សម្តេចធិបតី៖ ការសាងសង់អាកាសយានដ្ឋានអន្តរជាតិតេជោ គឺត្រូវបន្តរហូតទោះបីជាអំឡុងពេលការផ្ទុះរីករាលដាលជំងឺកូវីដ-១៩ ក៏ដោយ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានបញ្ជាក់ថា ការសាងសង់អាកាសយានដ្ឋានអន្តរជាតិតេជោ គឺត្រូវបន្តរហូតទោះបីជាអំឡុងពេលការផ្ទុះរីករាលដាលជំងឺកូវីដ-១៩ក៏ដោយ គឺមិនបានឈប់សម្រាកនោះទេ។ ខណៈវឌ្ឍន្នភាព នៃការសាងសងជំហានទី១នេះ គឺសម្រេចបានជាង ៦៦ភាគរយ និងបានចំណាយទឹកប្រាក់សរុបសម្រាប់ការសាងសង់ប្រមាណ ១ពាន់លានដុល្លារហើយ។

សម្តេចធិបតី ហ៊ុន ម៉ាណែត បានបញ្ជាក់បែបនេះ ក្នុងឱកាសដែលសម្តេចអញ្ជើញជួបសំណេះសំណាល និងចុះត្រួតពិនិត្យវឌ្ឍនភាពនៃគម្រោងសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទី១ នាព្រឹកថ្ងៃទី១២ ខែមីនា ឆ្នាំ២០២៤។

សម្ដេចធិបតី ហ៊ុន ម៉ាណែត បានថ្លែងថា គម្រោងអភិវឌ្ឍន៍អាកាសយានដ្ឋានអន្តរជាតិតេជោ គឺជាយុទ្ធសាស្ត្រអភិវឌ្ឍន៍ របស់សម្ដេចតេជោ ហ៊ុន សែន ក្នុងការឆ្ពោះទៅអភិវឌ្ឍន៍ទិសនិរតីនៃព្រះរាជាណាចក្រកម្ពុជា។

សម្ដេចធិបតី នាយករដ្ឋមន្ត្រី បានថ្លែងបន្តថា គម្រោងសាងសង់អាកាសយានដ្ឋានអន្តរជាតិតេជោគឺបានប្រើប្រាស់សម្ភារ បច្ចេកទេសសទំនើបប្រកបដោយគុណភាពខ្ពស់ ដែលធានាបានការប្រើប្រាស់យូរអង្វែងនិងមានសុវត្ថិភាព។

សម្ដេចធិបតី នាយករដ្ឋមន្ត្រី បានបន្ថែមថា គម្រោងវិនិយោគ អាកាសយាន្តដ្ឋានអន្តរជាតិតេជោ គឺ បានបង្ហាញពីទឹកដីកម្ពុជាមានសុខសន្តិភាព ហើយបានទទួលផលប្រយោជន៍ ដល់ប្រជាពលរដ្ឋនៅទូទាំងប្រទេស ៕