ឯកឧត្តម នេត្រ ភក្រ្តា៖ រាជរដ្ឋាភិបាលបានបើកឱកាស និងផ្តល់ជំនឿទុកចិត្ត ភាពកក់ក្តៅដល់អ្នកវិនិយោគគិន ដើម្បីធ្វើការពិចារណាក្នុងការមកវិនិយោគទុននៅក្នុងប្រទេសកម្ពុជា

ភ្នំពេញ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន បានលើកឡើងថា រាជរដ្ឋាភិបាលបានបើកឱកាស និងផ្តល់ជំនឿទុកចិត្ត ភាពកក់ក្តៅដល់អ្នកវិនិយោគគិន ដើម្បីធ្វើការពិចារណាក្នុងការមកវិនិយោគទុននៅក្នុងប្រទេសកម្ពុជា។

ការលើកឡើងរបស់ឯកឧត្ដមបែបនេះក្នុងជំនួបពិភាក្សាការងារជាមួយ ឯកឧត្តមបណ្ឌិត ប៊ូ អាប់ឌុលឡា ប្រធានក្រុមហ៊ុន Bu Abdullah Group of Companies មកពីទីក្រុង ឌូបៃ និង លោក Eric Lim នាយកប្រតិបត្តិ នៃក្រុមហ៊ុម Universal Alliance ជាក្រុមហ៊ុនផ្តល់ប្រឹក្សាសាជីវកម្ម និងគ្រប់គ្រងគម្រោងសម្រាប់ អ្នកវិនិយោគផ្ទាល់ពីបរទេស។

ក្នុងឱកាសបំពេញទស្សនកិច្ចនៅកម្ពុជា ឯកឧត្តមបណ្ឌិត ប៊ូ អាប់ឌុលឡា ប្រធានក្រុមហ៊ុន Bu Abdullah Group of Companies មកពីទីក្រុង ឌូបៃ អមដំណើរដោយ លោក Eric Lim នាយកប្រតិបត្តិ នៃក្រុមហ៊ុម Universal Alliance ជាក្រុមហ៊ុនផ្តល់ប្រឹក្សាសាជីវកម្ម និងគ្រប់គ្រងគម្រោងសម្រាប់ អ្នកវិនិយោគផ្ទាល់ពីបរទេស មានទីតាំងនៅទីក្រុងភ្នំពេញ បានអញ្ជើញចូលជួបសំដែងការគួរសមជាមួយ ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន នៅរសៀលថ្ងៃទី២៦ ខែមករា ឆ្នាំ២០២៤ ដើម្បីចង់ដឹងពីព័ត៌មានមួយ ចំនួនទាក់ទងពីសក្តានុពលវិនិយោគ ការធ្វើពាណិជ្ជកម្ម និង ចង់ស្វែងយល់ពីវប្បធម៍របស់កម្ពុជា ហើយយកធ្វើការផ្សព្វផ្សាយទៅកាន់ សហភាពអារ៉ាប់រួម ដែលអាចនាំមកនូវឱកាសអាជីវកម្ម និងការអភិវឌ្ឍកាន់តែរីកចំរើនបន្ថែមទៀតដល់ប្រទេសកម្ពុជា ។

ក្រុមហ៊ុន Bu Abdullah មានអាជីវកម្ម ផ្នែកពាណិជ្ជកម្ម លក់រាយប្រេង ឧស្ម័នធម្មជាតិ មាស ម្ហូបអាហារ សំលៀកបំពាក់ និងវិស័យទេសចរណ៍។

ឯកឧត្តម រដ្ឋមន្រ្តី នេត្រ ភក្ត្រា បានជម្រាបជូននូវព័ត៌មានមួយចំនួនទាក់ទងទៅដំណើរនៃការអភិវឌ្ឍប្រទេសកម្ពុជា ឆ្ពោះទៅមុខជាលំដាប់ ហើយរាជរដ្ឋាភិបាល បានបើកឱកាស និងផ្តល់ជំនឿទុកចិត្ត ភាពកក់ក្តៅដល់អ្នកវិនិយោគគិន ហើយបានផ្តល់នូវព័ត៌មានគ្រប់ជ្រុងជ្រោយ ដើម្បីអាចធ្វើការពិចារណាក្នុងការមកវិនិយោគទុននៅក្នុងប្រទេសកម្ពុជា សម្រាប់ជាផលប្រយោជន៍រួមរបស់ក្រុមហ៊ុន និងប្រជាជនកម្ពុជា ។

ឯកឧត្តមបណ្ឌិត ប៊ូ អាប់ឌុលឡា បានសំដែងនូវការរីករាយ ដែលបានទទួលនូវព័ត៌មានផ្សេងៗសម្រាប់ជាមូលដ្ឋានរបស់លោក ក្នុងការពិចារណានាំមកនូវក្រុមហ៊ុននានា មកធ្វើការវិនិយោគនៅក្នុងប្រទេកម្ពុជា៕