សម្តេចធិបតី៖ ប៉ុន្មានថ្ងៃនេះ មានអ្នកទៅពន្យល់ប្រធានាធិបតីបារាំងថា ប្រយ័ត្នចាញ់បោក សម្តេចធិបតី

ភ្នំពេញ៖ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានលើកឡើងថា ប៉ុន្មានថ្ងៃនេះមានអ្នកទៅពន្យល់ប្រធានាធិបតីបារាំង ដោយប្រាប់កថា ប្រយ័ត្នចាញ់បោក សម្តេចធិបតី។

ក្នុងពេលអញ្ជើញសំណេះសំណាលជាមួយបងប្អូនសហគមន៍ខ្មែររស់នៅក្នុងទ្វីបអឺរ៉ុប នៅវេលាម៉ោង៥ល្ងាច ត្រូវនឹងម៉ោង១១យប់ថ្ងៃទី១៤ ខែមករា ឆ្នាំ២០២៤ ម៉ោងនៅកម្ពុជា សម្តេចធិបតី ហ៊ុន ម៉ាណែតបានលើកឡើងថា ប្រធានាធិបតីបារាំង អញ្ជើញសម្តេចបំពេញទស្សនកិច្ចនៅបារាំងហើយ បែរជាខ្លាចសម្តេចបោកនោះ ជារឿងនឹកស្មានមិនដល់ ក្នុងនាមបារាំងជាមហាអំណាចមួយដែរនោះ។

សម្តេចធិបតី បានលើកឡើងថា ទស្សនកិច្ចផ្លូវការរបស់សម្តេចនៅប្រទេសបារាំង មានលក្ខណៈពិសេស ដោយសារប្រធានាធិបតីបារាំង ជាអ្នកចេញលិខិតអញ្ជើញ ព្រោះធម្មតា គឺមានសមភាពការទូត គឺបើនាយករដ្ឋមន្រ្តី ត្រូវអញ្ជើញដោយនាយករដ្ឋមន្រ្តី។

សូមជម្រាបថា សម្តេចធិបតី ហ៊ុន ម៉ាណែត បានអញ្ជើញទៅបំពេញទស្សនកិច្ចផ្លូវការ នៅប្រទេសបារាំង ចាប់ពីថ្ងៃ១៨-១៩ ខែមករា ឆ្នាំ២០២៤ តបតាមការអញ្ជើញរបស់ប្រធានាធិបតីបារាំង អេម៉ានុយអែល ម៉ាក្រុង៕