ឧបនាយករដ្ឋមន្ត្រី កើត រិទ្ធ រដ្ឋមន្រ្តីក្រសួងយុត្តិធម៌៖ សំណុំរឿងគ្រឿងញៀន ត្រូវអនុវត្ដឲ្យមានតម្លាភាព ត្រឹមត្រូវ និងម៉ឺងម៉ាត់បំផុត

ភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្ត្រីក្រសួងយុត្តិធម៌ បានថ្លែងបញ្ជាក់ច្បាស់ថា សំណុំរឿងគ្រឿងញៀន ត្រូវអនុវត្ដឲ្យមានតម្លាភាព ត្រឹមត្រូវ និងម៉ឺងម៉ាត់បំផុត ។

ការថ្លែងបញ្ជាក់របស់ឧបនាយករដ្ឋមន្ត្រី កើត រិទ្ធ ធ្វើឡើងកាលពីថ្ងៃទី៩ ខែមករា ឆ្នាំ២០២៤ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងសន្និសីទសារព័ត៌មាន ដើម្បីប្រកាសដាក់ចេញនូវយុទ្ធនាការសំខាន់ចំនួន ២ ដើម្បីពង្រឹង និងលើកកម្ពស់សេវាយុត្តិធម៌ និងគុណភាពនៃយុត្តិធម៌ នៅព្រះរាជាណាចក្រកម្ពុជា ។ យុទ្ធនាការទាំង ២ នោះរួមមាន៖ (១)-យុទ្ធនាការជំរុញនិងពន្លឿនការដោះស្រាយរឿងក្តីនៅតាមតុលាការ និង (២)-យុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការ។

ឯកឧត្តមឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ បញ្ជាក់បែបនេះថា «រឿងក្តីគ្រឿងញៀនេះ បញ្ជូនមក៥នាក់ ដោះលែង៣នាក់ ចោទប្រកាន់ ២នាក់ ចោទប្រកាន់ពីបទអ្វី យើងនឹងឆែកព័ត៌មាននេះគ្រប់គ្នា។ ដល់ដំណាក់កាល ជំនុំជម្រះ ត្រូវកាត់ក្តីដាក់ពន្ធនាគារប៉ុន្មានឆ្នាំ ហេតុអ្វី? សម្រេចឱ្យរួចខ្លួនប៉ុន្មាននាក់ ហេតុអ្វីឱ្យរួចខ្លួន? សំណុំរឿងគ្រឿងញៀនត្រូវអនុវត្ដយ៉ាងម៉ឺងម៉ាត់ដាច់ខាត ករណីគ្រឿងញៀន៖ ជាបញ្ហាសន្តិសុខ ជាពិសេសបញ្ហាគ្រឿងញៀន គឺស្ថិតនៅក្នុងវិធានការគន្លឹះទី៤ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលសម្តេចបានប្រកាសដាក់ចេញនៅក្នុងកិច្ចប្រជុំគណៈរដ្ឋមន្ត្រី លើកទី១។ នេះវាគឺជាគំនិត មិនត្រឹមតែបង្កគ្រោះថ្នាក់ប្រជាជន សន្តិសុខសាធារណៈប៉ុណ្ណោះទេ ប៉ុន្តែវាបំផ្លាញធនធានមនុស្សនៅកម្ពុជា។ អ្វីដែលក្រសួងអាចធ្វើបាន គឺសាលាជម្រះក្តី និងអង្គការអយ្យការអមសាលាជម្រះក្តី ត្រូវរៀបចំនូវសេចក្តីប្រកាសព័ត៌មាន ដើម្បីបង្ហាញពីតម្លាភាព នៅក្នុងចំណាត់ការរឿងក្តីគ្រឿងញៀន នៅគ្រប់ដំណាក់កាលទាំងអស់នៃនីតិវិធី ទាំងនៅដំណាក់កាលអយ្យការ ទាំងនៅដំណាក់កាលស៊ើបសួរ ទាំងនៅដំណាក់កាលជម្រះ។ (ឧទាហរណ៍) ឥលូវ គ្រឿងញៀនចាប់ពីកម្រិតណាមួយទៅ ដែលនឹងឯកភាពជាមួយអាជ្ញាធរជាតិថាពេលដែលបញ្ជូនមកដល់ព្រះរាជអាជ្ញា ពេលដែលព្រះរាជអាជ្ញាកាន់រឿងក្តីហ្នឹង ពេលដែលគាត់ចាត់ការចោទប្រកាន់ ឬក៏យ៉ាងម៉េច សុំឱ្យគាត់ធ្វើសេចក្តីប្រកាសព័ត៌មានមួយ ថារឿងក្តីគ្រឿងញៀនេះ បញ្ជូនមក៥នាក់ ដោះលែង៣នាក់ ចោទប្រកាន់ ២នាក់ ពីបទអ្វី យើងនឹងឆែកព័ត៌មាននេះគ្រប់គ្នា។ ដល់ដំណាក់កាល ជំនុំជម្រះ ត្រូវកាត់ក្តីដាក់ពន្ធនាគារប៉ុន្មានឆ្នាំ ហេតុអ្វី? សម្រេចឱ្យរួចខ្លួនប៉ុន្មាននាក់ ហេតុអ្វីឱ្យរួចខ្លួន?» ៕