នាយករដ្ឋមន្ត្រី៖ ការប្រឡងចូលជានិស្សិតពេទ្យ ត្រូវរៀបចំឱ្យបានតឹងរ៉ឹង និងមិនត្រូវឱ្យមានការប្រឡងជាប់ ដោយស្វ័យប្រវត្តិជាដាច់ខាត
ភ្នំពេញ៖ ក្នុងឱកាសអញ្ជើញបិទសន្និបាតបូកសរុប លទ្ធផលការងារសុខាភិបាលលើកទី៤៣ នៅសណ្ឋាគារសូហ្វីតែល ភ្នំពេញ ភូគីត្រា នារសៀលថ្ងៃទី១៩ មីនានេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការកសាងធនធានមនុស្ស នៅក្នុងវិស័យសុខាភិបាល គឺត្រូវគិតគូរពីការបណ្ដុះបណ្ដាលចេញពីសាលា ដូច្នេះការបណ្ដុះបណ្ដាលត្រូវផ្តោសំខាន់លើគុណភាពនៃការអប់រំ និងស្ដង់ដាច្បាស់លាស់។
សម្ដេចធិបតី មានប្រសាសន៍ថា ក្រសួងអប់រំ យុវជន និងកីឡា និងក្រសួងសុខាភិបាល ត្រូវមានស្តង់ដាប្រតិបត្តិចេញពីថ្នាក់ជាតិ និងអនុវត្តស្តង់ដាថ្នាក់ជាតិ តែមួយដូចគ្នានៅគ្រប់ទីកន្លែងទាំងអស់ក្នុងវិស័យទាំងពីរនេះ។
សម្ដេចធិបតី បញ្ជាក់បន្ថែមថា បញ្ហាប្រឈមបរស់កម្ពុជា គឺកង្វះធនធានមនុស្សសម្រាប់វិស័យសុខាភិបាល តាំងពីថ្នាក់ជាតិ រហូតដល់ថ្នាក់មូលដ្ឋាន។ ដូច្នេះត្រូវរករូបមន្តការកំណត់ការជ្រើសរើសមន្រ្ដីចូលក្នុងក្របខណ្ឌសុខាភិបាលនេះ គឺត្រូវធ្វើម៉េចកុំឱ្យខ្ទាស់ និងកែប្រែភាពបត់បែនដើម្បីធ្វើយ៉ាងណាឱ្យមានធនធានមនុស្សចូលក្នុងវិស័យសុខាភិបាលនេះបន្ថែម ៕
