សម្តេចធិបតី៖ ផ្អែកលើនិយាម នីតិវិធីប្រតិបត្តិសម្រាប់ការប្រឡង រើសមន្ត្រីសម្រាប់ក្រសួង ស្ថាប័ន ដោយធានាឱ្យបានទំនុកចិត្តពីសាធារណជន ពោលគឺ «ជាប់ដោយមោទនៈ ធ្លាក់ដោយអស់ចិត្ត»
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ផ្អែកលើនិយាម នីតិវិធីប្រតិបត្តិសម្រាប់ការប្រឡងប្រជែងជ្រើសរើសមន្ត្រីសម្រាប់ក្រសួង ស្ថាប័ន ដោយធានាឱ្យបានទំនុកចិត្តពីសាធារណជន ពោលគឺ «ជាប់ដោយមោទនៈ ធ្លាក់ដោយអស់ចិត្ត» ។
ក្នុងឱកាសអញ្ជើញបិទសន្និបាតបូក សរុបការងារឆ្នាំ២០២៣ និងលើកទិសដៅការងារ សម្រាប់ឆ្នាំ២០២៤ របស់ក្រសួងមុខងារសាធារណៈ នាថ្ងៃទី៤ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត បញ្ជាក់ថា «ផ្អែកលើនិយាម នីតិវិធីប្រតិបត្តិសម្រាប់ការប្រឡងប្រជែងជ្រើសរើសមន្ត្រីសម្រាប់ក្រសួង ស្ថាប័ន ដោយធានាឱ្យបានទំនុកចិត្តពីសាធារណជន ពោលគឺ ជាប់ដោយមោទនៈ ធ្លាក់ដោយអស់ចិត្ត ព្រមទាំងជំរុញការរៀបចំ និងការដាក់ឱ្យអនុវត្តន៍លិខិតបទដ្ឋានគតិយុត្ត និងការជ្រើសរើសគ្រប់គ្រងមន្ត្រីបច្ចេកទេស មន្ត្រីជំនាញដែលធានាឱ្យបានការបំពេញតម្រូវការ ការបំពេញឱ្យត្រូវ តែរក្សាឱ្យត្រូវ»។
សម្ដេចធិបតី បន្តថា ក្រសួងមុខងារសាធារណៈ ត្រូវបានទទួលស្គាល់ថា បានដើរតួនាទីយ៉ាងសំខាន់ក្នុងការគាំទ្រ និងការបំពេញមុខងាររបស់ក្រសួង-ស្ថាប័ន និងរដ្ឋបាលថ្នាក់ក្រោមជាតិ ក៏ដូចជាការគាំទ្រដល់ការកែទម្រង់សំខាន់ៗរបស់រាជរដ្ឋាភិបាល រួមទាំងការកែទម្រង់វិមជ្ឈការ និងវិសហមជ្ឈការ កែទម្រង់ការគ្រប់គ្រងហិរញ្ញវត្ថុសាធារណៈ និងការកែទម្រង់វិស័យអាទិភាពរបស់រាជរដ្ឋាភិបាល ដូចជា វិស័យអប់រំ សុខាភិបាលជាដើម។
សម្ដេចធិបតី គូសបញ្ជាក់ថា កិច្ចការកំណែទម្រង់រដ្ឋបាលសាធារណៈ នៅតែជាកិច្ចការអាទិភាពដ៏សំខាន់របស់រាជរដ្ឋាភិបាលកម្ពុជា ហើយក្រសួងមុខងារសាធារណៈ ក៏បន្តដើរតួនាទីគន្លឹះក្នុងកិច្ចការងារនេះ ដែលត្រូវបន្តផ្ដល់អាទិភាព និងផ្ដល់ការយកចិត្តទុកដាក់ខ្ពស់បន្ថែមទៀតលើការងារកំណែទម្រង់ ។
សម្ដេចធិបតី ថ្លែងថា ក្រសួងមុខងារសាធារណៈ បានធ្វើការកែទម្រង់ប្រព័ន្ធប្រាក់បៀវត្សមន្ត្រីរាជការស៊ីវិល កែលម្អប្រព័ន្ធសោធននិវត្តន៍ និងការកែលម្អការផ្ដល់សេវាសាធារណៈ ក៏ដូចជាភាពជាដៃគូជាមួយអង្គភាពផ្ដល់សេវាសាធារណៈជាដើម។ អ្វីដែលរាជរដ្ឋាភិបាលចង់បាន គឺរដ្ឋបាលសាធារណៈរឹងមាំ បត់បែន និងមានប្រសិទ្ធភាព៕
