អាជ្ញាធរខេត្តស្ទឹងត្រែង ហាមដាច់ខាតការនេសាទ ប្រើឧបករណ៍ឆក់នារដូវបិទនេសាទ
ភ្នំពេញ៖ រដូវបិទនេសាទក្នុងដែននេសាទខេត្តស្ទឹងត្រែង នឹងចាប់អនុវត្តពីថ្ងៃទី០១ ខែឧសភា ដល់ថ្ងៃទី៣០ ខែកញ្ញា ជារៀងរាល់ឆ្នាំ ហើយក្នុងអំឡុងពេលបិទនេសាទនេះដែរ គឺមិនអនុញ្ញាតឱ្យមានការនេសាទដោយប្រើឧបករណ៍ឆក់ និងសារធាតុពុលនោះទ្បើយ។
យោងតាមសេចក្តីជូនដំណឹងរបស់រដ្ឋបាលខេត្តស្ទឹងត្រែង ចុះថ្ងៃទី២៦ ខែមេសា ឆ្នាំ២០២៤បានអះអាងយ៉ាងដូច្នេះថា ក្នុងអំឡុងពេលបិទនេសាទនេះ គឺមិនអនុញ្ញាតឱ្យមានការនេសាទដោយឧបករណ៍មងគ្រប់ប្រភេទ សំដៅការពារត្រីមេពូជក្នុងអំឡុងពេលបង្កកំណើតខ្ពស់នេះ។ ទន្ទឹមជាមួយគ្នា សូមបងប្អូនមេត្តាបញ្ឈប់ជាបន្ទាន់នូវការប្រើឧបករណ៍ឆក់ សារធាតុពុល និងគ្រឿងផ្ទុះដែលជាប្រភេទឧបករណ៍នាំវិនាសអន្តរាយដល់ធនធានជលផល និងមច្ឆាជាតិយ៉ាងធ្ងន់ធ្ងរបំផុត។ ក្នុងករណីបងប្អូនប្រជានេសាទចង់នេសាទអាចប្រើនូវឧបករណ៍ជាលក្ខណៈគ្រួសាររួមមាន៖ សៃយ៉ុន លប សំណាញ់ សន្ទូចផ្លែមួយ អង្រុត ចាន់ តុម ទ្រូ កញ្ច្រែងដងត្រី និងឧបករណ៍មួយចំនួនទៀត ដែលច្បាប់អនុញ្ញាតសម្រាប់ផ្គត់ផ្គង់ជីវភាពគ្រួសារប្រចាំថ្ងៃ។
ទន្ទឹមនឹងនោះ រដ្ឋបាលខេត្តស្ទឹងត្រែងសង្ឃឹមយ៉ាងមុតមាំថា សាធារណជន និងអ្នកនេសាទទាំងអស់នឹងអនុវត្តតាមសេចក្តីជូនដំណឹងនេះ ប្រកបដោយការទទួលខុសត្រូវ ជាពិសេសសូមបងប្អូនប្រជានេសាទទាំងអស់ត្រូវចងចាំ និងអនុវត្តតាមយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល នីតិកាលទី៧នៃរដ្ឋសភាឱ្យបានខ្ជាប់ខ្ជួន ដើម្បីចូលរួមថែរក្សា ការពារ និងប្រើប្រាស់នូវធនធានមច្ឆាជាតិយើង ឱ្យបានគង់វង្សយូរអង្វែងសម្រាប់កូនចៅជំនាន់ក្រោយៗទៀត។
គួរឱ្យដឹងដែរថា ការហាមនេះដែរធ្វើទ្បើងដោយយោងទៅតាមច្បាប់ ស្តីពីជលផលនៃព្រះរាជាណាចក្រកម្ពុជា ប្រកាសលេខ៤៤០ ប្រក.កសក ចុះថ្ងៃទី០៥ ខែវិច្ឆិកា ឆ្នាំ២០១៣ ស្តីពីវិធានការការពារត្រីមេពូជនៅ រដូវពងកូនសម្រាប់តំបន់ទន្លេមេគង្គក្នុងភូមិសាស្ត្រខេត្តស្ទឹងត្រែង៕