ឧត្តមសេនីយ៍ឯក សុខ វាសនា ក្រើនរំលឹកដល់មន្ត្រីនគរបាលអន្តោប្រវេសន៍ដែលប្រចាំការទាំងអស់ត្រូវជៀសឆ្ងាយពីការប្រើប្រាស់គ្រឿងញៀន

ភ្នំពេញ៖ នារសៀលថ្ងៃអង្គារ ៦កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែមករា ឆ្នាំ២០២៤ ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ ព្រមទាំងថ្នាក់ដឹកនាំនៃនាយកដ្ឋានច្រកទ្វារទី១ បានអញ្ជើញជួបសំណេះសំណាល និងសួសុខទុក្ខជាមួយមន្រ្តីនគរបាលអន្តោប្រវេសន៍ប្រចាំច្រកទ្វារព្រំដែនអន្តរជាតិភ្នំដី។

នាឱកាសនេះ ឯកឧត្តម ឧត្តមសេនីយ៍ឯក សុខ វាសនា អគ្គនាយក បានមានប្រសាសន៍ផ្តាំផ្ញើ និងសំណូមពរឲ្យប្រធានអង្គភាព ថ្នាក់ដឹកនាំគ្រប់លំដាប់ថ្នាក់មានការទទួលខុសត្រូវក្នុងការអនុវត្តតួនាទីភារកិច្ចរបស់ខ្លួន ដើម្បីផ្តល់សេវាសាធារណៈឲ្យបានល្អប្រសើរជូនប្រជាពលរដ្ឋ ក៏ដូចជាអ្នកដំណើរជនបរទេសទាំងអស់ ដែលចេញ-ចូល តាមច្រកទ្វារអន្តរជាតិនេះ។

ឯកឧត្តម ឧត្តមសេនីយ៍ឯក អគ្គនាយក ក៏បានពន្យល់បន្ថែមជូនដល់មន្ត្រីទាំងអស់ពីគោលនយោបាយបញ្ចកោណលើកទី១ ដែលទាក់ទងនឹងការអនុវត្តតួនាទី ភារកិច្ច របស់អគ្គនាយកដ្ឋានអន្តោប្រវេសន៍ និងមន្ត្រីច្រកទ្វារ អប់រំឲ្យយល់ពីការទាក់ទាញភ្ញៀវទេសចរណ៍ជាតិ និងអន្តរជាតិ ជាពិសេសទាក់ទងជាមួយការងារសម្រួលបែបបទ អាកប្បកិរិយាល្អ ចំពោះភ្ញៀវ ដើម្បីរួមចំណែកអនុវត្តនយោបាយទេសចរណ៍ជាតិ ជាពិសេសអប់រំពីការអនុវត្តវិន័យ សាមគ្គីភាពផ្ទៃក្នុង និងការខិតខំយកចិត្តទុកដាក់ធ្វើការងារ សហប្រតិបត្តិការជាមួយអង្គភាពពាក់ព័ន្ធ។

បន្ថែមពីនេះ ឯកឧត្តម ឧត្តមសេនីយ៍ឯក អគ្គនាយក បានបន្តថា ត្រូវខិតខំកែសម្រួលក្រើនរំលឹកដាស់តឿនឲ្យមន្ត្រីនគរបាលអន្តោប្រវេសន៍ដែលប្រចាំការទាំងអស់ត្រូវជៀសឆ្ងាយពីការប្រើប្រាស់គ្រឿងញៀន និងសូមឲ្យប៉ុស្តិ៍ត្រៀមរៀបចំពិនិត្យសារធាតុញៀនដល់មន្ត្រីនគរបាលអន្តោប្រវេសន៍ដែលប្រចាំការទាំងអស់។

ជាមួយគ្នានេះដែរ ឯកឧត្តម ឧត្តមសេនីយ៍ឯក អគ្គនាយក បានណែនាំដល់មន្ត្រីនគរបាលអន្តោប្រវេសន៍ដែលប្រចាំការទាំងអស់ ត្រូវប្រើប្រាស់ពាក្យសម្ដីឲ្យបានសមរម្យ អាកប្បកិរិយា គុណធម៌ និងបង្កើនសមត្ថិភាពមន្ត្រីដែលចេះភាសាបរទេស និងជំនាញបានល្អប្រសើរ ព្រមទាំងទីកន្លែងធ្វើការ បញ្ជរប្រថាប់ត្រា និងការសម្របសម្រួលដោយគ្មានលក្ខខណ្ឌ ហើយដោយមិនមានការគៀបសង្កត់ មិនមានការទារប្រាក់នានាខុសពីការកំណត់របស់រដ្ឋាភិបាល ដើម្បីសម្របសម្រួលបានទាន់ពេលវេលាជូនប្រជាពលរដ្ឋដែលបានធ្វើដំណើរឆ្លងកាត់ព្រំដែន។

បន្ទាប់មក ឯកឧត្តម ឧត្តមសេនីយ៍ឯក អគ្គនាយក បានបញ្ជាក់ទៀតថា មន្ត្រីនគរបាលទាំងអស់ ត្រូវមានវគ្គបណ្ដុះបណ្ដាលជំនាញជូនមន្រ្តីប៉ុស្តិ៍ មន្រ្តីផ្ដល់ទិដ្ឋាការ ដើម្បីបង្កើនសមត្ថភាព រៀបចំសកម្មភាពផែនការងារ សម្រាប់អនុវត្តដល់ការងារអន្តោប្រវេសន៍ផងដែរ៕