ឧត្តមសេនីយ៍ត្រី ហួម ខ្វែក អញ្ជើញដឹកនាំប្រជុំបូកសរុបលទ្ធផលការងារយោធាសន្តិសុខប្រចាំឆ្នាំ២០២៣ និងផ្សព្វផ្សាយផែនការសកម្មភាពការងារយោធាសន្តិសុខ ឆ្នាំ២០២៤ របស់ផ្នែកសឹករងសំពៅលូន
ភ្នំពេញ៖ លោកឧត្តមសេនីយ៍ត្រី ហួម ខ្វែក មេបញ្ជាការ តំបន់ប្រតិបត្តិការសឹករងបាត់ដំបង នាថ្ងៃទី២២ ខែមីនា ឆ្នាំ២០២៤ បានអញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធាសន្តិសុខប្រចាំឆ្នាំ២០២៣ និងផ្សព្វផ្សាយផែនការសកម្មភាពការងារយោធាសន្តិសុខឆ្នាំ២០២៤ នៅទីបញ្ជាការ ផ្នែកសឹករងសំពៅលូន ស្ថិតនៅឃុំតាស្តា ស្រុកសំពៅលូន ខេត្តបាត់ដំបង។
ក្នុងឱកាសបូកសរុបនោះដែរ លោកមេបញ្ជាការ បានធ្វើការកោតសរសើរដល់កម្លាំងផ្នែកសឹករងសំពៅលូន ដែលកន្លងមកបានខិតខំប្រឹងប្រែងកសាងអង្គភាព បានចុះជួយសង្គ្រោះប្រជាពលរដ្ឋដែលជួបការលំបាក និងគ្រោះមហន្តរាយផ្សេងៗ រហូតមានការសរសើរពីសំណាក់ប្រជាពលរដ្ឋរស់នៅក្នុងភូមិសាស្ត្រដែលខ្លួនទទួលខុសត្រូវ ហើយអង្គភាពនៅតែបន្តអនុវត្តការងារបង្កបង្កើនផល ចិញ្ចឹមសត្វ ដើម្បីផ្គត់ផ្គង់ឱ្យដល់កម្លាំងជួរមុខក្នុងការបំពេញបេសកកម្មល្បាតទាំងយប់ទាំងថ្ងៃតាមខ្សែបន្ទាត់ព្រំដែនតាមផែនការ និងបទបញ្ជារបស់ថ្នាក់លើ។
លោកឧត្តមសេនីយ៍ត្រី ហួម ខ្វែក ក៏បានផ្សព្វផ្សាយសភាពការណ៍ថ្មីៗ បទបញ្ជា និងសេចក្តីណែនាំ របស់ថ្នាក់លើស្តីពីវិធានការក្នុងការប្រយុទ្ធប្រឆាំងគ្រឿងញៀនដល់នាយទាហាន ពលទាហាន ព្រមទាំងបានណែនាំបន្ថែមដល់ថ្នាក់ដឹកនាំ ព្រមទាំងនាយទាហាន នាយទាហានរង ពលទាហាន ត្រូវបន្តចូលរួមគោរព និងអនុវត្តនូវផែនការរបស់ថ្នាក់លើបានដាក់ចុះឱ្យបានម៉ឺងម៉ាត់បំផុតក្នុងការទប់ស្កាត់ឱ្យបាននូវរាល់បទល្មើសឆ្លងដែនខុសច្បាប់ផ្សេងៗ។
ជាចុងក្រោយលោកឧត្តមសេនីយ៍ត្រី ហួម ខ្វែក បានអញ្ជើញប្រគល់ប័ណ្ណសរសើរ លិខិតសរសើរ ជូនដល់នាយទាហាន នាយទាហានរង ពលទាហាន ដែលមានស្នាដៃឆ្នើមក្នុងការងារ១ឆ្នាំកន្លងមក និងបានប្រគល់ថវិកា ចំនួន ១.០០០.០០០រៀល ជូនលោកមេបញ្ជាការ ផ្នែកសឹករងសំពៅលូនផងដែរ៕
