បណ្ឌិត សូ ណារ៉ូ៖ ការចូលរួមរបស់ពលរដ្ឋខ្មែរនៅអូស្រ្តាលី គឺបង្ហាញការពេញចិត្តចំពោះរាជរដ្ឋាភិបាល និងសម្ដេចធិបតី មិនមានការទិញទឹកចិត្តនោះទេ

ភ្នំពេញ៖ ឯកឧត្តមបណ្ឌិត សូ ណារ៉ូ រដ្ឋមន្ដ្រីប្រតិភូអមនាយករដ្ឋមន្ដ្រី ទទួលបន្ទុកកិច្ចការអាស៊ាន បានលើកឡើងថា ការចូលរួមរបស់ប្រជាពលរដ្ឋខ្មែរនៅអូស្រ្តាលី គឺជាការបង្ហាញការពេញចិត្តចំពោះរាជរដ្ឋាភិបាល ចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយមិនមានការទិញទឹកចិត្តនោះទេ ហើយការគាំទ្រដ៏ខ្លាំងក្លានេះគឺជាព្រឹត្តិការណ៍ប្រវត្តិសាស្ត្រដំបូង។

ឯកឧត្តមបណ្ឌិត បានលើកឡើងបែបនេះ ក្នុងសន្និសីទសារព័ត៌មាន ស្ដីពីលទ្ធផលនៃដំណើរទស្សនកិច្ចរបស់សម្ដេចធិបតី ហ៊ុន ម៉ាណែត នៅប្រទេសអូស្ត្រាលី ចាប់ពីថ្ងៃទី១-៧ ខែមីនា ឆ្នាំ២០២៤ ដែលបានធ្វើឡើងនៅព្រលានយន្តហោះអន្តរជាតិភ្នំពេញ នារាត្រីថ្ងៃទី០៦ ខែមីនា ឆ្នាំ២០២៤។

ឯកឧត្តមបណ្ឌិត សូ ណារ៉ូ បានថ្លែងយ៉ាងដូច្នេះថា ការចូលរួមនេះគឺបង្ហាញការពេញចិត្តចំពោះរាជរដ្ឋាភិបាល មិនមានការទិញដូរដូចការចោទប្រកាន់នោះទេ ដែលខ្ញុំឃើញជាក់ស្ដែង អ្នកខ្លះសុខចិត្តទិញសំបុត្រយន្តហោះពីស៉ីដនីទៅមែលប៊ន ហើយអ្នកចូលរួមក្នុងកម្មវិធីពេញតែម្ដង។

ឯកឧត្តមបណ្ឌិត បានបន្តថា ការចូលរួមក្នុងកម្មវិធីសំណេះសំណាលនេះ គឺបង្ហាញនូវទឹកចិត្តគាំទ្រពីសំណាក់ប្រជាពលរដ្ឋខ្មែរចំពោះរាជរដ្ឋាភិបាល សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ដែលមានកំណើនស្ទុះឡើងយ៉ាងខ្លាំងក្លា។

ឯកឧត្តមបណ្ឌិត បានបន្តទៀតថា នេះជាព្រឹត្តិការណ៍ប្រវត្តិសាស្ត្រមិនដែលធ្លាប់មានទេ គឺប្រជាពលរដ្ឋខ្មែរជិត១ពាន់នាក់បានដង្ហែតាមផ្លូវ ដើម្បីបង្ហាញការស្រឡាញ់ ទុកចិត្តចំពោះរាជរដ្ឋាភិបាលដែលបាននាំមកនូវសុខសន្តិភាព ស្ថិរភាព ឯកភាពជាតិ វិបុលភាពដល់ទឹកដីនិងប្រជាជនកម្ពុជា។

ចំណែកឯបាតុករដែលប្រឆាំងនឹងរាជរដ្ឋាភិបាលកម្ពុជា ដោយសារតែមានគ្នាតិចពេក ពួកគេក៏បានចូលរួមជាមួយមាតុករភូមា វៀតណាម ឡាវ ចងក្រងគ្នាដើម្បីឱ្យបានឃើញចំនួនច្រើន ដោយពួកគេភាគច្រើនប្រើប្រាស់ទង់របស់វៀតណាមសេរី ដូច្នេះហើយឃើញតែពណ៌លឿងៗ។

សូមបញ្ជាក់ថា ក្នុងពិធីសំណេះសំណាលជាមួយប្រជាពលរដ្ឋខ្មែរនៅអូស្ត្រាលី និងនូវែលសេឡង់ នាថ្ងៃទី៣ ខែមីនា នៅទីក្រុងម៉ែលប៊ននោះ គឺមានអ្នកចូលរួមប្រមាណជាង១,៦០០នាក់។ ចំពោះអ្នកចង់ចូលរួមគឺមានចំនួនច្រើនជាងនេះទៅទៀត គ្រាន់តែទីតាំងដែលរៀបចំពិធីសំណេះសំណាលនោះ ត្រូវកំណត់បានតែជាង១ពាន់នាក់ តែយ៉ាងណាក៏មានអ្នកគាំទ្រជាច្រើនពាន់ច្រើនម៉ឺននាក់ទៀតដែរ ៕