធជាច្រើននាក់ផងដែរ។

បន្ទាប់ពីតំណាងអង្គការភ្លែអន្តរជាតិកម្ពុជាប្រចាំខេត្តស្ទឹងត្រែង និង អង្គការវឌ្ឍនភាព បានធ្វើរបាយការសង្ខេបរួចមក លោក ព្រំ ចាន់ថា ប្រធានមន្ទីរអភិវឌ្ឍន៍ជនបទ ខេត្តស្ទឹងត្រែង បានមានប្រសាសន៍បញ្ជាក់ថា÷ សម្រាប់ ការងារអនាម័យជនបទ ស្រុកសៀមបូក មានចំនួនខ្នងផ្ទះសរុបចំនួន3,336 ខ្នងផ្ទះមានបង្កន់ប្រើប្រាស់ផ្ទាល់ខ្លួន ចំនួន3,081 និងខ្នងផ្ទះប្រើប្រាស់បង្គន់រួមមានចំនួន255ខ្នង សរុបជារួមខ្នងផ្ទះដែលមានបង្គន់ប្រើ ប្រាស់ក្នុងស្រុកចំនួន3,336 ស្មើនិង100% (សម្រាប់តែភូមិរដ្ឋបាល )។ក្នុងនោះលោកបានបន្ថែម គិតមកដល់ត្រីមាសទី១ ក្នុងឆ្នាំ២០២៤ នេះអត្រាគ្របដណ្តប់ទឹកជនបទ ក្នុងខេត្តស្ទឹងត្រែង សម្រេចបានជាលទ្ធផល៨៥% ។ សម្រាប់ស្រុកសៀមបូក មានអត្រាគ្របដណ្តប់ទឹកស្អាតជាមូលដ្ឋាន ចំនួន៨៦.៨១%។

មានប្រសាសន៍ក្នុងអង្គពិធី លោក ធូ ចាន់ពៅ អភិបាលរងខេត្តស្ទឹងត្រែង បានឲ្យដឹងថា ÷ ការរៀបចំពិធីអបអរសាទរប្រកាសទទួលស្គាល់ជាផ្លូវការស្រុកសៀមបូកបានបញ្ចប់ការបន្ទោបង់ពាសវាលពាសកាលODFនាពេលនេះ ជាសារមួយ ដើម្បីជំរុញស្មារតី និងការទទួលខុស
ត្រូវដល់អាជ្ញាធរគ្រប់លំដាប់ថ្នាក់ ស្រុក/ក្រុង ឃុំ/ សង្កាត់ ភូមិ និងប្រជាពលរដ្ឋនៅតាមមូលដ្ឋាន
ដែលមិនទាន់បានទទួលការបញ្ចប់ការបន្ទោបង់ពាសវាលពាសកាលនៅឡើយ ត្រូវបន្តរួមសហការនិង ខិតខំប្រឹងប្រែងធ្វើកិច្ចការងារនេះ ឲ្យសកម្មបន្ថែមទៀត ដើម្បីឈានទៅសម្រេចបានជា ស្រុក ក្រុង ឃុំ សង្កាត់ និងភូមិបញ្ចប់ការបន្ទោបង់ពាសវាលពាសកាល និងសម្រេចបានជាខេត្តបញ្ចប់ការ បន្ទោបង់ពាសវាលពាសកាលODF នៅឆ្នាំ២០២៥នាពេលដ៍ខ្លីខាងមុខនេះ។

លោកអភិបាលរងខេត្ត បានបន្តថា រដ្ឋបាលខេត្ត ទទួលបានលទ្ធផលក្នុងពេលនេះ គឺបានមកពីការចូលរួមចំណែកយ៉ាងសកម្មពី គ្រប់តួអង្គពាក់ព័ន្ធដ៍សំខាន់ៗរួមមាន៖ ក្រសួងអភិវឌ្ឍន៍ជនបទ រដ្ឋបាលខេត្ត ក្រុមការងារ បច្ចេកទេសវិស័យទឹកស្អាតនិងអនាម័យជនបទ (PWG) មន្ទីរអភិវឌ្ឍន៍ជនបទខេត្ត អាជ្ញាធរគ្រប់ លំដាប់ថ្នាក់ អង្គការភ្លែនអន្តរជាតិកម្ពុជា អង្គការវឌ្ឍនភាព និងអង្គការដៃគូរអភិវឌ្ឍន៍នានា ព្រម ទាំងវិស័យឯកជន ដែលបានចូលរួមឧបត្ថម្ភ គាំទ្រទាំងបច្ចេកទេស សម្ភារៈ និងថវិកា ដើម្បីដំណើរ ការ ការងារទឹកស្អាតនិងអនាម័យជនបទ ជាពិសេសមានការចូលរួមពីប្រជាជននៅមូលដ្ឋាន ដែលជាអ្នកអនុវត្តសកម្មភាពនេះផ្ទាល់។

ឯកឧត្តម កែវ សិគុណ អនុរដ្ឋលេខាធិការ ក្រសួងអភិវឌ្ឍន៍ជនបទ តំណាងឯកឧត្តម ឆាយ រិទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានបញ្ជាក់ថា៖ ការសម្រេចបានការបញ្ចប់ការបន្ទោបង់ពាសវាលពាសកាលគឺ ជាសមិទ្ធផលដ៏ធំមួយរួចទៅហើយ ប៉ុន្តែនៅមានការងារជាច្រើនទៀតដែលយើងត្រូវធ្វើ។ យើងត្រូវធានាថាគ្រួសារទាំងអស់ មានបង្គន់អនាម័យ និងប្រើប្រាស់ បង្គន់អនាម័យគ្រប់គ្នាដើម្បីសម្រេចបាននូវការទទួលបានសេវាអនាម័យកម្រិតមូលដ្ឋានជាសកល និងរក្សាបាន និរន្តភាពនៃសេវាអនាម័យ។

ឯកឧត្តម កែវ សិគុណ អនុរដ្ឋលេខាធិការ ក្រសួងអភិវឌ្ឍន៍ជនបទ បានគូសបញ្ជាក់ថា នៅមានបញ្ហាប្រឈមសំខាន់មួយទៀត គឺការរក្សាឱ្យមាននិរន្តភាពនូវស្ថានភាពការបញ្ចប់ការបន្ទោបង់ពាសវាលពាសកាល (ODF) ហើយត្រូវធានាថាបរិក្ខាទឹកស្អាត និងអនាម័យទាំងអស់មានភាពធន់ទ្រាំនឹងការប្រែប្រួលអាកាសធាតុ។ ទាំងនេះតម្រូវឱ្យមានភាពជាអ្នកដឹកនាំក្នុងតំបន់ ព្រមទាំងសមត្ថភាព បច្ចេកវិទ្យា និងគំនិតផ្តួចផ្តើមថ្មីៗក៏ដូចជា សកម្មភាពរួមគ្នាក្នុងចំណោមអ្នកពាក់ព័ន្ធទាំងអស់ រួមទាំងវិស័យឯកជនផងដែរ៕