មន្ត្រីជាន់ខ្ពស់ក្រសួងអប់រំ ដឹកនាំកិច្ចប្រជុំ ស្ដីពីការត្រៀមរៀបចំការប្រកួតក្រុមភ្លេងកាយរឹទ្ធិថ្នាក់ជាតិ លើកទី១ ក្រោមប្រធានបទ “ភ្លេងសន្តិភាព”

ភ្នំពេញ៖ នាថ្ងៃទី២៩ ខែមេសា ឆ្នាំ២០២៤ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានដឹកនាំកិច្ចប្រជុំ ស្ដីពីការត្រៀមរៀបចំ ការប្រកួតក្រុមភ្លេងកាយរឹទ្ធិថ្នាក់ជាតិ លើកទី១ ក្រោមប្រធានបទ “ភ្លេងសន្តិភាព” ដែលនឹងប្រព្រឹត្តទៅ នាថ្ងៃទី០៣ ខែឧសភា ឆ្នាំ២០២៤ ខាងមុខនេះ នៅពហុកីឡដ្ឋានជាតិអូឡាំពិក និងមានការចូលរួមពីសំណាក់ ឯកឧត្ដម លោកជំទាវ ថ្នាក់ដឹកនាំក្រសួង ថ្នាក់ដឹកនាំ កាយរឹទ្ធិ លោក លោកស្រី មន្ត្រីពាក់ព័ន្ធក្រោមឱវាទអគ្គនាយកដ្ឋានយុវជន និង ក្រុមការងារកាយរឹទ្ធិ។

កិច្ចប្រជុំនេះ បានផ្ដោតពិភាក្សា លើវឌ្ឍនភាពនៃការរៀបចំកម្មវិធីប្រកួត របៀបវារៈនៃកម្មវិធីទាំងមូល សមាសភាពភ្ញៀវកិត្តិយសដែលត្រូវអញ្ជើញចូលរួម ពិធីកាយរឹទ្ធិ (ពិធីសាសនា គោរពទង់ជាតិ និងសច្ចាប្រណិធាន) មតិលោកជំទាវ អគ្គនាយកនៃអគ្គនាយកដ្ឋានយុវជន របាយការណ៍សង្ខេបពី ដំណើរការរៀបចំកម្មវិធី និង កិច្ចពិភាក្សាលើលំដាប់នៃកម្មវិធី។

មានប្រសាសន៍ក្នុងឱកាសនេះ លោកជំទាវ រដ្ឋលេខាធិការប្រចាំការ បានស្នើឱ្យក្រុមការងារបន្ថែមការយកចិត្តទុកដាក់លើសុខុមាលភាព របស់ក្រុមការងាររៀបចំកម្មវិធី អ្នកចូលរួម ក៏ដូចជាក្រុមកាយរឹទ្ធិទាំងអស់ ខណៈអាកាសធាតុក្ដៅខ្លាំង ត្រូវធានានូវការផ្គត់ផ្គង់ទឹក និងស្បៀងអាហារឱ្យបានគ្រប់គ្រាន់ ប្រកបដោយអនាម័យ និងរបៀបរៀបរយ។

ការប្រកួតក្រុមភ្លេងកាយរឹទ្ធិថ្នាក់ជាតិលើកទី១ គឺជាការឆ្លើយតបយ៉ាងវិជ្ជមានតាមផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ ដែលបានកំណត់ នៅក្នុងយុទ្ធសាស្ត្រទី១ គឺការផ្ដល់ឱកាសឱ្យមានគំនិតផ្ដួចផ្ដើម គំនិតច្នៃប្រឌិត គំនិតបង្កើតថ្មី និងស្មារតីជាក្រុម ព្រមទាំងស្មារតីទទួលខុសត្រូវ។

តាមរយៈកម្មវិធីនេះ ក្រសួងអប់រំ យុវជន និងកីឡានឹងផលិតបាននូវធនធានក្រុមភ្លេងកាយរឹទ្ធិ ដ៏មានសក្ដានុពលពេញលេញលើបំណិនសម្បទា ខាងផ្នែកកាយសម្បទា មានសុខភាព ល្អ វិជ្ជាសម្បទា ចរិយាសម្បទា ជំនាញទន់(Soft Skills) បំណិនជីវិត(Life Skills) បំណិនច្នៃប្រឌិត(Creativity) មានសមត្ថភាពរស់នៅ និងធ្វើការជាក្រុម (Teamwork) មានបំណិនផ្នែកតន្ត្រី និងសិល្បៈ និងមានឆន្ទៈពិតប្រាកដ ដើម្បីចូលរួមសកម្មភាពក្នុងសហគមន៍របស់ខ្លួន៕