ឯកឧត្តមបណ្ឌិត កៅ គឹមហួន អញ្ជើញចូលរួមសកម្មភាពផ្សេងៗដល់ទៅ៧ ក្នុងថ្ងៃតែមួយ នៅទីក្រុងហ្សាការតា
ភ្នំពេញ៖ នៅព្រឹកថ្ងៃទី២០ ខែមីនា ឆ្នាំ២០២៤ នៅលេខាធិការដ្ឋានអាស៊ាន ប្រចាំទីក្រុងហ្សការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានអនុញ្ញាតឲ្យលោកជំទាវ Urawadee Sriphiromya ឯកអគ្គរាជទូតថៃប្រចាំអាស៊ាន ដែលចប់អាណត្តិចូលជួបសំដែងការគួរសម និងជម្រាបលា។
នៅក្នុងឱកាសនោះ ឯកឧត្តមបណ្ឌិតអគ្គលេខាធិការអាស៊ាន បានថ្លែងអំណរគុណលោកជំទាវ ឯកអគ្គរាជទូត សម្រាប់ការចូលរួមចំណែកដ៏មានតម្លៃ នៅក្នុងកិច្ចការរបស់គណៈកម្មាធិការតំណាងអចិន្ត្រៃយ៍ប្រចាំអាស៊ាន (CPR) ព្រមទាំងការដឹកនាំគួរឲ្យសរសើររបស់លោកស្រី ក្នុងនាមជាប្រទេសសម្របសម្រួលសម្រាប់ដៃគូសន្ទនាអាស៊ាន-ឥណ្ឌា នាពេលកន្លងមក និងសម្រាប់ដៃគូសន្ទនាអាស៊ាន-ជប៉ុន នាពេលបច្ចុប្បន្ន។
អ្វីដែលគួរឲ្យកត់សម្គាល់យ៉ាងខ្លាំងនោះគឺ ទំនាក់ទំនងអាស៊ាន-ជប៉ុន ត្រូវបានតម្លើងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ កាលពីខែធ្នូ ឆ្នាំ២០២៣ ដោយមានប្រទេសថៃ ធ្វើជាប្រទេសសម្របសម្រួល។
បន្ទាប់មកឯកឧត្តមបណ្ឌិត កៅ គឹមហួន ក៏បានអនុញ្ញាតឲ្យគណៈប្រតិភូមកពីក្រុមហ៊ុន China International Capital Corporation (CICC) ដឹកនាំដោយលោកប្រធាន Liang Chen ចូលជួបសំដែងការគួរសម។
នៅក្នុងឱកាសនោះ ភាគីទាំងពីរបានផ្លាស់ប្តូរទស្សនៈ ស្តីពីនិន្នាការទីផ្សារពេលបច្ចុប្បន្ន និងការពង្រឹងការសម្របសម្រួលផ្នែកវិនិយោគនៅក្នុងតំបន់ ព្រមទាំងកិច្ចការមួយចំនួនទៀត។
ឯកឧត្តមបណ្ឌិត កៅ គឹមហួន ក៏បានអនុញ្ញាតឲ្យលោក Paul Thoppil តំណាងពាណិជ្ជកម្មប្រចាំតំបន់ឥណ្ឌូប៉ាស៊ីហ្វិករបស់កាណាដា ចូលជួបសំដែងការគួរសម និងពិភាក្សាការងារ។
នៅក្នុងឱកាសនោះ ភាគីទាំងពីរ បានពិភាក្សាអំពីកិច្ចសហការដែលអាចធ្វើទៅបានដើម្បីពង្រីកពាណិជ្ជកម្ម និងការវិនិយោគបន្ថែមទៀត រវាងអាស៊ាន និងកាណាដា ព្រមទាំងជំរុញការអភិវឌ្ឍប្រកបដោយចីរភាព និងភាពធន់នៃច្រវ៉ាក់ផ្គត់ផ្គង់។
នៅរសៀលថ្ងៃដដែល នៅលេខាធិការដ្ឋានអាស៊ាន ប្រចាំទីក្រុងហ្សការតា សាធារណរដ្ឋឥណ្ឌូណេស៊ី ឯកឧត្តមបណ្ឌិត កៅ គឹមហួន បានអនុញ្ញាតឲ្យឯកឧត្តម Nguyen Hai Bang ឯកអគ្គរដ្ឋទូតវៀតណាមប្រចាំអាស៊ាន ចូលជួបពិភាក្សាការងារ។
នៅក្នុងឱកាសនោះ ភាគីទាំងពីរបានពិភាក្សាអំពីការត្រៀមរៀបចំសម្រាប់ទស្សនកិច្ចការងារ របស់លោកអគ្គលេខាធិការអាស៊ាន ទៅប្រទេសវៀតណាម នាពេលខាងមុខ តបតាមការអញ្ជើញរបស់ នាយករដ្ឋមន្ត្រីវៀតណាម។
នៅក្នុងឱកាសនោះដែរ ស្របពេលដែលឯកអគ្គរដ្ឋទូត នឹងបញ្ចប់អាណត្តិបេសកកម្មនាពេលឆាប់ៗខាងមុខ ឯកឧត្តមបណ្ឌិត កៅ គឹមហួន បានថ្លែងអំណរគុណឯកឧត្តម ឯកអគ្គរដ្ឋទូត ដែលបានចូលរួមចំណែកនៅក្នុងកិច្ចការគាំទ្រដល់លេខាធិការដ្ឋានអាស៊ាន ព្រមទាំងវាយតម្លៃខ្ពស់ចំពោះភាពជាអ្នកដឹកនាំរបស់វៀតណាម ក្នុងនាមជាប្រទេសសម្របសម្រួល នៃទំនាក់ទំនងដៃគូសន្ទនាអាស៊ាន-ជប៉ុនពីឆ្នាំ ២០១៨-២០២១ និងអាស៊ាន-ជប៉ុន ពីឆ្នាំ២០២១-២០២៤។
ឯកឧត្តមបណ្ឌិត កៅ គឹមហួន ក៏បានអនុញ្ញាតឲ្យលោកជំទាវ Latifah Zaini ឯកអគ្គរាជទូតព្រុយណេប្រចាំអាស៊ាន ចូលជួបពិភាក្សាការងារ។
នៅក្នុងឱកាសនោះ ភាគីទាំងពីរបានពិភាក្សាអំពីការត្រៀមរៀបចំ សម្រាប់ទស្សនកិច្ចការងាររបស់លោកអគ្គលេខាធិការអាស៊ាន ទៅប្រទេសព្រុយណេ នៅឆ្នាំ២០២៤ នេះ ព្រមទាំងការងារមួយចំនួនទៀតផងដែរ។
ឯកឧត្តម Yasser Hassan Farag Elshemy ឯកអគ្គរដ្ឋទូតអេហ្ស៊ីបប្រចាំអាស៊ាន បានជូនសារតាំងដល់ ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន។
នៅក្នុងឱកាសនោះ ឯកឧត្តមបណ្ឌិតអគ្គលេខាធិការអាស៊ាន បានអបអរសាទរឯកឧត្តម ឯកអគ្គរដ្ឋទូតអេហ្ស៊ីប ដែលត្រូវបានតែងតាំងជាឯកអគ្គរដ្ឋទូតអេហ្ស៊ីបប្រចាំអាស៊ាន និងបានបញ្ជាក់សាជាថ្មីនូវការត្រៀម លក្ខណៈជាស្រេចរបស់លេខាធិការដ្ឋានអាស៊ាន ក្នុងការធ្វើការយ៉ាងជិតស្និទ្ធជាមួយស្ថានទូតអេហ្ស៊ីបប្រចាំអាស៊ាន ដើម្បីជំរុញទំនាក់ទំនងអាស៊ាន-អេហ្ស៊ីប ឲ្យកាន់តែប្រសើរ។
ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន ក៏បានរៀបចំអាហារពេលល្ងាចជូន លោកជំទាវ Urawadee Sriphiromya ឯកអគ្គរាជទូតថៃប្រចាំអាស៊ាន និងឯកឧត្តម Nguyen Hai Bang ឯកអគ្គរដ្ឋទូតវៀតណាមប្រចាំអាស៊ាន ដែលចប់អាណត្តិ ដោយមានការចូលរួមពីគណៈកម្មាធិការតំណាងអចិន្ត្រៃយ៍ប្រចាំអាស៊ាន (CPR) ផងដែរ។
នៅក្នុងឱកាសនោះ ឯកឧត្តមបណ្ឌិតអគ្គលេខាធិការអាស៊ាន បានជូនពរឯកឧត្តម និងលោកជំទាវ ទទួលបាននូវជោគជ័យនៅក្នុងភារកិច្ចថ្មីនាពេលខាងមុខ ៕
