សម្តេចធិបតី ហ៊ុន ម៉ាណែត៖ ខ្ញុំមិនមែនចង់បានទំនិញដែលផលិតក្នុងស្រុកប៉ុណ្ណោះទេ តែក៏ចង់បានផលិតផល ដែលផលិតដោយខ្មែរឱ្យកាន់តែច្រើន
ភ្នំពេញ៖ សម្តេចមហាបវរធិបតីហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែង សម្តេចមិនមែនចង់ឃើញត្រឹមតែកម្ពុជាមានសមត្ថភាពផលិតទំនិញនៅក្នុងស្រុកប៉ុណ្ណោះ តែក៏ចង់ឱ្យផលិតផលទាំងនោះគឺផលិតចេញដោយកូនខ្មែរ សម្រាប់ផ្គត់ផ្គង់ស្រុក ក៏ដូចជានាំចេញ។
សម្តេចធិបតី ហ៊ុន ម៉ាណែត បានថ្លែងបែបនេះ ក្នុងឱកាសសម្តេចអញ្ជើញសំណេះសំណាល ជាមួយសហជីព សេដ្ឋកិច្ចក្រៅប្រព័ន្ធ និងសមាគម បុគ្គលិកសិក្សាជាង៥ពាន់នាក់ អបអរសាទរ ទិវាពលកម្មអន្តរជាតិ ១ ឧសភា នាព្រឹកថ្ងៃទី២៨ ខែមេសា ឆ្នាំ២០២៤។
សម្តេចធិបតី បានបញ្ជាក់ថា យើងមិនចង់ត្រឹមតែមានសមត្ថភាពផលិតអ្វីនៅក្នុងស្រុកខ្មែរនោះទេ តែត្រូវតែមានផលិតដោយកូនខ្មែរ នេះគឺជាកិច្ចការសំខាន់តទៅទៀត ដោយសារអី គឺខុសគ្នា មួយការផលិតនៅស្រុកខ្មែរអាចដោយសារក្រុមហ៊ុនបរទេស ប៉ុន្តែផលិតដោយសារកូនខ្មែរ មិនចាំបាច់តែនៅក្នុងស្រុកខ្មែរទេ។
ជាមួយគ្នានេះ សម្តេចធិបតី បានឱ្យដឹងផងដែរថា ក្នុងពេលដែលសម្តេចបានទៅទស្សនកិច្ចនៅខ្ញុំឡាវកាលពីពេលថ្មីៗនេះ កត់សម្គាល់ឃើញថាសហគ្រាសរបស់កម្ពុជា ដែលមានប្រមាណ៣០នៅទីនោះ បានដឹកនាំប្រតិបត្តិការផលិតទំនិញដោយកូនខ្មែរ ដែលនេះគឺជាមោទនភាពមួយរបស់កម្ពុជា។
ទន្ទឹមគ្នានេះ សម្តេចធិបតី នាយករដ្ឋមន្ត្រី បានកត់សម្គាល់ឃើញធនធានមនុស្សរបស់កម្ពុជាក៏មានជំនាញកាន់តែប្រសើរឡើងផងដែរ។
សម្តេចធិបតី នាយករដ្ឋមន្ត្រី មានប្រសាសន៍ថា គោលនយោបាយដែលរាជរដ្ឋាភិបាលបានដាក់ចេញនៅក្នុងអាណត្តិទី៧ ក៏ដូចជានៅក្នុងអាណត្តិមុនៗនេះ គឺបង្កើនផលិតភាព បង្កើតភាពម្ចាស់ការ និងសមត្ថភាពរបស់កូនខ្មែរក្នុងការផលិត ផលិតផល សម្រាប់ផ្គត់ផ្គង់នៅក្នុងស្រុក។ ហើយទៅមុខទៀតកម្ពុជា នឹងកាន់តែអាចផលិតនូវសមិទ្ធផលទំនើប និងសំខាន់ៗធំៗ ជាងនេះទៅទៀត ៕
