ឧត្តមសេនីយ៍ទោ អ៊ុង សុភាព ជួបសំណេះសំណាលជាមួយនគរបាលនារី ចំណុះស្នងការដ្ឋាននគរបាលខេត្តរតនគិរី ដើម្បីអបអរសាទរ ខួបលើកទី១១៣ ទិវាអន្តរជាតិនារី ៨ មីនា ២០២៤

ភ្នំពេញ៖ នារសៀលថ្ងៃទី០៧ ខែមីនា ឆ្នាំ២០២៤ ស្នងការដ្ឋាននគរបាលខេត្តរតនគិរី បានរៀបចំពិធីសំណេះសំណាល និងប្រារព្ធខួបលើកទី១១៣ ទិវាអន្តរជាតិនារី ៨ មីនា ឆ្នាំ២០២៤ ក្រោមប្រធានបទ “ស្ត្រី និងក្មេងស្រីក្នុងបរិវត្តកម្មឌីជីថល” ក្រោមអធិបតីភាព លោកឧត្តមសេនីយ៍ទោ អ៊ុង សុភាព ស្នងការនគរបាលខេត្តរតនគិរី ដោយមានការចូលរួមពីលោក-លោកស្រីស្នងការរង នាយការិយាល័យជំនាញ លោកអធិការនគរបាលក្រុង-ស្រុក លោកមេបញ្ជាការវរៈ ព្រមទាំងកងកម្លាំងនគរបាលនារីទូទាំងខេត្តរតនគិរី។

បន្ទាប់ពីបានស្តាប់នូវខ្លឹមសារលិខិតជូនពររបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជូនដល់ថ្នាក់ដឹកនាំ និងកងកម្លាំងនគរបាលជាតិទូទាំងប្រទេស ក្នុងឱកាសទិវាអន្តរជាតិនារី ៨ មីនា ឆ្នាំ២០២៤ ខួបលើកទី១១៣ រួចមកលោកឧត្តមសេនីយ៍ទោ អ៊ុង សុភាព ស្នងការនគរបាលខេត្ត បានលើកឡើងថា ការប្រារព្ធទិវាអន្តរជាតិ ៨ មីនា ខួបលើកទី១១៣ ឆ្នាំ២០២៤ ក្រោមប្រធានបទ “ស្រី និងក្មេងស្រី ក្នុងបរិវត្តកម្មឌីជីថល” គឺក្នុងគោលបំណងដើម្បីរំលេចអំពីសក្តានុពល និងភាពចាំបាច់ នៃការលើកកម្ពស់ការចូលរួម និងភាពជាតំណាងរបស់ស្រ្តី និងក្មេងស្រី ក្នុងវិស័យឌីជីថលប្រកបដោយប្រសិទ្ធភាព និងសុវត្ថិភាព។ តាមរយៈមូលបទ ដែលបានកំណត់លើកឡើងនេះ មានភាពស្របគ្នានឹងបរិយាកាស នៃការប្រើប្រាស់បច្ចេកវិទ្យាទំនើប និងកាន់តែច្រើនឡើងក្នុងជីវភាពរស់នៅក្នុងសង្គម សេដ្ឋកិច្ច និងនយោបាយ ដែលមានន័យថា ស្រ្តី និងក្មេងស្រី ចាំបាច់ត្រូវតែចូលរួម និងអភិវឌ្ឍខ្លួនឲ្យទាន់តាមសភាពការណ៍ ដែលកំពុងវិវត្តទៅមុខឥតឈប់ឈរនៃបច្ចេកវិទ្យាឌីជីថល។

លោកឧត្តមសេនីយ៍ទោ អ៊ុង សុភាព បានបន្តថា កម្ពុជាក្រោមការដឹកនាំដ៏សកម្មរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញនូវយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា និងបន្តពង្រឹងនូវក្របខណ្ឌគោលនយោបាយនានាសំដៅលើកកម្ពស់សមភាពយេនឌ័រ ព្រមទាំងការបង្កើនភាពអង់អាចក្លាហានដល់ ស្រ្តី និងក្មេងស្រី ឲ្យកាន់តែមានភាពប្រសើរឡើងជាលំដាប់។

លោកឧត្តមសេនីយ៍ទោ ស្នងការ ក៏បានលើកទឹកចិត្ត និងសម្តែងនូវការកោតសរសើរ ដោយស្មោះអស់ពីដួងចិត្ត ដល់បងប្អូននគរបាលនារីគ្រប់រូប ដែលបានខិតខំបំពេញភារកិច្ច ដើម្បីបុព្វហេតុការពារសន្តិសុខ និងសុវត្ថិភាពជូនជាតិមាតុភូមិ។

ក្រោយបញ្ចប់ពិធីសំណេះសំណាលលោកឧត្តមសេនីយ៍ទោ ស្នងការ បានជូនបាច់ផ្កាដល់ថ្នាក់ដឹកនាំជាស្ត្រីជានិមិត្តរូប និងបានជូនកញ្ចប់ថវិកាដល់នគរបាលនារីទាំងអស់ផងដែរ ព្រមទាំងរៀបចំពិធីពិសារអាហារជួបជុំគ្នាប្រកបដោយភាពរីករាយក្រៃលែង ៕