ឯកឧត្តម សុត រស្មី រដ្ឋលេខាធិការក្រសួងធនធានទឹក អញ្ជើញចុះពិនិត្យស្ថានភាពទឹក និងការងារបង្កបង្កើនផលស្រូវ ក្នុងភូមិសាស្ត្រខេត្តក្រចេះ
ភ្នំពេញ៖ ឯកឧត្តម សុត រស្មី រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងារសម្របសម្រួលការងារគ្រប់គ្រងធនធានទឹក និងឧតុនិយមខេត្តក្រចេះ និងខេត្តស្ទឹងត្រែង អមដំណើរដោយឯកឧត្តម រុន តូ អនុប្រធានក្រុមការងារ រួមជាមួយមន្ត្រីបច្ចេកទេស និងក្រោមកិច្ចសហការពីលោកប្រធានមន្ទីរធនធានទឹក និងឧតុនិយមខេត្តក្រចេះ បានចុះពិនិត្យជាក់ស្តែងស្ថានភាពធនធានទឺក និងការងារបង្កបង្កើនផលស្រូវរដូវប្រាំង ក្នុងខេត្តក្រចេះ។
ក្នុងឱកាសនោះ ឯកឧត្តមរដ្ឋលេខាធិការ និងក្រុមការងារបានចុះពិនិត្យទីតាំងអាងស្តុកទឹកចំនួន ៣កន្លែង សម្រាប់ប្រើប្រាស់ក្នុងការបង្កបង្កើនផលស្រូវប្រាំងលើកទី២ រួមមាន៖ ទី១)ប្រព័ន្ធធារាសាស្រ្តទំនប់ទ្រនូលឆ្នាំង ស្ថិតក្នុងឃុំថ្មគ្រែ ស្រុកចិត្របុរី ខេត្តក្រចេះ ស្ថានភាពកម្រិតទឹកក្នុងអាងដែលនៅសល់ប្រមាណ ៤០% ដែលអាចស្រោចស្រពផ្ទៃដីធ្វើស្រែប្រាំងលើកទី២ បានចំនួន ២៥០ហិកតា ទី២)ប្រព័ន្ធធារាសាស្រ្តទំនប់បឹងរំលាច ស្ថានភាពកម្រិតទឹកក្នុងអាងដែលនៅសល់ប្រមាណ ៥០% ដែលអាចស្រោចស្រពផ្ទៃដីធ្វើស្រែលើកទី២បានចំនួន ១៧១ហិកតា និង៣-ប្រព័ន្ធធារាសាស្រ្តទំនប់បឹង និងបឹងកោះសុក្រម ស្ថានភាពកម្រិតទឹកក្នុងអាងដែលនៅសល់ប្រមាណ ៤០% ដែលអាចស្រោចស្រពផ្ទៃដីធ្វើស្រែលើកទី២ បានចំនួន ២៩ហិកតា។
ជាមួយគ្នានោះដែរ ឯកឧត្តមរដ្ឋលេខាធិការ បានផ្តាំផ្ញើរដល់បងប្អូនប្រជាកសិករ សូមប្រើប្រាស់ទឹកប្រកបដោយការសន្សំសំចៃខ្ពស់ ហើយប្រសិនបើបងប្អូនប្រជាពលរដ្ឋធ្វើស្រូវប្រាំងលើកទី២ គួរពិភាក្សាជាមួយមន្ទីរជំនាញ សម្រាប់វាយតម្លៃពីបរិមាណទឹកក្នុងអាងស្តុកទឹក ដើម្បីជៀសវាងផលប៉ះពាល់ដែលនាំឱ្យខាតបង់ពេលវេលា និងថវិការបស់បងប្អូន។
ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការ និងក្រុមការងារក៏បានចុះពិនិត្យទីតាំងឃ្លាំងដាក់សម្ភារៈ និងម៉ាស៊ីនបូមទឹក ព្រមទាំងរថយន្តស្ទូចសម្រាប់ដឹកជញ្ជូនក្នុងកិច្ចអន្តរាគមន៍ និងបានណែនាំដល់មន្ទីរឱ្យយកចិត្តទុកដាក់បន្ថែមទៀតក្នុងការថែទាំសម្ភារៈនិងគ្រឿងចក្រដែលមានស្រាប់ឱ្យបានល្អ ដើម្បីប្រើប្រាស់បានយូរអង្វែង ៕
