មេបញ្ជាការកងពលតូចដឹកជញ្ជូនលេខ៩០ ប្តេជ្ញាអនុវត្តការងារឆ្នាំ២០២៤ ឱ្យមានប្រសិទ្ធខ្ពស់បន្ថែមទៀត

ភ្នំពេញ៖ នៅក្នុងកិច្ចប្រជុំបូកសរុបលទ្ធផលការងារយោធាសន្តិសុខ ឆ្នាំ២០២៣ ទិសដៅ ឆ្នាំ២០២៤ របស់កងពលតូចដឹកជញ្ជូនលេខ៩០ កងទ័ពជើងគោក នាព្រឹកថ្ងៃទី២៧ ខែកុម្ភៈ ឆ្នាំ២០២៤ នៅកងពលតូចដឹកជញ្ជូនលេខ៩០ ឯកឧត្តម ឧត្តមសេនីយ៍ទោ ឈរ សុខ នាយសេនាធិការរង កងទ័ពជើងគោក មេបញ្ជាការកងពលតូចដឹកជញ្ជូនលេខ៩០ បានប្តេជ្ញាអនុវត្តការងាឆ្នាំ២០២៤ ឱ្យមានប្រសិទ្ធខ្ពស់បន្ថែមទៀត ។

ក្នុងន័យនេះ ឧត្តមសេនីយ៍ទោ ឈរ សុខ បានដាក់ចេញនូវគោលគំនិត និងបទបញ្ជាដល់មេបញ្ជាការ មេបញ្ជាការរង នាយទាហាន នាយទាហានរង និងពលទាហាន កងពលតូចដឹកជញ្ជូនលេខ៩០ ត្រូវចូលរួម អនុវត្តតាមកម្មវិធីគោលនយោបាយយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧ នៃរដ្ឋសភា ដែលបានកំណត់ដាក់ចេញនូវគោលនយោបាយជាយុទ្ធសាស្រ្តធំៗ និងមានវិធានការជាក់ស្តែងជាអាទិ៍ភាពដើម្បីអនុវត្ត និងប្តេជ្ញាអនុវត្តឱ្យបានតាមគោលគំនិតដឹកនាំរួមរបស់ មេបញ្ជាការកងទ័ពជើងគោក។ សហការជាមួយអាជ្ញាធរមូលដ្ឋាន សមត្ថកិច្ចជំនាញគ្រប់លំដាប់ថ្នាក់ រក្សាការពារសន្តិសុខសណ្តាប់ធ្នាប់សង្គម តាមគោលនយោបាយ ភូមិ-ឃុំ-សង្កាត់ មានសុវត្ថិភាពជូនប្រជាពលរដ្ឋ និងធានាមធ្យោបាយ ការដឹកជញ្ជូន តាមបទបញ្ជាបានទាន់ពេលវេលា។ ត្រៀមកម្លាំង មធ្យោបាយ សម្ភារៈ ចល័តតាមបទបញ្ជា របស់មេបញ្ជាការកងទ័ពជើងគោក ជួយដល់ប្រជាពលរដ្ឋជួបការលំបាក និងរងគ្រោះ ក្នុងគ្រោះមហន្តរាយផ្សេងៗ។ប្រមូលផ្តុំពង្រឹង ការលើកកម្ពស់សមត្ថភាពដល់យោធិន ដោយជម្រុញតាមរយៈការហ្វឹកហ្វឺន បំប៉នយុទ្ធវិធីយោធា បច្ចេកទេសជំនាញ ស្វែងយល់ពីច្បាប់បទបញ្ជា សារាចរ ព្រមទាំងជំនាញឯកទេសផ្សេងៗ ដើម្បីលើកកម្ពស់គុណភាព និងសមត្ថភាពដល់យោធិន ជម្រុញការងារអប់រំចិត្តសាស្ត្រ ដល់នាយទាហាន នាយទាហានរង និងពលទាហានជាប្រចាំ ជ្រោងខ្ពស់ទង់ ស្នេហាជាតិ មានឆន្ទៈប្តូរផ្តាច់ស្មោះត្រង់ បំពេញតួនាទីរបស់ខ្លួន ជឿជាក់លើការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ ត្រូវខិតខំយកចិត្តទុកដាក់ ថែរក្សា ជួសជុល បំប៉នបច្ចេកទេសគ្រឿងយន្ត យុទ្ធោបករណ៍ ធានាបាននូវតម្រូវការ សុវត្ថិភាព ប្រសិទ្ធភាព លក្ខការណ៍បច្ចេកទេស និងអាទិភាពនៃប្រព័ន្ធដឹកជញ្ជូន ដើម្បីទទួលបានចក្ខុវិស័យ សម្រាប់អនាគត នៃការងារដឹកជញ្ជូន និងបង្កើនការងារ បង្កបង្កើនផល ចិញ្ចឹមសត្វ រកដៃគូរអភិវឌ្ឃន៍ ដើម្បីរួមចំណែកដោះស្រាយជីវភាពរស់នៅរបស់យោធិនឱ្យបានសមរម្យ ។

ឧត្តមសេនីយ៍ទោ ឈរ សុខ បានវាយតម្លៃខ្ពស់ចំពោះលទ្ធផលរបស់មេបញ្ជាការ មេបញ្ជាការរង នាយទាហាន នាយទាហានរង និងពលទាហាន កងពលតូចដឹកជញ្ជូនលេខ៩០ ដែលបានសហការជាមួយអាជ្ញាធរពាក់ព័ន្ធ ខិតខំយកចិត្តទុកដាក់អនុវត្តប្រកបដោយប្រសិទ្ធភាព នូវកម្មវិធីនយោបាយរបស់រាជរដ្ឋាភិបាល ក្រសួងការពារជាតិ អគ្គបញ្ជាការ ដែលបានដាក់ចេញ និងបានលើកទឹកចិត្តដល់ថ្នាក់ដឹកនាំគ្រប់លំដាប់ថ្នាក់ នាយទាហាន នាយទាហានរង និងពលទាហានទាំងអស់ ទូទាំងកងពលតូចដឹកជញ្ជូនលេខ៩០ បន្តកិច្ចខិតខំបំពេញភារកិច្ចដ៏ឧត្តុង្គឧត្តមនេះ ឱ្យទទួលបានជោគជ័យថែមទៀត សំដៅរួមចំណែក បង្កើនល្បឿនដល់កំណែទម្រង់កងយោធពលខេមរភូមិន្ទ ឱ្យកាន់តែទំនើបរៀបរយ និងមានប្រសិទ្ធភាព ៕